လားရှိုး ၆ ဇွန်
လားရှိုးမြို့နယ် အီနိုင်းကျေးရွာအုပ်စုရှိ မန်ပြိန်းကျေးရွာမှ ကျေးရွာနေပြည်သူများ လက်နက်ကိုင်အဖွဲ့တစ်ခုက လာရောက် ခြိမ်းခြောက်မှုကြောင့် စိုးရိမ်စိတ်ဖြင့် လားရှိုးမြို့ အမှတ်(၉)ရပ်ကွက် နယ်မြေ (၃)ရှိ လားရှိုးအနောက်ပိုင်း ကချင်နှစ်ခြင်းအသင်းတော်သို့ ဇွန်လ ၅ ရက်က တိမ်းရှောင်လာကြောင်း သိရသည်။
ဇွန်လ(၆)ရက် နံနက်(၁၀)နာရီက တိမ်းရှောင်လာကြသူ တိုင်းရင်းသားပြည်သူများအား ခရိုင်ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနက အိမ်ထောင်စု(၄၆)စု၊ လူဦးရေ (၁၉၆)ဦး တို့အတွက် ကယ်ဆယ်ရေးပစ္စည်း(၁၀)မျိုး၊ ဆန်ဖိုးငွေတစ်ဦးလျှင် ငွေကျပ် ၂၁၀ဝ နှုန်းဖြင့် (၁၉၆)ဦးတို့အတွက် ငွေကျပ် ၄၁၁၆၀ဝ အားလည်းကောင်း၊ လားရှိုးမြို့နယ်စီမံခန့်ခွဲမှုကော်မတီက ဆန်(၅)အိတ်၊ အမှတ် (၆၂၆) ထောက်ပံ့ရေးတပ်ရင်းက ဆန်(၁)အိတ်၊ ဆီ(၅)ပိဿာ၊ ရှမ်းပြည်နယ်(မြောက်ပိုင်း ) သဘာဝ ဘေးဆိုင်ရာ စီမံခန့်ခွဲမှုကော်မတီက ငွေကျပ်(၁)သိန်း၊လားရှိုးမြို့ လူမှုကူညီရေးအသင်းများ၊ ပရဟိတ အသင်းများကလည်း ထမင်းထုပ်နှင့် ရေသန့်များကိုလှူဒါန်းခဲ့ကြောင်းသိရသည်။
စိုးရိမ်မှုကြောင့် တိမ်းရှောင်လာသူ တိုင်းရင်းသားပြည်သူများထဲ၌ မူလတန်းကျောင်းသား၊ ကျောင်းသူ (၂၅)ဦး၊အလယ်တန်းကျောင်းသား၊ကျောင်းသူ(၇)ဦးပါရှိခဲ့ပြီး မြို့နယ်စီမံခန့်ခွဲမှုကော်မတီမှ မြို့နယ်ပညာရေးမှူးရုံးနှင့်ပေါင်းစပ်ကာ ပညာဆက်လက်သင်ကြားနိုင်ရေး ဆောင်ရွက်ထားရှိပြီး ဖြစ်ကြောင်း သိရသည်။
ဟန်ဌေး(လားရှိုး)
