မင်းတပ် ၁၃  မေ

မင်းတပ်ခရိုင်၊ ကန်ပက်လက်မြို့နယ် ပြည်သူ့ဆေးရုံ ဆေးသိုလှောင်ရုံနှင့် ခွဲစိတ်ခန်းပါ ဆေးရုံတိုးချဲ့ဆောင် တည်ဆောက်ပြီးစီးမှုကို ယမန်နေ့ မွန်းလွဲ ၃ နာရီက ခရိုင်စီမံခန့်ခွဲမှုကော်မတီဥက္ကဋ္ဌ ဦးမောင်ထူးနှင့် ကန်ပက်လက်မြို့နယ် စီမံခန့်ခွဲမှု ကော်မတီအဖွဲ့ဝင်များက ကွင်းဆင်းစစ်ဆေးခဲ့ကြသည်။

ထိုသို့စစ်ဆေးရာတွင် ကန်ပက်လက်မြို့နယ်အတွင်း ၂၀၁၉-၂၀၂၀ ဘဏ္ဍာရေးနှစ် ပြည်ထောင်စု ငွေလုံးငွေရင်း ခွင့်ပြုရန်ပုံငွေ (၅၃ ဒသမ ၉၀၀ ကျပ်သန်း) ဖြင့် ပဒေသာလှိုင်မေတ္တာကုမ္ပဏီမှ တာဝန်ယူဆောင်ရွက်လျက်ရှိသည့် ကန်ပက်လက်မြို့နယ် ပြည်သူ့ဆေးရုံ ဆေးသိုလှောင်ရုံ တည်ဆောက်မှု ၇၅ ရာခိုင်နှုန်း ပြီးစီးမှုကို တာဝန်ခံ အင်ဂျင်နီယာ ဦးဇော်ရဲထက်က ရှင်းလင်းတင်ပြသည်။

ထို့နောက် Asia Golden Bridge ကုမ္ပဏီမှ တည်ဆောက်လျက်ရှိသည့် ခွဲစိတ်ခန်းပါ ဆေးရုံတိုးချဲ့ဆောင် တည်ဆောက်မှုမှာ ၆၅ ရာခိုင်နှုန်း ပြီးစီးမှုကို တာဝန်ခံအင်ဂျင်နီယာ ဒေါ်ထွေးထွေးလှိုင်က ရှင်းလင်းတင်ပြရာ ခရိုင်စီမံခန့်ခွဲမှု ကော်မတီဥက္ကဋ္ဌ ဦးမောင်ထူးက ကိုဗစ်-၁၉ ရောဂါဖြစ်ပွားနေခြင်းကြောင့် ကျွမ်းကျင်လုပ်သား ရှားပါးမှု မဖြစ်စေရေး မြို့နယ်အဆင့် ဌာနဆိုင်ရာများနှင့် ပူးပေါင်းဆောင်ရွက်ရန်၊ စံချိန်စံညွှန်းနှင့်အညီ သတ်မှတ် ကာလအတွင်း အပြီးသတ်ဆောင်ရွက်ကြရန် မှာကြားခဲ့သည်။

ဆလိုင်းအောင်(ပြန်/ဆက်)