ကလေးဝ ၁၇ ဇွန်
စစ်ကိုင်းတိုင်းဒေသကြီး ကိုင်းကျေးရွာအုပ်စု ဇီးဒေါင့်ကျေးရွာတွင် ချင်းတွင်းမြစ်ရေတိုက်စားမှုကြောင့် မြစ်ကမ်းပြိုကျ၍ နေအိမ်တစ်လုံး ယနေ့နံနက် ၁၀ နာရီခွဲက ပြောင်းရွှေ့ခဲ့ရသည်။
ချင်းတွင်းမြစ်ရေသည် ကလေးဝမြို့၏ စိုးရိမ်ရေအမှတ်မှာ ၁၅၅၀ စင်တီမီတာဖြစ်ပြီး ကလေးဝမြို့တွင် မိုးရွာသွန်းမှု မရှိသော်လည်း ယခုအခါ ချင်းတွင်းမြစ်ရေသည် ၁၃၁၁ စင်တီမီတာသို့ ရောက်ရှိနေ၍ ချင်းတွင်းမြစ်ရေ တိုက်စားမှုကြောင့် ဇီးဒေါင့်ကျေးရွာနေ ဦးပေါစံ၏ နေအိမ်အနီး မြစ်ကမ်းပြိုကျမှု နံနက် ၈ နာရီခွဲက စတင်ဖြစ်ပေါ်ခဲ့ပြီး နေအိမ်နှင့်နီးကပ်လာသဖြင့် နံနက် ၁၀ နာရီခွဲ၌ ဦးပေါစံ၏ ၃ ပင် ပတ်လည် သွပ်မိုး၊ ကပ်ကာ နေအိမ်အား မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်မီးသတ်ဦးစီးဌာနမှ တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များ၊ ကျေးရွာပြည်သူများ ပူးပေါင်း၍ ပြောင်းရွှေ့ပေးခဲ့ကြောင်း သိရသည်။
သက်ဟန်(ကလေးဝ)
