လှိုင်းဘွဲ ၂၇ ဩဂုတ်
ကရင်ပြည်နယ်၊ လှိုင်းဘွဲမြို့နယ်တွင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ကျေးလက်ဒေသ ဖွံ့ဖြိုးတိုးတက်ရေးဦးစီးဌာနမှ ကမ္ဘာ့ဘဏ်အကူအညီဖြင့် အကောင်အထည်ဖော် ဆောင်ရွက်နေသော လူထုဗဟိုပြုစီမံကိန်း (ဒုတိယနှစ်စက်ဝန်း)တွင် စီမံကိန်းလုပ်ငန်းခွဲများအား သက်ဆိုင်ရာဌာနသို့ လွှဲပြောင်း အပ်နှံခြင်း အခမ်းအနားကို ယနေ့နံနက်ပိုင်းက မြို့နယ်အထွေထွေအုပ်ချုပ်ရေးဦးစီးဌာန အစည်းအဝေး ခန်းမ၌ ကျင်းပခဲ့သည်။
အခမ်းအနားတွင် အထွေအထွေအုပ်ချုပ်ရေးဦးစီးဌာန မြို့နယ်အုပ်ချုပ်ရေးမှူး ဦးမင်းသိန်းမှ အဖွင့်အမှာစကား ပြောကြားပြီး ကျေးလက်ဒေသ ဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဒေါ်အေးမြနန္ဒာထွန်းက ဒုတိယနှစ်စက်ဝန်းစီမံကိန်းတွင် ဆောင်ရွက်ခဲ့သော လုပ်ငန်းများအကြောင်း ရှင်းလင်းတင်ပြခဲ့သည်။ ထို့နောက် မြို့နယ်အုပ်ချုပ်ရေးမှူး ဦးမင်းသိန်းက ဒုတိယနှစ်စက်ဝန်းတွင် အကောင်အထည်ဖော် ဆောင်ရွက်ခဲ့သော လုပ်ငန်းများအား သက်ဆိုင်ရာဌာနအသီးသီးသို့ လွှဲပြောင်းပေးအပ်ခဲ့သည်။
အဆိုပါ လူထုဗဟိုပြုစီမံကိန်း(ဒုတိယနှစ်စက်ဝန်း)တွင် ကျေးရွာအုပ်စု (၇၀)အုပ်စု ကျေးရွာ(၂၀၆)ရွာမှ ရန်ပုံငွေ ကျပ်သန်း (၄၃၃၀)ဖြင့် လမ်းလုပ်ငန်း (၁၃၀)၊ တံတားလုပ်ငန်း (၁၃)ခု၊ ကျေးလက်ရေရှိရေး (၇)ခု၊ ပညာရေးအဆောက်အဦ (၅၅)ခု၊ ကျန်းမာရေးအဆောက်အဦ (၂)ခု၊ ကျေးလက်မီးလင်းရေး (၂၁)ခု၊ ကျေးရွာ အဆောက်အဦ(၄) ခုနှင့် အခြားဖွံ့ဖြိုးရေးလုပ်ငန်း (၄)ခု စုစုပေါင်း လုပ်ငန်း(၂၃၆)ခု အကောင်အထည်ဖော်ဆောင်ရွက်ခဲ့ရာ လုပ်ငန်းများ ၁၀၀ ရာခိုင်နှုန်းပြီးစီး၍ ယခုလိုလွှဲပြောင်းပေးအပ်ခြင်းဖြစ်ကြောင်း သိရသည်။
ခင်စန်းမြင့်(ပြန်/ဆက်)
