ချင်းပြည်နယ် ၁၀ ဩဂုတ်
ဖလမ်းမြို့ မြို့ပြစီမံကိန်းဧရိယာအတွင်းရှိ မြေကွက်(၂၄၇)ကွက်ကို ဩဂုတ်လအတွင်း ပြည်သူများထံရောင်းချပေးမည်ဖြစ်ကြောင်း သိရှိရသည်။
ဩဂုတ်လ (၁၀) ရက် ညနေပိုင်းက ဖလမ်းမြို့ အိမ်မြေကွက်ချထားရေးကော်မတီ၊ စည်ပင်သာယာရေးကော်မတီနှင့် ရပ်ကွက်အုပ်ချုပ်ရေးမှူးများ ဆွေးနွေးညှိနှိုင်းပွဲတွင် ဖလမ်းမြို့ မြို့ပြစီမံကိန်းဧရိယာအတွင်းရှိ အိမ်မြေကွက် မူလအကွက်ချထားမှုအခြေအနေနှင့် မြေအတန်းအစားအလိုက် လျာထားအိမ်မြေကွက်(၂၄၇)ကွက်ကို ပြည်သူများထံ ချထားပေးနိုင်ရေး ဆွေးနွေးညှိနှိုင်းကြသည်။
မြေကွက်ပထမအဆင့်ကို ကျပ်သိန်း (၂၀)၊ ဒုတိယအဆင့် ကျပ် (၁၀) သိန်းနှင့် တတိယအဆင့် ကျပ် (၅) သိန်း သတ်မှတ်ထားကြောင်း၊ မြေကွက်ရောင်းချရာတွင် ပထမဦးစားပေးအဖြစ် ဖလမ်းမြို့ပေါ်ရှိ အိမ်ပိုင်မရှိသည့် အငြိမ်းစားသင်းအုပ်ဆရာများ၊ ဒုတိယဦးစားပေးအဖြစ် အိမ်ပိုင်မရှိသည့် အငြိမ်းစားဝန်ထမ်းများနှင့် တတိယ ဦးစားပေးအဖြစ် အိမ်ပိုင်မရှိသေးသူများကို မြေကွက်များ ချထားပေးရန် ဆွေးနွေးဆုံးဖြတ်ကြကြောင်း သိရှိရသည်။
မြေကွက်လျှောက်လွှာများကို ဩဂုတ်လ (၁၇) ရက်မှ စက်တင်ဘာလ (၄) ရက်အထိ မြို့နယ်သမဝါယမအသင်းစုလီမိတက် အစည်းအဝေးခန်းမတွင် နံနက် (၁၀)နာရီမှ ညနေ (၄) နာရီအထိ ရောင်းချပေးမှာဖြစ်ပြီး၊ စက်တင်ဘာလ (၇) ရက်တွင် မြေကွက်နေရာများကို မဲဖောက်ပေးသွားမှာ ဖြစ်ကြောင်းသိရှိရသည်။
# MRTV
