မိတ္ထီလာမြို့နယ်၌ CERP အစီအစဉ်ဖြင့် လက်ရက်ကန်းပညာသင်တန်းကို ဒုတိယအကြိမ်မြောက် အခမဲ့ ဖွင့်လှစ်သင်ကြား

မိတ္ထီလာ ၂၂ ဩဂုတ်

မိတ္ထီလာမြို့နယ် ရက်ကန်းနှင့်အသက်မွေးပညာသင်တန်းကျောင်းမှ ကျေးလက်နေပြည်သူများ အလုပ်အကိုင် အခွင့်အလမ်းရရှိရန်နှင့် ပုဂ္ဂလိကလုပ်ငန်းများ ထူထောင်နိုင်ရန်အတွက် CERP အစီအစဉ်ဖြင့် လက်ရက်ကန်းပညာသင်တန်းကို ဒုတိယအကြိမ်မြောက် အခမဲ့ဖွင့်လှစ်သင်ကြားပေးကြောင်း သိရသည်။

“မိတ္ထီလာမြို့နယ် ရက်ကန်းနှင့် အသက်မွေးပညာသင်တန်းကျောင်းမှ ကျေးလက်နေပြည်သူများ အလုပ်အကိုင် အခွင့်အလမ်းရရှိရန်နှင့် ပုဂ္ဂလိကလုပ်ငန်းများ ထူထောင်နိုင်ရန် ရည်ရွယ်၍ အသက်မွေးဝမ်း ကျောင်း သင်တန်းများကို COVID-19 Economic Relief Plan(CERP) အစီအစဉ်အရ ဖွင့်လှစ်သင်ကြား ပေးလျက်ရှိရာ ယခုဖွင့်လှစ်သော လက်ရက်ကန်းသင်တန်းကို ဒုတိယအကြိမ်မြောက်အဖြစ် သင်တန်းသား (၁၀) ဦးကို သြဂုတ်လ ၁၅ ရက်နေ့မှ စက်တင်ဘာလ ၇ ရက်နေ့အထိ နေ့စဉ်နံနက် ၈ နာရီမှ ညနေ ၄ နာရီအချိန်အထိ ခြုံပုဝါနှင့် မာဖလာ ရက်လုပ်နည်းပညာများကို ကျန်းမာရေးနှင့် အားကစားဝန်ကြီးဌာန၏ လမ်းညွှန်ချက်နှင့်အညီ စာတွေ့လက်တွေ့ အခမဲ့ ဖွင့်လှစ်သင်ကြားလျက်ရှိကြောင်း” ကျောင်းအုပ် ဆရာကြီး ဦးသာဝက ပြောကြားခဲ့သည်။

အဆိုပါ လက်ရက်ကန်းပညာသင်တန်းကို အောင်ဆန်းမြို့သစ်ရပ်ကွက်၊ လက်ပံ့ခေါင်းကျေးရွာ၊ ကြာအင်းကျေးရွာ၊ အိုင့်ကျေးရွာ၊ ဆူးဖြူကွက်ကျေးရွာ၊ ကံကြီးကုန်းကျေးရွာတို့မှ လာရောက်၍ တက်ရောက်ခဲ့ကြောင်း သိရသည်။

သိန်းမြင့်ကျော်(မိတ္ထီလာ)