ထန်းတပင် ၂၅ ဇူလိုင်
ရန်ကုန်မြောက်ပိုင်းခရိုင်၊ ထန်းတပင်မြို့နယ်အတွင်းရှိ ရပ်ကွက်၊ ကျေးရွာအုပ်စု(၅၉)အုပ်စုရှိ ရပ်ကွက်/ ကျေးရွာအုပ်စု ရွေးကောက်ပွဲကော်မရှင်အဖွဲ့ခွဲရုံးများတွင် မဲဆန္ဒရှင်စာရင်းများကို ဇူလိုင် ၂၅ ရက် နံနက်ပိုင်းမှ စတင်၍ ပထမအကြိမ် ကပ်ထားကြေညာခဲ့ရာ မြို့နယ်အတွင်း ဆန္ဒမဲပေးပိုင်ခွင့်ရှိ သူဦးရေ(၁၂၅၂၂၄) ဦး ရှိကြောင်း မြို့နယ်ရွေးကောက်ပွဲကော်မရှင်အဖွဲ့ခွဲမှ သိရသည်။
၂၀၂၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲအောင်မြင်စွာ ကျင်းပပြုလုပ်နိုင်ရေးအတွက် မဲဆန္ဒရှင်စာရင်းများကို ဇူလိုင် ၂၅ ရက်မှ သြဂုတ် ၇ ရက်အထိ (၁၄)ရက်တာ ပထမအကြိမ်အဖြစ် ရပ်ကွက်/ကျေးရွာအုပ်စု ရွေးကောက်ပွဲကော်မရှင်အဖွဲ့ခွဲရုံးများတွင် ကပ်ထားကြေညာမည်ဖြစ်ပြီး မဲဆန္ဒရှင် စာရင်းကြေညာထားရှိမှုအခြေအနေများကို ဇူလိုင် ၂၅ ရက် နံနက်ပိုင်းမှစတင်ကာ မြို့နယ် ရွေးကောက်ပွဲ ကော်မရှင်အဖွဲ့ခွဲဥက္ကဋ္ဌ ဦးစိုးတင့်နှင့် မြို့နယ်ရွေးကောက်ပွဲ ကော်မရှင်အဖွဲ့ဝင်များက သွားရောက်ကာ လိုက်လံကြည့်ရှုစစ်ဆေးဆောင်ရွက်လျက်ရှိကြောင်း သိရသည်။
“မဲစာရင်းမှာ မိမိအမည်မပါဘူးဆိုရင် ပုံစံ(၃)ဖြင့် လျှောက်ထားနိုင်ပါတယ်။ နောက်ပြီး အချက်အလက်တွေ မမှန်ကန်ဘူးဆိုရင်လည်း ပုံစံ(၄-ဂ)နဲ့လျှောက်ထားနိုင်ပါတယ်။ ကွယ်လွန်သွားတဲ့သူတွေနဲ့ မဲပေးပိုင်ခွင့် မရှိတဲ့သူတွေ ပါဝင်နေမယ်ဆိုရင်လည်း အထောက်အထားနဲ့အတူ ပုံစံ(၄)ဖြင့် ကန့်ကွက်နိုင်ပါတယ်။ ပုံစံတွေ ကိုလည်း မဲဆန္ဒစာရင်းကပ်ထားတဲ့နေရာတွေမှာ (အခမဲ့) တောင်းယူနိုင်ပါတယ်”ဟု မြို့နယ်ရွေးကောက်ပွဲ ကော်မရှင်အဖွဲ့ခွဲဥက္ကဋ္ဌ ဦးစိုးတင့်က ရှင်းပြသည်။
ထန်းတပင်မြို့နယ်အတွင်း ရပ်ကွက်ကျေးရွာအုပ်စု(၅၉)အုပ်စုတို့တွင် မဲရုံပေါင်း(၁၁၆)ရုံ ထားရှိသွားမည် ဖြစ်ပြီး ပထမအကြိမ်မြောက်မဲဆန္ဒရှင် စာရင်းကပ်ထားကြေညာရာတွင် မြို့နယ်အတွင်း ဆန္ဒမဲပေးပိုင်ခွင့်ရှိသူ ကျား(၅၉၁၅၆)ဦး၊ မ(၆၆၀၆၈)ဦး စုစုပေါင်း(၁၂၅၂၂၄)ဦးရှိကြောင်း သိရသည်။
ဇင်မင်းထိုက်(ပြန်/ဆက်)
