ပခုက္ကူ ၇ ဖေဖော်ဝါရီ
ပခုက္ကူမြို့ အမှတ် ၆ ရပ်ကွက် ကုဿိန္နာရုံ(နှမ်းမနှဲ)တောင်ပွဲဘုရားပွဲတွင် ဒေသရိုးရာလက်မှု ပစ္စည်းများ ရောင်းချနေကြောင်း သိရသည်။
ပခုက္ကူမြို့၏အထင်ကရပွဲတော်တစ်ခုဖြစ်သော ကုဿိန္နာရုံ(နှမ်းမနှဲ)ဘုရားပွဲတော်ကို နှစ်စဉ်ပြာသိုလဆန်းမှ တပို့တွဲလပြည့်နေ့ အထိနှမ်းမနှဲနှင့်ဒေသရိုးရာလက်မှုပစ္စည်းများရောင်းချသည်။ ပွဲတော်ကို နှစ်စဉ်စည်ကား သိုက်မြိုက်စွာ ရိုးရာမပျက်ကျင်းပလျက်ရှိပြီးအဓိက ရောင်းချသော ပစ္စည်းများမှာ နှမ်းမနှဲနှင့်ပခန်းကြီးမြို့ဟောင်း မြောက်ပြင်ကျေးရွာမှ အိုးအမျိုးမျိုးနှင့် ကလေးကစားစရာ အိုးပုတ်၊ ချိုးရုပ်နှင့် စက္ကူ၊ ဝါးတို့ဖြင့် ပြုလုပ်ထားသော ပစ်တိုင်းထောင်ရုပ်၊ ဖိုးဝရုပ်၊ သူငယ်တော်ရုပ်၊ ဆင်ရုပ်၊ မြင်းရုပ်နှင့် ရှေးခေတ်စစ်သူကြီးများဖြစ်သော ကျန်စစ်သား၊ မဟာဗန္ဓုလတို့၏ အမည်မှည့်ခေါ်ထားသော ဦးထုပ်၊ဓား၊လှံများနှင့် ကလေးကစားစရာအရုပ်မျိုးစုံကို ရောင်းချသောပွဲတော်ဖြစ်သည်။
အိုးလာရောင်းချသော ပခန်းကြီးမြောက်ပြင်ကျေးရွာမှ ဒေါ်သန်းဆွေက လွန်ခဲ့သော နှစ်ပေါင်း(၄၀) မိမိငယ်စဉ်ကတည်းက အိုးမျိုးစုံကို လာရောက်ရောင်းချခဲ့ကြောင်း၊ ယခင်ကာလက ရင်းနှီးငွေထောင်ဂဏန်းဖြင့် ပခုက္ကူသို့လာရောက်ရောင်းချ၍ရကြောင်း ယခုအခါငွေကျပ် သိန်း(၂၀)မှ (၂၅)သိန်းထိခန့်ရင်းနှီးမှသာ လာရောက်ရောင်းချရန်အဆင်ပြေပါကြောင်း၊ ဝါး/စက္ကူဖြင့်အရုပ်ပြုလုပ် သောပခုက္ကူမြို့အမှတ် ၁၃ ရပ်ကွက်မှ မလဲ့လဲ့ကလည်း မိမိတို့အနေဖြင့် နတ်တော်လမှစ၍ အရုပ်များ ပြုလုပ်ရင်းနှီးမြှုပ်နှံထားရပါကြောင်း ဒေသတွင်းအရုပ်များ သာမက တီဗီဇာတ်လမ်းတွဲမှ လာသော ကိုရီးယား၊ တရုတ်ဇာတ်ကားများထဲမှ ဦးထုပ်၊ဓား၊လှံပုံစံစသည်တို့လည်း ခေတ်လိုအပ်ချက်အရ ပြုလုပ် ရောင်းချရပါကြောင်းပြောကြားသည်။
အဆိုပါပွဲတော်တွင်နှမ်းမနှဲကိုလည်းရောင်းချရာတစ်ပိသာလျှင် ငွေကျပ် (၆၀ဝ၀) ဈေးနှုန်းဖြင့် ရောင်းချကြောင်း ဝယ်သူများထံမှ သိရသည်။
ကိုတမာ(ပြန်/ဆက်)
