နမ့်စန်တွင် အခြေခံစားသောက်ကုန်များ ပြည်သူများလက်ဝယ် အရောက် ပေးအပ်လှူဒါန်း

နမ့်စန် ၁၀ ဧပြီ

ရှမ်းပြည်နယ်တောင်ပိုင်း နမ့်စန်မြို့နယ်တွင် မဟာသင်္ကြန်ရုံးပိတ်ရက် ကာလအတွင်း ပုံမှန်ဝင်ငွေ မရှိသော ပြည်သူများအတွက် နိုင်ငံတော်မှ ထောက်ပံ့ကူညီသော အခြေခံစားသောက်ကုန် ၅ မျိုး ဖြန့်ဝေထောက်ပံ့ လှူဒါန်းခြင်းကို သက်ဆိုင်ရာ တာဝန်ရှိသူများက ယနေ့ ညနေပိုင်းတွင် နမ့်စန် မြို့ပေါ်ရှိ ရပ်ကွက်များနှင့် ကျေးရွာအုပ်စုများရှိ အိမ်ထောင်စုများသို့ သွားရောက် လှူဒါန်းပေးခဲ့ကြောင်း သိရသည်။

mdn

ပြည်သူ့လွှတ်တော်ကိုယ်စားလှယ် ဦးဌေးလွင်၊ ပြည်နယ်လွှတ်တော် ကိုယ်စားလှယ် ဦးလင်းအောင်ဆွေနှင့် ဦးစိုင်းလုံ၊ မြို့နယ်အုပ်ချုပ်ရေးမှူး ဦးညီညီအောင်နှင့် မြို့နယ် ကိုဗစ်-၁၉ ရောဂါ ကာကွယ်ထိန်းချုပ် ကုသရေး ကော်မတီဝင်များ၊ ဌာနဆိုင်ရာ အကြီးအကဲများ၊ လူမှုရေး အသင်းအဖွဲ့များနှင့် ရပ်ကွက် အုပ်ချုပ်ရေးမှူးများက နမ့်စန်မြို့ပေါ် ရပ်ကွက် ၅ ခု နှင့် ကျေးရွာအုပ်စုများရှိ အိမ်ထောင်စု ၁၁၀၅ စုအတွက် အိမ်ထောင်စု တစ်စုလျှင် ဆန် ၈ ပြည် ၊ ဆီ ၅၀ ကျပ်သား ၊ ဆား ၅၀ ကျပ်သား၊ ကုလားပဲ ၁ ပိဿာ နှင့် ကြက်သွန်နီ ၁ ပိဿာတို့ကို အိမ်တိုင်ရာရောက် လိုက်လံ ဖြန့်ဝေ လှူဒါန်းပေးခဲ့ကြောင်းသိရသည်။

ကျန်ရှိသော အိမ်ထောင်စုများကို ဧပြီ ၁၁ ရက်နေ့တွင် သက်ဆိုင်ရာ ရပ်ကွက်/ ကျေးရွာအလိုက် ဆက်လက်ဖြန့်ဝေ လှူဒါန်းသွားမည်ဖြစ်ကြောင်း မြို့နယ်စီမံခန့်ခွဲ့မှု ကော်မတီထံမှ သိရသည်။

သူရအောင် (ပြန်/ဆက်)