နေပြည်တော် ဇူလိုင် ၁၉
ဆောက်လုပ်ရေးဝန်ကြီးဌာန ဒုတိယဝန်ကြီး ဦးဝင်းဖေသည် ယမန်နေ့ နံနက်ပိုင်းတွင် ကျိုင်းတုံ- ပန်လီ- မိုင်းခုတ်- မိုင်းဆတ်လမ်းကို လမ်းတစ်လျှောက် ကြည့်ရှုစစ်ဆေးသည်။
ထို့နောက် မိုင် ၂၄ နှင့် ၂၅ ကြား အာမောဒေရွာ လမ်းစခန်းရှင်းလင်းဆောင်၌ တာဝန်ရှိသူများက လမ်းလုပ်ငန်းဆိုင်ရာများ ရှင်းလင်းတင်ပြရာ ဒုတိယဝန်ကြီးက လာမည့်ဘဏ္ဍာရေးနှစ်တွင် ဆောင်ရွက်မည့် ၃ ဒသမ ၆၆ မီတာအကျယ် ကတ္တရာလမ်းခင်းခြင်း၊ Box Culvert ဆောင်ရွက်မည့်အရေအတွက်၊ ကျောက်စီရေမြောင်း ပြုလုပ်မည့်နေရာ၊ အမာခံလမ်း ဆောင်ရွက်ရမည့်နေရာ၊ အမာခံလမ်းပုခုံးဆောင်ရွက်ရမည့် နေရာ၊ လမ်းညွှန်ဆိုင်းဘုတ် အမှတ်အသားများစိုက်ထူရမည့်နေရာနှင့် သာမာန်ပြင်ဆင် ထိန်းသိမ်းခြင်းလုပ်ငန်းများအတွက် သီးခြားစီမံချက်များရေးဆွဲ၍ အကောင်အထည်ဖော် ဆောင်ရွက်ရမည်ဖြစ်ကြောင်း မှာကြားသည်။
မွန်းလွဲပိုင်းတွင် ဒုတိယဝန်ကြီးနှင့်အဖွဲ့သည် မိုင်းဆတ်မြို့တွင် မြို့ပြနှင့် အိမ်ရာ ဖွံ့ဖြိုးရေးဦးစီးဌာနမှ ဆောင်ရွက်လျက်ရှိသည့် နိုင်ငံ့ဝန်ထမ်းအိမ်ရာ (၄)ခန်းတွဲ၊ (၄)ထပ် ဆောက်လုပ်နေမှုကို ကွင်းဆင်းကြည့်ရှုစစ်ဆေးပြီး ဒုတိယဝန်ကြီးက ဆောက်လုပ်ပြီး ဝန်ထမ်းအိမ်ရာများတွင် ရေ၊ မီး၊ မိလ္လာ၊ အမှိုက်စွန့်ပစ်စနစ်များ အဆင်ပြေစေရေး အိမ်ရာစီမံအုပ်ချုပ်ရေးကော်မတီမှ စီစဉ် ဆောင်ရွက်ပေးရန် မှာကြားသည်။
ဆောက်လုပ်ရေးဝန်ကြီးဌာန၊ မြို့ပြနှင့်အိမ်ရာဖွံ့ဖြိုးရေးဦးစီးဌာန အနေဖြင့် ရှမ်းပြည် နယ်အတွင်း နိုင်ငံ့ဝန်ထမ်းများနေထိုင်နိုင်ရန်အတွက် ၂၀၂၁-၂၀၂၂ ဘဏ္ဍာရေးနှစ်အတွင်း ဆောက်လုပ်ပြီး ဝန်ထမ်းအိမ်ရာ(၇၆)လုံး၊ အိမ်ခန်းပေါင်း(၁၁၉၀)၊ ၂၀၂၂-၂၀၂၃ ဘဏ္ဍာရေး နှစ်အတွင်း ဆောက်လုပ်မည့် ဝန်ထမ်းအိမ်ရာ(၁၀)လုံး၊ အိမ်ခန်းပေါင်း(၁၅၆)ခန်း လျာထား ဆောင်ရွက်လျက်ရှိကြောင်း သိရသည်။
(သတင်းစဉ်)
