လွိုင်ကော် ၁၇ ဧပြီ
မြန်မာနှစ်သစ်ကူး အခါသမယ အထိမ်းအမှတ်အားဖြင့်လည်းကောင်း၊ ပြည်သူလူထု နှလုံးစိတ်ဝမ်း အေးချမ်းစေရေးနှင့် လူသားချင်းစာနာထောက်ထားမှုကို အလေးထားသောအားဖြင့် နိုင်ငံတော်သမ္မတမှ ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံ အခြေခံဥပဒေပုဒ်မ ၂၀၄ ၊ ပုဒ်မခွဲ (က)အရ မြန်မာနိုင်ငံအတွင်း အကျဉ်းထောင်/ စခန်းအသီးသီးရှိ အကျဉ်းသား/သူစုစုပေါင်း (၂၄၈၉၆)ဦးတို့အား စည်းကမ်းသတ်မှတ်ချက်မထားဘဲ ပြစ်ဒဏ်လွတ်ငြိမ်းခွင့် ပေးခဲ့သည်။
ကယားပြည်နယ်တွင် ဧပြီ ၁၇ ရက်နေ့ နံနက် (၉) နာရီမှ မွန်းတည့် (၁၂) နာရီအထိ လွိုင်ကောင်မြို့၊ ဒေါဥခူရပ်ကွက်ရှိ လွိုင်ကော်အကျဉ်းထောင်တွင်ရှိ ကျား (၁၆၈) ဦး၊ မ (၂၂)ဦး စုစုပေါင်း (၁၉၀)တို့အား စေလွှတ်ပေးခဲ့ရာ အကျဉ်းထောင်ဝန်းရှိခန်းမဆောင်၌ လွိုင်ကော်ခရိုင်အုပ်ချုပ်ရေးမှူး ဦးစန်းဝင်း၊ ပြည်နယ်အကျဉ်းဦးစီးဌာနမှ ဒုတိယညွန်ကြားရေးမှူး ဦးညွန့်ဝင်း၊ လက်ထောက်ညွှန်ကြားရေးမှူး ထောင်ပိုင် ဦးကျော်ဇေယျ၊ ကယားပြည်နယ်ဒုရဲတပ်ဖွဲ့မှူး ရဲမှူးကြီး လှရီ၊ လွိုင်ကော်ခရိုင်ရဲတပ်ဖွဲ့မှူး ဒုရဲမှူးကြီး တင်မင်းဦး တို့မှ ထောင်လွတ် အကျဉ်းသား/သူများအား နောင်တွင် ကောင်းမွန်စွာနေထိုင်ရန် နှင့် ကိုဗစ်-၁၉ ရောဂါနှင့်ပတ်သက်၍ အသိပညာပေးခြင်း တို့ကို အသီးသီး ပြောကြားခဲ့ပြီး လက်ကမ်းစာစောင်များပေးဝေခဲ့ကြောင်း သိရှိရသည်။
အဆိုပါ ပြစ်ဒဏ်လွတ်ငြိမ်းခွင့် ပေးခဲ့ရာတွင် ရဲအက်ဥပဒေဖြင့် ကျား ၂ ဦး၊ မ ၁ ဦး ပေါင်း ၃ ဦး၊ တပ်မတော်အက်ဥပဒေဖြင့် ကျား ၁၇ ဦး၊ မူးယစ်ပုဒ်မဖြင့် ကျား ၁၃၀ ဦး၊ မ ၂၁ ဦး ပေါင်း ၁၅၁ လူသတ်မှု ကျား ၆ ဦး၊ တလင်တမယားမှုဖြင့် ကျား ၂ ဦး၊ လောင်းကစားမှုဖြင့် ကျား ၁ ဦး၊ လူသတ်ရန်ကြံစီမှု ကျား ၁ ဦး၊ တရားမဝင်သစ်သယ်ဆောင်မှု ကျား ၁ ဦး၊ မုဒိမ်းမှု ကျား ၃ ဦး၊ ခိုးမှု ကျား ၅ ဦးတို့ဖြစ်ကြောင်း သိရှိရသည်။
ထောင်လွတ်အကျဉ်းသား/သူများအား မိမိနေရပ်သို့မပြန်မီ လွိုင်ကော်အကျဉ်းထောင်အတွင်း၌ ၇/၁၀၀ တပ်မတော်ဆေးရုံမှ ဗိုလ်ကြီး ထင်လင်းအောင် ပါ ၂ ဦးတို့မှ ကျန်းမာရေးစစ်ဆေးမှုများ ပြုလုပ်ခြင်း၊ ပြည်နယ်ကုသ ရေးဦးစီးဌာနမှ ဒေါက်တာ ဖြိုးမောင်မောင်ပါ ကျန်မာရေး၀န်ထမ်း ၃ ဦးတို့မှ ဆေးစစ်ဆေးချက်ထောက်ခံချက်များ ပြုလုပ်ပေးခြင်း တို့ဆောင်ရွက်ပေးခဲ့ကြပြီး မော်တော်ယာဉ်များဖြင့် အသီးသီးပို့ဆောင်ပေးခဲ့ကြောင်းနှင့် ကျန်အကျဉ်းသား/သူ စုစုပေါင်း ၁၀၂ ဦးတို့အား မိမိအစီအစဉ်ဖြင့် ထွက်ခွာသွားကြောင်း သိရှိရသည်။
ကိုစိုင်း (လွိုင်ကော်)
