နေပြည်တော်ကောင်စီဥက္ကဋ္ဌ ဦးသန်းထွန်းဦး အထွေထွေအုပ်ချုပ်ရေးဦးစီးဌာန၊ နှစ်ပတ်လည်နေ့ အထိမ်းအမှတ် အခမ်းအနားတက်ရောက်

နေပြည်တော် နိုဝင်ဘာ ၇

(၃၅)နှစ်မြောက်အထွေထွေအုပ်ချုပ်ရေးဦးစီးဌာန၊ နှစ်ပတ်လည်နေ့ အထိမ်းအမှတ်အခမ်းအနားကို ယနေ့ မွန်းလွဲပိုင်းတွင် နေပြည်တော်ကောင်စီရုံး ဇမ္ဗူသီရိခန်းမ၌ ကျင်းပသည်။

အခမ်းအနားသို့ နေပြည်တော်ကောင်စီဥက္ကဋ္ဌ ဦးသန်းထွန်းဦး၊ နေပြည်တော်ကောင်စီအဖွဲ့ဝင်များ၊ နေပြည်တော်စည်ပင်သာယာရေးကော်မတီ ဒုတိယ မြို့တော်ဝန်၊ အမြဲတမ်းအတွင်းဝန်၊ ဌာနဆိုင်ရာများ၊ နေပြည်တော် အထွေထွေအုပ်ချုပ် ရေးဦးစီးဌာနမှ အုပ်ချုပ်ရေးမှူးနှင့် အရာထမ်း အမှုထမ်းများ၊ ခရိုင်/မြို့နယ် အထွေထွေအုပ်ချုပ်ရေးဦးစီးဌာနမှ အုပ်ချုပ် ရေးမှူးများ၊ ဝန်ထမ်းများနှင့် ဖိတ်ကြားထားသည့် ဧည့်သည်တော်များ တက်ရောက်ကြသည်။

ဦးစွာ နေပြည်တော်ကောင်စီဥက္ကဋ္ဌ ဦးသန်းထွန်းဦးက အမှာစကားပြောကြားရာတွင် နေပြည်တော် အထွေထွေအုပ်ချုပ်ရေး ဦးစီးဌာနရုံးတွင် တာဝန်ထမ်းဆောင်နေကြသည့် အရာထမ်း၊ အမှုထမ်းများအနေဖြင့် နိုင်ငံတော်နှင့် ပြည်သူများကအားထားရသည့် အုပ်ချုပ်ရေးဌာနကြီးတစ်ခုအဖြစ် အခိုင်အမာ ဆက်လက် ရပ်တည်သွား နိုင်အောင်ကြိုးပမ်း ဆောင်ရွက်သွားကြပါဟု မှာကြားလိုပါကြောင်း၊ နိုင်ငံတော်က ချမှတ်ထားသည့် အမျိုးသားရေး ရည်မှန်းချက်(၂)ရပ်၊ နိုင်ငံရေးရည်မှန်းချက်(၂)ရပ်၊ ရှေ့လုပ်ငန်းစဉ်(၅) ရပ်နှင့် ဦးတည်ချက်(၉)ရပ်တို့ကို “မူဝါဒ”အဖြစ်ခံယူပြီး ကျရာအခန်းကဏ္ဍကနေ အကောင်အထည်ဖော် ဆောင်ရွက်ကြရာတွင် တတ်စွမ်းသမျှ ပူးပေါင်းပါဝင်ဆောင်ရွက်ကြစေလိုကြောင်း၊ စိုက်ပျိုးရေးကဏ္ဍ၊ မွေးမြူရေးကဏ္ဍနှင့် ကုန်ထုတ်လုပ်မှုကဏ္ဍများတွင် ပြည်သူများကို ကူညီဆောင်ရွက် ပေးခြင်းနှင့် ဒေသဖွံ့ဖြိုးရေးအတွက် ဦးဆောင်ဦးရွက်ပြုရသည့် လုပ်ငန်းတာဝန်များကို ရိုင်းပင်းကူညီ ဆောင်ရွက်ကြ စေလိုကြောင်း၊ နိုင်ငံ့အကျိုးကို အစဉ်သယ်ပိုးနိုင်ပြီး အရည်အသွေးပြည့်ဝသည့် အုပ်ချုပ်ရေး ဝန်ထမ်း ကောင်းများဖြစ်အောင် ကြိုးပမ်းဆောင်ရွက်ကြစေလိုကြောင်း ပြောကြားသည်။

ထို့နောက် အထွေထွေအုပ်ချုပ်ရေးဦးစီးဌာန၏ မှတ်တမ်း Video Clip ကို ပြသသည်။ ယင်းနောက် နေပြည်တော်ကောင်စီဥက္ကဋ္ဌ ဦးသန်းထွန်းဦးက နိုင်ငံ့ဝန်ထမ်းတက္ကသိုလ်တွင် သင်တန်းသား ဒုတိယဆုရရှိသူ လက်ထောက် ညွှန်ကြားရေးမှူး ဦးထွန်းလင်းအောင်နှင့် နိုင်ငံ့ဝန်ထမ်းတက္ကသိုလ်တွင် သင်တန်းသူ ဒုတိယ ဆုရရှိသူ ဒုတိယဦးစီးမှူး ဒေါ်ကြယ်စင်သာအား ဂုဏ်ပြုဆုချီးမြှင့်ပေးအပ်ပြီး ဝန်ထမ်းများအား တူညီဝတ်စုံနှင့် ထောက်ပံ့ပစ္စည်းပေးအပ်သည်။

ဆက်လက်၍ နေပြည်တော်ကောင်စီအဖွဲ့ဝင် ဗိုလ်မှူးကြီးမင်းနောင်က အုပ်ချုပ်ရေးပညာ ဖွံ့ဖြိုးမှုသင်တန်း ကျောင်းတွင် ပထမဆုရရှိခဲ့သည့် ဒုတိယဦးစီးမှူး ဦးဉာဏ်ဝင်းအောင်ကိုလည်းကောင်း၊ နေပြည်တော် ကောင်စီအတွင်းရေးမှူးက နိုင်ငံ့ဝန်ထမ်းတက္ကသိုလ်တွင် သေနတ်ပစ်ထူးချွန်ဆုရရှိခဲ့သည့် ဒုတိယဦးစီးမှူး ဒေါ်နွယ်နွယ်ဝင်းကို လည်းကောင်း ဂုဏ်ပြုဆုချီးမြှင့်ပေးအပ်သည်။

ယင်းနောက် နေပြည်တော်ကောင်စီဥက္ကဋ္ဌက တက်ရောက်လာကြသည့် အထွေထွေအုပ်ချုပ်ရေးဦးစီးဌာနမှ အရာထမ်း အမှုထမ်းများကို ရင်းရင်းနှီးနှီး နှုတ်ဆက်စကားပြောကြားခဲ့ကြောင်း သိရသည်။

(သတင်းစဉ်)