နတ်မောက် စက်တင်ဘာ ၃
မကွေးတိုင်းဒေသကြီး ဝန်ကြီးချုပ်နှင့် မိုးစပါးစိုက်ပျိုးထုတ်လုပ်သည့် တောင်သူများ တွေ့ဆုံပွဲကို စက်တင်ဘာ ၃ ရက် နံနက်ပိုင်းက ပ/လက်ခုပ်ပင်ကျေးရွာအုပ်စု စရံအိုင့်ကျေးရွာ ကွင်းအမှတ်(၈၃၅) ယာယီခန်းမဆောင်တွင် ကျင်းပခဲ့သည်။
အခမ်းအနားတွင် မကွေးတိုင်းဒေသကြီး ဝန်ကြီးချုပ် ဦးတင့်လွင်အား နတ်မောက်မြို့နယ်၏ စိုက်ပျိုးရေးဆိုင်ရာ အချက်အလက်များနှင့် မိုးစပါးစိုက်ပျိုး ထုတ်လုပ်မှုအခြေအနေများကို မြို့နယ်စိုက်ပျိုးရေးဦးစီဌာန ဦးစီးအရာရှိ ဒေါ်မြင့်မြင့်ချိုက ရှင်းလင်းတင်ပြပြီး စိုက်ပျိုးရေးဦးစီးဌာန တိုင်းဦးစီးမှူးက ဆန်အရည်အသွေးကောင်းမွန်ပြီး အထွက်နှုန်းကောင်းသည့် စပါးမျိုးများ စိုက်ပျိုးနိုင်ရေး ဆွေးနွေးပြောကြားသည်။ ထို့နောက် တိုင်းဒေသကြီးဝန်ကြီးချုပ်က “ကျေးလက်နေပြည်သူများ၏ ဘ၀ဖွံ့ဖြိုး တိုးတက်ရေးမှာ စိုက်ပျိုးထုတ်လုပ်မှုကဏ္ဍ အောင်မြင် ဖြစ်ထွန်းရန် အဓိကလိုအပ်ကြောင်း” အမှာစကားပြောကြားသည်။
ယင်းနောက် တက်ရောက်လာသည့် ဒေသခံတောင်သူများမက ဆွေးနွေးတင်ပြကြရာ တိုင်းဒေသကြီး ဝန်ကြီးချုပ်က ဆက်စပ်ဌာနများနှင့် ပေါင်းစပ်ညှိနှိုင်း ဖြည့်ဆည်းဆောင်ရွက်ပေးပြီး နေကြာစိုက်ပျိုးမည့် တောင်သူ ၅၀ အား ရေစင်း(၁) ဆပ်မျိုးနေကြာအား တစ်ဧက (၁)အိတ်နှုန်း ထောက်ပံ့ပေးသည်။ ဆက်လက်၍ ဝန်ကြီးချုပ်နှင့်အဖွဲ့သည် စိုက်ပျိုးထားသည့် မိုးစပါး RS – CS မျိုးစေ့ထုတ် ဧက ၅၀ စံကွက်များအား လိုက်လံကြည့်ရှုစစ်ဆေးသည်။
ထို့နောက် မကွေးတိုင်းဒေသကြီး ဝန်ကြီးချုပ်နှင့်အဖွဲ့သည် နတ်မောက်မြို့နယ် ရွာမွန်ကျေးရွာအုပ်စု ရွာမွန်ကျေးရွာတွင် ၂၀၂၂-၂၀၂၃ ခုနှစ် ချည်မျှင်ရှည်ဝါ တိုးတက်ထုတ်လုပ်ရေးစီမံကိန်း ချည်မျှင်ရှည်ဝါ ဧက ၅၀ မျိုးစေ့ထုတ်ဇုန် ရွှေတောင်(၁၀) စိုက်ခင်းအား ကြည့်ရှုစစ်ဆေးပြီး နေကြာစိုက်ပျိးမည့် တောင်သူများအား ဆင်းရွှေကြာ(၂) နေကြာမျိုးများ ထောက်ပံ့ပေးအပ်ကာ ချည်မျှင်ရှည်ဝါ ရွှေတောင်(၁၀) စိုက်ခင်းအား လိုက်လံကြည့်ရှုစစ်ဆေးခဲ့ကြောင်း သိရသည်။
လှဝင်း
