မုံရွာ ၄ ဇွန်
၂၀၁၉-၂၀၂၀ ဘဏ္ဍာရေးနှစ် မိုးရာသီအတွင်း စစ်ကိုင်းတိုင်းဒေသကြီးအတွင်းမှ မြို့နယ်(၁၄)မြို့နယ်ရှိ သစ်တောဧရိယာအတွင်း စီးပွားရေးစိုက်ခင်း အမျိုးအစားဖြစ်သည့် ကျွန်းနှင့်ပျဉ်းကတိုး စိုက်ခင်း ဧက(၂၈၅၀) ကို စိုက်ပျိုးသွားမည်ဖြစ်ကြောင်း စစ်ကိုင်းတိုင်းဒေသကြီး သစ်တောဦးစီးဌာနမှ သိရသည်။
“ သစ်တောတွေပြန်လည်စိမ်းလန်းစေဖို့ အခုဘဏ္ဍာရေးနှစ်မှာလည်း ဧက(၂၈၀၀)ကျော်ကို မြို့နယ် (၁၄)မြို့နယ်က သစ်တောဧရိယာအတွင်းမှာ ပြန်လည်စိုက်ပျိုးသွားမှာဖြစ်ပါတယ်၊ အခုပျိုးပင်တွေ စုဆောင်း ထားပြီးပြီ၊ စိုက်ပျိုးဖို့အတွက် ကျင်းတူးတာတွေ၊ မြေဆွေးထည့်တာတွေလုပ်နေတယ်၊ မိုးကျတာနဲ့ စတင်စိုက်ပျိုးဖို့ အသင့်ပြင်ဆင်ထားပြီးပါပြီ ” ဟု စစ်ကိုင်းတိုင်းဒေသကြီး သစ်တောဦးစီးဌာနမှ လက်ထောက် ညွှန်ကြားရေးမှူး ဒေါ်ကျော့ကျော့အောင် က ပြောသည်။
စစ်ကိုင်းတိုင်းဒေသကြီး သစ်တောဦးစီးဌာနအနေဖြင့် ၂၀၁၉-၂၀၂၀ ဘဏ္ဍာနှစ်တွင် စီးပွားရေးစိုက်ခင်း များတွင် တန်ဘိုးမြင့် သစ်အမျိုးအစားများဖြစ်သော ကျွန်းစိုက်ခင်း(၂၅၅၀)ဧကနှင့် ပျဉ်းကတိုးစိုက်ခင်း ဧက(၃၀၀)ကို မိုးရာသီကာလအတွင်း စိုက်ပျိုးသွားမည်ဖြစ်ကြောင်း သိရသည်။
ဝင်းဦး(ဇေယျာတိုင်း)
