မကွေး ၂၅ ဧပြီ

ကပ်ရောဂါအန္တရာယ်မှ ကာကွယ်ရန် မကွေးမြို့နယ်အတွင်း ကျေးရွာများ၌ နှာခေါင်းစည်းအကာအကွယ် တပ်ဆင်ရေး mask campaign များ ပြုလုပ်နေကြောင်း စည်ပင်ကော်မတီဥက္ကဌ ဦးဖိုးနီ ထံမှ သိရသည်။

လွှတ်တော်သုံးရပ်မှ ကိုယ်စားလှယ်များဖြစ်သည့် ဦးမြင့်ဦး၊ ဦးလှဆန်း၊​​ ဒေါ်ခင်ချိုလတ် တို့နှင့် ပရဟိတ ဆောင်ရွက်သူများက ဧပြီလ ၂၅ ရက်နေ့မနက်ပိုင်း၌ ကြာကန်၊​ ညောင်ပင်သာနှင့် ညောင်ကန် ​ကျေးရွာများထိ အရောက်သွားကာ နှာခေါင်းစည်း mask အခုရေ ၁၉၀၀ အား ဖြန့်ဝေခဲ့ကြသည်။

" ဒီလှုပ်ရှားမှုကနေ mask အခုရေ ခြောက်သောင်းလောက်ဖြန့်ဖို့ ရည်ရွယ်ပါတယ်။ ကိုဗစ်ရန်ပုံငွေအဖွဲ့ကို mask ချုပ်ဖို့အဝတ်တွေ၊ ချုပ်ခတွေ လှူဒါန်းကြသူတွေ ရှိပါတယ်။ ရန်ပုံငွေကလည်း သိန်း ၁၄၀ လောက်ကျန်သေးတယ်။ mask campaign က ကျေးလက်မြို့ပြ နေရာအနှံ့မှာ လုပ်ဖို့ရည်ရွယ်ပါတယ် '' ဟု မကွေးစည်ပင်ကော်မတီ ဥက္ကဌ ဦးဖိုးနီက ပြောသည်။

မကွေးမြို့မှ ပရဟိတအဖွဲ့အစည်းများ ၊ မီးသတ်တပ်ဖွဲ့ ၊ ရဲတပ်ဖွဲ့နှင့် ကျန်းမာရေးဝန်ထမ်းများက မကွေး-နတ်မောက် ကားလမ်းမကြီးပေါ်တွင် ဖြတ်သန်းသွားလာသူ ပြည်သူများအား အသိပညာပေးခြင်း ၊ mask ဖြန့်ဝေခြင်းများ လုပ်ဆောင်ခဲ့ကြောင်း ကျေးလက်မြေပရဟိတအဖွဲ့ နာယက ဦးဇော်မင်းထိုက်ထံမှ သိရသည်။

ဇေယျတု(မကွေး)