မန္တလေး ၁၈ ဇူလိုင်
မန္တလေးမြို့လယ်ကောင်ရှိ ယာဉ်ကြောကျပ်တည်းမှု အများဆုံးဖြစ်သည့် ၆၉ လမ်းမကြီးအား ၂၀၁၉-၂၀၂၀ ဘတ်ဂျက်အတွင်းမှာ လမ်းချဲ့ခြင်းကို အပြီးဆောင်ရွက်သွားမည်ဖြစ်ကြောင်း မန္တလေးမြို့တော်စည်ပင် သာဘာရေးကော်မတီဝင် ဉီးကျော်ဇောအောင်က ပြောသည်။
မန္တလေးမြို့ ၊ မဟာအောင်မြေမြို့နယ်အတွင်းရှိ ၆၉ လမ်းသည် မန္တလေးမြို့၏ အဓိက လမ်းမကြီးဖြစ်သလို ၊ မန္တလေးတက္ကသိုလ်နှင့် ဗောဓိကုန်းဘုရားဝန်း၏ အရှေ့ဘက်တွင်တည်ရှိသည်။ ၊ အဆိုပါလမ်းမကြီးသည် ကျောင်းသားကျောင်းသူများ ၊ နေ့စဉ်သွားလာသူများဖြင့် ယာဉ်ကြောကျပ်တည်း မှုများ မကြာခဏ ဖြစ်ပေါ်လျက်ရှိသည်။
“၆၉ လမ်း မဟာအောင်မြေမြို့နယ် ၃၅ လမ်းကနေ သိပ္ပံလမ်းအထိ အရှည်ရှိတယ် မြို့ရဲ့ အလယ်ကောင်လည်းဖြစ်နေတယ် မြို့ရဲ့ ၆၉ လမ်းက မန္တလေးတက္ကသိုလ်ရဲ့ အဆောင်တွေ ၊ တကယ်ကို စည်ကားတဲ့နေရာဖြစ်တယ်။ယာဉ်ကြောကျယ်ဝန်းစေဖို့ နိုင်လွန်လမ်း ပရီကပ်မြောင်း မီးတိုင်တွေက အစ လုပ်ဖို့ရှိပါတယ်။ဒီလမ်းထဲမှာ ကျူးထားတဲ့မြေတွေရှိတယ် အဲဒါတွေကို ပြည်သူလူထု စိတ်အနှောက်အယှက်မဖြစ်အောင် အတတ်နိုင်ဆုံး ဆောင်ရွက်သွားမှာပါ” ဟု မန္တလေးမြို့တော် စည်ပင်သာယာရေး ကော်မတီဝင် ဉီးကျော်ဇောအောင်က ပြောသည်။
ယခုအခါ အဆိုပါလမ်းမကြီး ကျယ်ဝန်းစေရန်အတွက် ဗောဓိရိပ်သာမှ အကျယ် ၅ ပေ နောက်ဆုတ်ပေးခြင်း ၊ ၆၉ လမ်း ၄၁ လမ်းထောင့်တွင် မီးပွိုင့်တပ်ဆင်ရန် မြေ ၃၂ ပေ ၊ ၁၅ ပေ နောက်ဆုတ်ပေးခြင်းများ ဆောင်ရွက်ပေးသဖြင့် လမ်းချဲ့ထွင်ခြင်းလုပ်ငန်းများ စတင် ဆောင်ရွက်နေပြီဖြစ်ကြောင်း သိရသည်။
“အဓိကက ၆၉ လမ်းမှာ အရှည်ဆုံးဖြစ်တဲ့ မဟာဗောဓိရိပ်သာဟာ ပေ ၁၆၀၀ ကျော်(တောင်မြောက်) ရှည်လျားတယ်။ အကျယ်ပိုရအောင် ၅ ပေနောက်ဆုတ်ပေးတယ် ။ ၆၉ လမ်း ၄၁ လမ်းထောင့် မကြာခင် မီးပွိုင့်လုပ်တော့မှာပါ အဲနေရာက အမြဲတမ်းယာဉ်ကြော ကြပ်တည်းတယ် မီးပွိုင့်တပ်ဆင်ဖို့ ဗောဓိရိပ်သာက ၁၅ ပေ၊ ၃၂ ပေ ကိုလည်းပေးပါတယ်။ အခုလို ကူညီဆောင်ရွက်ပေးတဲ့အတွက် ဗောဓိရိပ်သာဂေါပကအဖွဲ့ကိုလည်း ကျေးဇူးတင်ပါတယ်’ ဟု ဉီးကျော်ဇောအောင်က ဆိုသည်။
၆၉ လမ်းမကြီးအား လမ်းချဲ့ခြင်းလုပ်ငန်းကို စတင်ဆောင်ရွက်နေပြီဖြစ်ပြီး ၂၀၁၉-၂၀၂၀ ဘတ်ဂျက်အတွင်းမှာ လမ်းချဲ့ခြင်းလုပ်ငန်းအပြီး ဆောင်ရွက်သွားမည်ဖြစ်ကြောင်း သိရသည်။
မေသက်ထား
