ထိုင်ထလေ့ကျင့်ခန်း လုပ်တော့မယ်ဆိုရင် ဒါလေးတွေ သိထားသင့်တယ်နော်

၁၄ ဧပြီ

တင်ပါးက ပြားနေလို့၊ တင်းပါးဘေးက ချိုင့်နေလို့၊ တင်ကျနေလို့ဆိုပြီး စိတ်ညစ်နေကြတဲ့ ချိမတို့ရှိလား။ မိန်းကလေးပဲလေ။ အခြားနေရာတွေ မကိတ်ရင်နေပါစေ။ တင်ပါးလေးမှာတော့ ကိတ်ချင်ကြတာပေါ့နော်။ ဒါပေမယ့် ကိုယ်က နဂိုတည်းက ကိတ်တဲ့သူမဟုတ်တော့ တင်ပါးဝိုင်းပြည့်ပြည့်လေးရဖို့ လေ့ကျင့်ခန်းလုပ်ရမယ်ဆိုရင် ဘယ်လိုပုံစံလေ့ကျင့်ခန်းတွေ လုပ်ရမလဲ။ ဘယ်လောက်ကြာကြာလုပ်ရမလဲ။

စိတ်ကူးထဲက တင်ပါးဝိုင်းဝိုင်းလေးရဖို့ ကြိုးစားနေကြတဲ့ မမတိုင်း ဒါလေးတွေသိသင့်ပါတယ်။

လေ့ကျင့်ခန်းအားလုံးမှာ အရေးအကြီးဆုံးကတော့ ဘယ်လောက်ပုံမှန်လုပ်ဖြစ်လဲ (frequency) ဆိုတာနဲ့ လုပ်တဲ့အချိန် စိုက်ထုတ်တဲ့အား (intensity) ပါပဲ။ ဒီတော့ တင်ပါးလေ့ကျင့်ခန်း ထိုင်ထ လုပ်တဲ့နေရာမှာလည်း သိသင့်တဲ့ အခြေခံအချက်တွေအတိုင်း လိုက်နာမယ်ဆိုရင် ပြောင်းလဲလာမယ့် သင့်တင်ပါးလေးကို ၁၂ ပတ်အတွင်း မြင်ရမှာပါ။ ကဲ ဆက်ကြည့်လိုက်ရအောင်။

ဘယ်လောက်ပြင်းပြင်းထန်ထန်လုပ်ရမလဲ ။ (Intensity)

ထိုင်ထ လေ့ကျင့်ခန်းလုပ်တော့မယ်ဆိုရင် ကိုယ်ခန္ဓါမှာရှိတဲ့ ကြွက်သား ၂ မျိုးအကြောင်း အရင်ဆုံး သိထားရပါမယ်။ မြန်မြန်လုပ်ရင် အားစိုက်ထုတ်ရတဲ့ ကြွက်သားနဲ့ နှေးနှေးလုပ်ရင် တက်လာတဲ့ ကြွက်သားတွေ အကြောင်းပဲ ဖြစ်ပါတယ်။ ဒီတော့ တင်ပါးလေ့ကျင့်ခန်းလုပ်ရင် ဒီ ကြွက်သား ၂ ခုကို အဓိကထားရပါမယ်။

•   လေ့ကျင့်ခန်း တစ်မျိုးကို အနည်းဆုံး ၃ ခါလောက် ပြန်ကျော့ကျော့ပြီး လုပ်ပေးပါ။
•   အချိန်သိပ်မပေးရတဲ့ လေ့ကျင့်ခန်း အမျိုးအစားတွေမှာ အလေးချိန်များတဲ့ ဝိတ်တုံးတွေကိုသုံးပြီး အချိန်နည်းနည်းကြာမယ်ထင်တဲ့ လေ့ကျင့်ခန်းတွေမှာတော့ ဝိတ်တုံးပေါ့တာလေးတွေ သုံးပြီး လုပ်ပါ။ ဒီလို အလေးတွေ ညှိလိုက်မှ ကြွက်သားနဲ့ အလေးတွေ အားမျှသွားလို့ ကိုယ်လုပ်တဲ့လေ့ကျင့်ခန်းတွေက ထိရောက်မှုရှိမှာဖြစ်ပါတယ်။
•   လုပ်ရင်းလုပ်ရင်းနဲ့ ကြွက်သားအားမရှိသလိုဖြစ်သွားရင် ခဏနားပြီးမှ ပြန်လုပ်ပါ၊
တစ်ပတ်ကို ဘယ်နှစ်ကြိမ်လောက်ပုံမှန် လုပ်ပေးရမှာလဲ။
တစ်ပါတ်အတွင်းလုပ်တဲ့ လေ့ကျင့်ခန်း အကြိမ်ရေကလည်း ကိုယ်လိုချင်တဲ့ ကိုယ်ခန္ဓါကို ပြောင်းလဲတဲ့နေရာမှာ အရေးကြီးတဲ့ အရာတစ်ခုပါ။
•   တင်ပါးဝိုင်းဝိုင်းလေး မြန်မြန်ရဖို့ဆိုရင် ထိုင်ထလေ့ကျင့်ခန်းကို တစ်ပါတ် ၂ ကြိမ်လုပ်ပေးပါ။ တစ်ကြိမ်နဲ့ တစ်ကြိမ်ကြားထဲမှာ အနည်းဆုံး ၃ ရက်လောက်ခြားပေးပါ။ ဒါမှ ကြွက်သားတက်ဖို့ အချိန်ပေးသလိုဖြစ်မှာကြောင့်ပါ။

ထိုင်ထတစ်မျိုးတည်းနဲ့ မလုံလောက်သေးပါဘူး။

တင်ပါးလေ့ကျင့်ခန်းမှာ အရေးအကြီးဆုံးက ထိုင်ထဆိုတာမှန်ပေမယ့် တင်ပါးဝိုင်းဝိုင်းပြည့်ပြည့်လေးရဖို့ ထိုင်ထ တစ်ခုတည်းနဲ့ မလုံလောက်ပါဘူး။ ဒီတော့ အခြား တင်ပါးလေ့ကျင့်ခန်း တွေလုပ်ပေးဖို့လည်းလိုပါသေးတယ်။ ဘယ်လိုအမျိုးအစားတွေ လုပ်ပေးရမလဲဆိုတာသိချင်ရင် You Tube မှာ Butt toning Workout videos တွေရှာလို့ရသလို google မှာ butt workout ဆိုပြီး ရိုက်ရှာကြည့်လို့ရပါတယ်။

ဘယ်လေ့ကျင့်ခန်းပဲလုပ်လုပ် ကျန်းမာရေးကို ထိခိုက်မှုမရှိစေဖို့က အရေးအကြီးဆုံးဖြစ်တာကြောင့်

•   တင်ပါးလေ့ကျင့်ခန်းတွေ မလုပ်ခင် ကိုယ့်ရဲ့ ကြံ့ခိုင်မှုကို အရင်ဆုံး စစ်ဆေးပါ။
•   ဝိတ်တုံးအလေးကြီးတွေ မ မခင် သွေးပူအောင် ထိုင်ထ အခါ ၂၀ ကို ဝိတ်တုံးအပေါ့လေးတွေနဲ့ လုပ်ပေးပါ။
•   လေ့ကျင့်ခန်းတစ်ခုမှာ သွေးပူလေ့ကျင့်ခန်းအရေးကြီးသလို လေ့ကျင့်ခန်းလုပ်ပြီး အကြောပြန်လျှော့ဖို့ကလည်း အဓိကျကတဲ့ အရာတစ်ခုပါ။

သိကိုသိထားရမယ့် အချက်တွေကတော့

• ထိုင်ထလုပ်ချိန်မှာ ခါးကို အားမပြုဘဲ ကိုယ့်တင်ပါးကြွက်သားတွေကို အားပြုဖို့ပါ။
• ထိုင်ထလုပ်နေချိန် ဒူးခေါင်း တွေ ပေါင်တွေ နာလာခဲ့ရင် လုပ်နေတာကို ချက်ချင်းရပ်လိုက်ပါ။

လှပတဲ့ ကိုယ်ခန္ဓါတစ်ခုကို တည်ဆောက်တဲ့နေရာမှာ လေ့ကျင့်ခန်းတင်မဟုတ် အစားအသောက်ကလည်းအရေးကြီးတာကြောင့် ကိုယ့်တင်ကို ကြီးပြီး ကိတ်စေမယ့် အစားအသောက်တွေ ရွေးစားပေးဖို့လည်း လိုပါသေးတယ် ။ ။ ကိုယ်လုပ်ရင်လုပ်သလောက် ကိုယ်ခန္ဓါက ပြောင်းလဲလာမှာ ဖြစ်တဲ့အတွက် မဖြစ်နိုင်ဘူးဆိုတာ ဘာမှမရှိပါဘူး။ ကဲဒီနေ့ကစပြီး ကြိုးစားလိုက်ရအောင် ။
ရေးသားသူ Dr. Thin Yadanar @ Frances
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

“ယခုဆောင်းပါးကို Myanmar Digital News ၏ မိတ်ဖက်ဖြစ်သည့် ကျန်းမာရေးနှင့် ဆေးပညာဝက်ဘ်ဆိုဒ် Hello ဆရာဝန် https://hellosayarwon.com မှ ကူးယူဖော်ပြခြင်းဖြစ်ပါသည်”