ကိုးကန့်ကိုယ်ပိုင်အုပ်ချုပ်ခွင့်ရဒေသ၊ ချင်းရွှေဟော်မြို့တွင် မိုးအဆက်မပြတ် ရွာသွန်းမှုကြောင့် နမ့်တိန်ချောင်းရေသည် ဩဂုတ် ၁၇ ရက်မှ စတင်၍ တဖြည်းဖြည်းမြင့်တက်လာပြီး ဩဂုတ် ၁၉ ရက်တွင် ချင်းရွှေဟော်မြို့ အနိမ့်ပိုင်းရပ်ကွက်အတွင်း ချောင်းရေဝင်ရောက်လာမှုကြောင့် စိုက်ပျိုးရေးဝန်ထမ်းအိမ်ရာမှ အိမ်ထောင်စု (၂)စု၊ သစ်တောရုံးဝန်ထမ်းအိမ်ရာမှ အိမ်ထောင်စု(၁)စု၊ ရပ်ကွက်(၃)ရှိ အိမ်ထောင်စု(၈)စု စုစုပေါင်း အိမ်ထောင်စု (၁၁)စု၊ လူဦးရေ(၂၇)ဉီးကို ရပ်ကွက်-၃ ရှိ စီတိုဂိုဒေါင်တွင် ယာယီနေရာချထားခြင်းလုပ်ငန်းများ ဆောင်ရွက်ပေးခြင်း၊ စားသောက်ရေး အဆင်ပြေစေရန်အတွက် ဆန်၊ ဆီ၊ ဆား နှင့် ရေသန့်များ ထောက်ပံ့ ပေးခြင်း၊ ကိုဗစ်-၁၉ ရောဂါကြိုတင် ကာကွယ်ရေး အတွက် နှာခေါင်းစည်း(Masks)များ ဖြန့်ဝေပေးခြင်းများကို မြို့အုပ်ချုပ်ရေးမှူးနှင့် သက်ဆိုင်ရာတာဝန်ရှိသူများက ဆောင်ရွက်ပေးခဲ့ကြောင်း သိရသည်။
ထိုသို့ နမ့်တိန်ချောင်းရေ မြင့်တက်လာမှုကြောင့် ချင်းရွှေဟော်မြို့ အနောက်ဖက် အနိမ့်ပိုင်းရှိ ပြည်သူ့ဆေးရုံဝင်း အတွင်း၌ ရေဝင်ရောက်မှု မဖြစ်ပေါ်စေရေးအတွက်လည်း ကြိုတင်ကာကွယ်ရေးလုပ်ငန်းများကို ဩဂုတ် ၁၉ ရက်၊ ညနေ ၅ နာရီက ဆောင်ရွက်ခဲ့ကြရာ ချင်းရွှေဟော်မြို့၊ အုပ်ချုပ်ရေးမှူး ဉီးသက်ဉီးပိုင် ဉီးဆောင်ပြီး နယ်မြေခံတပ်ရင်း၊ တပ်ဖွဲ့ဝင်များ၊ မြန်မာနိုင်ငံရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များနှင့် ဌာနဆိုင်ရာဝန်ထမ်း များ ပူးပေါင်းပြီး ပြည်သူ့ဆေးရုံ၏ ရေဝင်ရောက်နိုင်သည့် အနောက်ဖက်ခြမ်းတွင် ရေကာတာအဖြစ် သဲအိတ် များဖြင့် ရေထိန်းနံရံများပြုလုပ်ခြင်း၊ အရေးပေါ်လှေများ ပြင်ဆင်ထားခြင်းတို့ကို ဆောင်ရွက်ခဲ့ကြကြောင်း သိရသည်။ အဆိုပါ နမ့်တိန်ချောင်းရေသည် ၂၀၁၂ ခုနှစ်တွင် ရေကြီး/ရေလျှံမှုဖြစ်ပေါ်ခဲ့ပြီးနောက် (၈)နှစ်အကြာ ယခုနှစ်တွင် မိုးများအဆက်မပြတ် ရွာသွန်းမှုကြောင့် ရေကြီး/ရေလျှံမှု ထပ်မံဖြစ်ပွားခဲ့ခြင်း ဖြစ်သည်။
ဇင်ဇင်(ပြန်/ဆက်)
