ဒုတိယဝန်ကြီး ဒေါက်တာရဲမြင့်ဆွေ ကိုရီးယားသမ္မတနိုင်ငံ၊ Ministry of Environment ၏ဒုတိယဝန်ကြီး Mr. Park Chunkyoo နှင့်အဖွဲ့အား တွေ့ဆုံဆွေးနွေး

နေပြည်တော် ၁၁ ဇွန်

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန ဒုတိယဝန်ကြီး ဒေါက်တာရဲမြင့်ဆွေသည် ကိုရီးယားသမ္မတနိုင်ငံ၊ Ministry of Environment ၏ဒုတိယဝန်ကြီး Dr. Park Chunkyoo နှင့်အဖွဲ့အား ယနေ့ ညနေ ၄ နာရီတွင် နေပြည်တော်ရှိ ပြည်ထောင်စု ဝန်ကြီးဧည့်ခန်းမ၌ တွေ့ဆုံဆွေးနွေးသည်။

ထို့သို့ ဆွေးနွေးရာတွင် ကိုရီးယား-မဲခေါင် ဇီဝမျိုးစုံမျိုးကွဲစင်တာအားမြန်မာနိုင်ငံတွင် တည်ထောင်နိုင်ရေးအတွက် ဆောင်ရွက်ရမည့် လုပ်ငန်းစဉ်များ၊ ဇီဝမျိုးစုံမျိုးကွဲဆိုင်ရာ သုတေသနနှင့် အသုံးဝင်ဇီဝအရင်းအမြစ်များဆိုင်ရာ သုတေသနလုပ်ငန်း ပူးပေါင်းဆောင်ရွက်နိုင်မှုနှင့် ဆက်လက်ဆောင်ရွက်မည့်အစီအမံများ၊ ၂၀၁၉ ခုနှစ်၊ နိုဝင်ဘာလအတွင်း ကျင်းပမည့် အာဆီယံ-ကိုရီးယားထိပ်သီးညီလာခံ၌ ကိုရီးယား-မဲခေါင် ဇီဝမျိုးစုံမျိုးကွဲစင်တာတည်ထောင်ရေးအား အစီအစဉ်တစ်ရပ်အနေဖြင့် ထည့်သွင်းနိုင်ရေးအတွက်ဆောင်ရွက်ရမည့် ကိစ္စရပ်များနှင့် စပ်လျဉ်း၍ အမြင်ခြင်းဖလှယ်ဆွေးနွေးကြသည်။

မြန်မာနိုင်ငံတွင် ကိုရီးယား-မဲခေါင် ဇီဝမျိုးစုံမျိုးကွဲစင်တာ တည်ထောင်ခြင်းအားဖြင့် မြန်မာနိုင်ငံအပါအဝင်မဲခေါင်ဒေသနိုင်ငံများရှိ ဇီဝမျိုးစုံမျိုးကွဲထိန်းသိမ်းရေး ကဏ္ဍပူးပေါင်း ဆောင်ရွက်မှုကို ပိုမိုမြှင့်တင်နိုင်မည်ဖြစ်ပြီး၊ အသုံးဝင်ဇီဝအရင်းအမြစ်များနှင့် မျိုးရိုးဗီဇများအား ဖော်ထုတ်ထိန်းသိမ်းနိုင်မည်ဖြစ်သဖြင့် ဇီဝမျိုးစုံမျိုးကွဲတန်ဖိုးများအား စီးပွားရေးတန်ဖိုးများအဖြစ်ပြောင်းလဲနိုင်သည့် အကျိုးကျေးဇူးများရရှိနိုင်မည် ဖြစ်ကြောင်းသိရသည်။

(သတင်းစဉ်)