မုဒုံ ၃ သြဂုတ်
မွန်ပြည်နယ် မုဒုံမြို့နယ်တွင် သြဂုတ် ၂ ရက်နေ့မှစတင်ကာ မိုးအဆက်မပြတ် သည်းထန်စွာ ရွာသွန်းမှုကြောင့် တောင်ကျရေများ မုဒုံမြို့နယ် ကမာဝက်မြို့ ဟင်္သာရပ်ကွက်နှင့် မြေနိမ့်ပိုင်း နေရာများတို့တွင် ယနေ့မွန်းလွဲ (၁) နာရီခွဲမှ စတင်ကာ လူနေအိမ်ခြံဝန်းအတွင်း ရေများဝင်ရောက်ခြင်းနှင့် လမ်းမကြီးများ ရေကျော်မှု ဖြစ်ပွားကြောင်း သိရသည်။
အဆိုပါ မိုးအဆက်မပြတ် ရွာသွန်းမှုကြောင့် ကမာဝက်မြို့ ဟင်္သာရပ်ကွက်အတွင်း မြေနိမ့်ပိုင်းရှိ လူနေအိမ်ခြံဝန်း (၃၀) ကျော်ခန့်သို့ ရေများဝင်ရောက်လျက်ရှိနေသည်။ နှီးပဒေါကျေးရွာအနီး မုဒုံ-သံဖြူဇရပ် အဝေးပြေး ကားလမ်းမကြီးပေါ် ရေကျော်ရေလျှံကာ ကားများနှင့် မော်တော်ဆိုင်ကယ်များ ဖြတ်သန်း သွားလာမှုများကို အလှည့်ကျစနစ်ဖြင့် ဖြတ်သန်းသွားလာခွင့်ပြုနေပြီး တာဝန်ရှိသူများနှင့် အရေးပေါ်ကယ်ဆယ်ရေးအဖွဲ့များပူပေါင်း၍ ဆောင်ရွက်လျက်ရှိသည်။
မွန်ပြည်နယ် မုဒုံမြို့နယ်တွင် ယနေ့မိုးရေချိန် လက်မ (၆.၉၃) လက်မရှိကြောင်း မိုးလေဝသနှင့် ဇလဗေဒဦးစီးဌာနမှ သိရသည်။
အောင်မျိုးသူ(မုဒုံ)
