လွိုင်ကော်  ၃  ဇွန်    

တစ်မျိုးသားလုံး ကျန်းမာကြံ့ခိုင်ရေးအတွက် ကိုယ်လက်လှုပ်ရှား လူထုအားကစားပွဲများအား ဖော်ဆောင်လျက်ရှိရာ ကယားပြည်နယ်အစိုးရအဖွဲ့မှ ကြီးမှူး၍ အားကစားနှင့်ကာယပညာဦးစီးဌာနမှ ကျင်းပပြုလုပ် သည့် ကမ္ဘာ့စက်ဘီးစီးနေ့ World Bicycle Day အထိမ်းအမှတ်အဖြစ် လူထုစုပေါင်း စက်ဘီးစီးပွဲ အခမ်းအနားကို ဇွန် ၃ ရက် နံနက်(၇) နာရီက ကယားပြည်နယ်၊ လွိုင်ကော်မြို့၊ မင်းစုရပ်ကွက်ရှိ၊ မြို့လယ် နာရီစင်၌ စုရပ်ထားကျင်းပရာ ကယားပြည်နယ်အစိုးရအဖွဲ့ ဝန်ကြီးချုပ် ဦးအယ်လ်ဖောင်းရှို၊ ပြည်နယ် အစိုးရအဖွဲ့ အတွင်းရေးမှူး ဦးညီညီမင်း၊ ပြည်နယ်အားကစားနှင့် ကာယပညာဦးစီးဌာန ပြည်နယ်ဦးစီးမှူး၊ လွိုင်ကော်မြို့နယ်မှ စက်ဘီးဝါသနာရှင် (၁၀ဝ) ဦးခန့်နှင့် ဒီးမော့ဆိုမြို့နယ်မှ စက်ဘီးဝါသနာရှင် (၃၀) ဦးခန့်တို့က ပါဝင်စီးနှင်းကြသည်။

အခမ်းအနားအား စည်ပင်သာယာရေးနှင့် လူမှုရေးဝန်ကြီးက သေနတ်ပစ်ဖောက်၍ တာလွှတ်ခဲ့ပြီး ပြည်နယ်ဝန်ကြီးချုပ် ဦးဆောင်သည့် စက်ဘီးစီး ဝါသနာရှင် (၁၃၀)ဦးခန့်က လွိုင်ကော်မြို့လယ်ရှိ နာရီစင် မှ ကန္တရဝတီ လမ်းမကြီးအတိုင်း ထိုမှ ကယားဒေးကွင်းနှင့် အားကာသိပ္ပံ၊ ပညာရေးကောလိပ်ရှေ့၊ နာနတ်တော လမ်းဆုံ၊ ကားကြီးကွင်းရှေ့ဖြတ်လျက် ကန္တရဝတီ လမ်းမကြီးအတိုင်း နာရီစင် စုရပ်ထား ရာနေရာသို့ ပြန်လည် ပန်းဝင်ခဲ့ကြသည်။

အဆိုပါ လူထုစုပေါင်းစက်ဘီးစီးပွဲ အခမ်းအနားသို့ ကယားပြည်နယ်အစိုးရအဖွဲ့ ဝန်ကြီးချုပ် ဦးအယ်လ်ဖောင်းရှို၊ ပြည်နယ် တရားလွှတ်တော် တရားသူကြီးချုပ်၊ လမ်းပန်းဆက်သွယ်ရေးနှင့် လျှပ်စစ် ဝန်ကြီး၊ စည်ပင်သာယာရေးနှင့်လူမှုရေးဝန်ကြီး၊ သယံဇာတနှင့်သဘာဝပတ်ဝန်းကျင် ထိန်းသိမ်းရေး ဝန်ကြီး၊ ဗမာတိုင်းရင်းသားလူမျိုးရေးရာဝန်ကြီး၊ ပြည်နယ်ဥပဒေချုပ်၊ ပြည်နယ် စာရင်းစစ်ချုပ်၊ ပြည်နယ်အစိုးရအဖွဲ့ အတွင်းရေးမှူး၊ အားကစားနှင့် ကာယပညာဦးစီးဌာနမှ တာဝန် ရှိသူ များ၊ စက်ဘီးစီးဝါသနာရှင်များ ပါဝင်တက်ရောက်ကြကြောင်း သိရသည်။

ကိုစိုင်း (လွိုင်ကော်)