မိုးစပါးသီးနှံအောင် ရေ အပြည့်အဝ ဖြန့်ဝေပေးနိုင်ရေး ရေပေးမြောင်းများရှိ ပိတ်ဆို့နေသော ရေမှော်ပင်များအား စုပေါင်းဖယ်ရှားရှင်းလင်း

ပွင့်ဖြူ ၈ အောက်တိုဘာ

မကွေးတိုင်းဒေသကြီး၊ ပွင့်ဖြူမြို့နယ် ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနမှ မြို့နယ်အတွင်းရှိ မိုးစပါးသီးနှံ စိုက်ပျိုးတောင်သူများ စိုက်ပျိုးရေ အပြည့်အဝ ရရှိစေရေးအတွက် မဲဇလီရေလွှဲဆည်မှ ဆည်ရေများကို တောင်မုန်း မြောင်းမကြီးနှင့် မြောက်မုန်းမြောင်းမကြီးတို့မှ တစ်ဆင့် ဖြန့်ဝေဆောင်ရွက် ပေးလျက်ရှိရာ တောင်သူများ စိုက်ပျိုးရေ အဆင်ပြေစွာ ရယူသုံးစွဲနိုင်ရေးအတွက် အောက်တိုဘာ ၈ ရက်၊ ယနေ့နံနက် ၇ နာရီခွဲက ဆည်ရေလုပ်သား အဖွဲ့ခေါင်းဆောင် ဦးညွန့်ဝင်းနှင့်အဖွဲ့က တောင်မုန်းမြောင်းမကြီး ဆည်ရေသောက်ဧရိယာရှိ ရေလက်တံမြောင်း(၁၁)ရှိ ပိတ်ဆို့နေသော ရေမှော်ပင်များအား စုပေါင်းဖယ်ရှား ရှင်းလင်း ဆောင်ရွက်ပေးခဲ့ကြောင်း သိရသည်။

ပွင့်ဖြူမြို့နယ် ဆည်မြောင်းနှင့် ရေအသုံးချမှုစီမံခန့်ခွဲရေး ဦးစီးဌာန အနေဖြင့် မြို့နယ်အတွင်းရှိ ဒေသခံတောင်သူများ စိုက်ပျိုးရေနှင့် သီးနှံအောင်ရေ အပြည့်အဝ ရရှိစေရေးအတွက် မြို့နယ်ဦးစီးအရာရှိ ဦးရဲထွဋ်အောင်၏ ကြီးကြပ်မှုဖြင့် ဆည်ရေလုပ်သားများအဖွဲ့က ရေလက်တံမြောင်းများ ရေစီးရေလာ ကောင်းမွန်ရေး စဉ်ဆက်မပြတ် ကြပ်မတ်ဆောင်ရွက် ပေးလျက်ရှိကြောင်း သိရသည်။ ယနေ့နံနက်ပိုင်းက တောင်သူများ သီးနှံများစိုက်ပျိုးရာတွင် စိုက်ပျိုးရေ အဆင်ပြေစွာ ရယူသုံးစွဲနိုင်ရေးအတွက် ဆည်ရေလုပ်သား အဖွဲ့ခေါင်းဆောင် ဦးညွန့်ဝင်းနှင့် အဖွဲ့ဝင်များက တောင်မုန်းမြောင်းမကြီး ဆည်ရေသောက်ဧရိယာ ရေလက်တံမြောင်း (၁၁)ရှိ ပိတ်ဆို့နေသော ရေမှော်ပင်များနှင့် ရေလက်တံမြောင်းဘောင်တစ်လျှောက် ခြုံနွယ်ပိတ်ပေါင်းများကို တောင်သူအကျိုးပြု စုပေါင်းဖယ်ရှား ရှင်းလင်းဆောင်ရွက်ပေးခဲ့ကြောင်း သိရသည်။

ပွင့်ဖြူမြို့နယ်သည် မကွေးတိုင်းဒေသကြီးအတွင်းရှိ မြို့နယ်များတွင် နှစ်စဉ် ဆန်စပါးအများဆုံး စိုက်ပျိုး ထုတ်လုပ်နိုင်သည့် မြို့နယ်တစ်ခုဖြစ်ပြီး ယခုနှစ် မိုးစပါးစိုက်ပျိုးရာသီတွင်လည်း မိုးစပါးစိုက်ဧက ၇၁၀၈၇ ဧက လျာထား စိုက်ပျိုးဆောင်ရွက်ထားရှိကြောင်းနှင့် စိုက်ပျိုးရေဖူလုံစွာ ဖြန့်ဝေပေးနိုင်မှုကြောင့် တောင်သူများ စိုက်ပျိုးထားရှိသည့် မိုးစပါးများ အောင်မြင်ဖြစ်ထွန်းလျက်ရှိကြောင်း ပွင့်ဖြူမြို့နယ် စိုက်ပျိုးရေးဦးစီးဌာန မြို့နယ်ဦးစီးမှူး ဦးလှိုင်မြင့် ထံက သိရသည်။

ရဲဝင်းနိုင် (ပြန်/ဆက်)