မြဝတီ ၁ မေ
ထိုင်းနိုင်ငံမှ မြန်မာနိုင်ငံသို့ ပြန်လာရန်ရှိသည့် မြန်မာရွှေ့ပြောင်းလုပ်သားအချို့သည် ယနေ့ နံနက်ပိုင်းမှစ၍ မြန်မာ−ထိုင်း အမှတ် (၂) ချစ်ကြည်ရေးတံတားမှတစ်ဆင့် စတင်ဝင်ရောက်လာသည်။
ယနေ့ ပြန်ဝင်လာသူများအနေဖြင့် ထိုင်းနိုင်ငံ တာ့ခ်ခရိုင်အတွင်းမှဖြစ်ပြီး ဘန်ကောက်နှင့် တခြား ခရိုင်ဒေသများမှ မြန်မာအလုပ်သမားများအနေဖြင့် ညမထွက်ရ အမိန့်အပါအဝင် အခြားစည်းကမ်းချက်များကို မေလကုန်အထိ တိုးမြှင့်လိုက်သည့်အတွက် ပြန်လာရန် စောင့်ရဦးမည်ဖြစ်ကြောင်း သိရသည်။
“ တစ်ခရိုင်နှင့် တစ်ခရိုင် ဖြတ်သန်းသွားလာခွင့် မပြုဘူးဆိုပေမယ့် တာ့ခ်ခရိုင်၊ မဲဆောက်မှာ ရှိနေတဲ့ မြန်မာနိုင်ငံ ကို ပြန်လာချင်တဲ့ သူတွေအနေနဲ့ နိုင်ငံခြားရေးဝန်ကြီးဌာနက ထုတ်ပြန်ချက်အရ ဧပြီ ၃၀ ရက် နောက်ပိုင်းဖြစ်တဲ့ အတွက် မေ ၁ ရက်မှာ မြန်မာနိုင်ငံက စတင်လက်ခံခဲ့တာ ဖြစ်ပါတယ်” ဟု မြဝတီခရိုင်အုပ်ချုပ်ရေးမှူး ဦးတေဇာအောင် က ပြောသည်။
“ ပြန်ဝင်လာတဲ့သူတွေကို ၎င်းတို့ပြန်မည့် နေရပ်ဒေသလူဦးရေ အနည်းအများအပေါ် မူတည်ပြီး ပြန်လည် ပို့ဆောင်ဖို့နဲ့ မြဝတီစခန်းတွေမှာထားဖို့ကို စီစဉ်သွားမှာဖြစ်ပါတယ်”ဟု ကရင်ပြည်နယ် အစိုးရအဖွဲ့လူမှုရေးဝန်ကြီး ဦးဘိုဘိုဝေမောင်က ပြောသည်။
ယနေ့ မွန်းတည့် ၁၂ နာရီ အထိ ကရင်ပြည်နယ်မှ ၇ ဦး၊ မွန်ပြည်နယ်မှ ၉ ဦး၊ စစ်ကိုင်းတိုင်းဒေသကြီးမှ ၁ ဦး၊ ပဲခူးတိုင်းဒေသကြီးမှ ၃၀၊ နေပြည်တော်မှ ၂ ဦး၊ ဧရာဝတီတိုင်းဒေသကြီးမှ ၂ ဦး စုစုပေါင်း ၅၁ ဦး ပြန်လည် ဝင်ရောက်လာခြင်း ဖြစ်သည်။
ပြန်ဝင်လာသူများအနက် ပဲခူးတိုင်းဒေသကြီးမှ ၃၀ နှင့် မွန်ပြည်နယ်မှ ၉ ဦးတို့ကို ယနေ့တွင် ၎င်းတို့ဒေသသို့ ဆက်လက် ပို့ဆောင်ပေးမည်ဖြစ်ပြီး ၎င်းတို့၏ နေရပ်ဒေသများ၌ ကန့်သတ်စောင့်ကြည့်သွားမည်ဖြစ်ကြောင်း သိရသည်။
ယနေ့ ပြန်လည်ဝင်ရောက်လာသူများအား ကရင်ပြည်နယ်အစိုးရအဖွဲ့၊ လူမှုရေးဝန်ကြီး ဦးဘိုဘိုဝေမောင်၊ ကရင်ပြည်နယ် လွှတ်တော်ကိုယ်စားလှယ် ဦးသန့်ဇင်အောင်၊ ခရိုင်အုပ်ချုပ်ရေးမှူး ဦးတေဇာအောင်၊ မြို့နယ် အုပ်ချုပ်ရေးမှူး ဦးဖြိုးဇော်ကိုကိုနှင့် တာဝန်ရှိသူများက ပြန်လည်လက်ခံကြိုဆိုရေးတွင် ကျန်းမာရေးစစ်ဆေးမှု အပါအဝင် အခြားလိုအပ်သည်များအား ကြီးကြပ်ဆောင်ရွက်ပေးလျက်ရှိကြောင်း သိရသည်။
ထိန်လင်းအောင်(ပြန်၊ဆက်)
