မန္တလေး ၂၅ သြဂုတ်
မန္တလေးမြို့ သီရိမာလာဈေးတွင် အေးခဲကြက်သားများကို ရောင်းချနေသည့် စျေးဆိုင် ၂ ဆိုင်ကို စျေးရောင်းချခွင့် တစ်လပိတ်သိမ်းအရေးယူမည်ဖြစ်ကြောင်း မန္တလေးမြို့တော် စည်ပင်သာယာရေးကော်မတီမှ သိရသည်။
တားမြစ်ထားသော အေးခဲကြက်သားများရောင်းချခဲ့သော သီရိမာလာဈေးမှ ဆိုင်နှစ်ဆိုင်ကို ဩဂုတ် ၂၃ ရက်က ရောင်းချခွင့်တစ်လ ပိတ်သိမ်းအရေးယူရန် စီစဉ်နေကြောင်းလည်း သိရသည်။
“သြဂုတ် ၂၂ ရက်က အေးခဲကြက်သား ၁၄၄ ထုပ် (ပိဿာ ၁၈၀) ၊ သြဂုတ် ၂၃ ရက်က ၅၁ထုပ် (၆၃) ပိဿာ၊ အေးခဲကြက်အသည်းအမြစ် အထုပ် ၃၀ ၊ ပိဿာ (၂၀)တွေ့ခဲ့တာ ဖြစ်ပါတယ်။ အခုတော့ အေးရိပ်ငြိမ်မှာ မီးရှို့ ဖျက်ဆီးလိုက်ပါပြီ။ အခုအရေးယူဖို့ လုပ်နေပါတယ်” ဟု မန္တလေးမြို့တော်စည်ပင်သာယာ ရေးကော်မတီဝင် ဦးကျော်ဆန်းမြင့်က ပြောသည်။
အေးခဲကြက်သားများ ရောင်းချနေသည်ကို ယခုလ ၂၃ ရက်က စစ်ဆေးတွေ့ရှိပြီး ဖမ်းဆီးရမိသောအေးခဲကြက်သား များကို အေးရိပ်ငြိမ်တွင် မီးရှို့ဖျက်ဆီးခဲ့ရကြောင်း သိရသည်။ မန္တလေးမြို့တော် စည်ပင်သာယာရေးကော်မတီပိုင် ဈေးများတွင် စားသုံးသူများ ကျန်းမာရေးမထိခိုက်စေရန် အေးခဲကြက်သားများ ရောင်းချခြင်းကို ကြပ်မတ်လျက်ရှိကြောင်း သိရသည်။
မေသက်ထား
