နေပြည်တော်၊ နိုဝင်ဘာ ၂၇

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးခင်မောင်ရီသည် ယမန်နေ့ နံနက်ပိုင်းတွင် ပဲခူးတိုင်းဒေသကြီး၊ ပဲခူးမြို့ရှိ သစ်တောဦးစီးဌာန၊ ပတ်ဝန်းကျင် ထိန်းသိမ်းရေး ဦးစီးဌာနနှင့် မြန်မာ့သစ်လုပ်ငန်းရုံးများသို့ သွားရောက်၍ လုပ်ငန်းဆောင်ရွက်နေမှုကို ကြည့်ရှုစစ်ဆေးပြီး ဝန်ထမ်းများနှင့် တွေ့ဆုံကာ လိုအပ်သည်များ ဖြည့်ဆည်းဆောင်ရွက်ပေးသည်။

ထို့နောက် ပြည်ထောင်စုဝန်ကြီးသည် ပတ်ဝန်းကျင်ထိန်းသိမ်းရေးဦးစီးဌာန၊ အစည်းဝေးခန်းမတွင် ပဲခူးတိုင်းဒေသကြီး အတွင်းရှိ စက္ကူပျော့ဖတ်လုပ်ငန်းရှင်များ၊ ဝါးနှင့်ကြိမ်လုပ်ငန်းရှင်များ၊ ပရိဘောဂ လုပ်ငန်းရှင်များနှင့် တွေ့ဆုံသည်။ 

တွေ့ဆုံစဉ် ပြည်ထောင်စုဝန်ကြီးက စက္ကူပျော့ဖတ်၊ ကြိမ်၊ ဝါးနှင့် သစ်အခြေခံ MSME များ  ယခုထက်ပို၍ ဖွံ့ဖြိုး တိုးတက်စေရေးအတွက် လုပ်ငန်းရှင်များ၏ လိုအပ်ချက်များကို ဝန်ကြီးဌာနမှ အတတ်နိုင်ဆုံး ဖြည့်ဆည်း ဆောင်ရွက်ပေးမည်ဖြစ်ကြောင်း၊ ပဲခူးတိုင်းဒေသကြီးအတွင်း သဘာဝတောများမှ နှစ်စဉ်ထုတ်လုပ်နိုင်သော ဝါးတောထွက် ၂၄ သန်းကျော်ရှိသည့်အတွက် စက္ကူပျော့ဖတ် လုပ်ငန်းရှင်များနှင့် ဝါးလုပ်ငန်းရှင်များအတွက် လိုအပ်သောကုန်ကြမ်းများ လုံလောက်စွာရရှိနိုင်ပြီး လိုအပ်ပါက ဝါးနှင့် ကြီးမြန်သစ်မျိုးစိုက်ခင်းများ တိုးချဲ့စိုက်ပျိုးနိုင်ရေး ဆောင်ရွက်ပေးသွားမည်ဖြစ်ကြောင်း၊ ကြိမ်၊ ဝါးနှင့် သစ်အခြေခံ စက်မှုလုပ်ငန်းများသည် ပြည်တွင်း/ ပြည်ပဝင်ငွေ ရှာဖွေရေးနှင့် ဒေသခံပြည်သူများအတွက် အလုပ်အကိုင်အခွင့်အရေးများ ဖန်တီးပေးရေးတွင် အရေးကြီးသော အခန်းကဏ္ဍမှ ပါဝင်နေကြောင်း၊ အဆိုပါပုဂ္ဂလိက လုပ်ငန်းများ ဖွံ့ဖြိုးတိုးတက်စေရန် နည်းပညာနှင့်လူ့စွမ်းအားအရင်းအမြစ် တိုးတက်စေရေး၊ ကုန်ကြမ်းရရှိရေးနှင့် ထုတ်လုပ်ပြီးသော ကုန်ချောများတင်ပို့ရာတွင် အဆင်ပြေချောမွေ့မှု ရှိစေရေးအတွက်  ဌာနနှင့်လုပ်ငန်းရှင်များ ညှိနှိုင်းပေါင်းစပ်၍ Teamwork ဖြင့် ဆောင်ရွက်သွားရန် လိုကြောင်း ပြောကြားသည်။

ယင်းနောက် တက်ရောက်လာသော လုပ်ငန်းရှင်များက မိမိတို့ကဏ္ဍအလိုက် လုပ်ငန်းဆောင်ရွက်နေမှု၊ ကုန်ကြမ်းရရှိမှုနှင့် ကုန်ချောထုတ်လုပ်မှု၊ ပြည်တွင်းပြည်ပ ဝယ်လိုအားနှင့် စျေးကွက်အခြေအနေ၊ တွေ့ကြုံရသော အခက်အခဲများနှင့်ပတ်သက်၍ ရှင်းလင်းတင်ပြကြပြီး သက်ဆိုင်ရာတာဝန်ရှိသူများ၏ ဖြည့်စွက်ရှင်းလင်း တင်ပြမှုအပေါ် ပြည်ထောင်စုဝန်ကြီးက လိုအပ်သည်များ ပေါင်းစပ်ညှိနှိုင်း ဆောင်ရွက်ပေးသည်။

ထို့နောက် ပြည်ထောင်စုဝန်ကြီးသည် ပဲခူးမြို့ရှိ ဦးဝင်းနိုင် ပန်းပုအလုပ်ရုံသို့ သွားရောက်၍ လုပ်ငန်း ဆောင်ရွက်နေမှု အခြေအနေကို ကြည့်ရှုစစ်ဆေးပြီး လိုအပ်သည်များ ပေါင်းစပ်ဆောင်ရွက် ပေးသည်။

မွန်းလွဲပိုင်းတွင် ပြည်ထောင်စုဝန်ကြီးသည် ပဲခူးတိုင်းဒေသကြီး ဝန်ကြီးချုပ်နှင့်အတူ ပဲခူးမြို့ရှိ ဒေါ်စုစုယဉ် လက်မှုပညာ အလုပ်ရုံသို့ ရောက်ရှိပြီး ကုန်ကြမ်းရရှိမှုနှင့် ကုန်ချောထုတ်လုပ်နေမှု ကြည့်ရှုစစ်ဆေးပြီး လိုအပ်သည်များ ပေါင်းစပ်ညှိနှိုင်းဆောင်ရွက်ပေးသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် ပဲခူးမြို့နယ်ရှိ ရာဘာသစ်မှ ပရိဘောဂ အချောထည်များ ထုတ်လုပ်၍ ပြည်ပသို့တင်ပို့လျက်ရှိသည့် Sunforce Furniture စက်ရုံသို့ သွားရောက်၍ ကုန်ကြမ်းရရှိမှုနှင့် ပရိဘောဂ ကုန်ချောများ ထုတ်လုပ်နေမှု၊ ပဲခူးတိုင်းဒေသကြီး၊ ဒိုက်ဦးမြို့နယ်၊ အေးသုခ စက်မှုဇုန်ရှိ Sky Light တစ်ရှူးစက်ရုံ၌ Recycle Paper များကို ကုန်ကြမ်းအဖြစ် အသုံးပြု၍ တစ်ရှူးထုတ်လုပ်နေမှုနှင့် ပြည်တွင်းစျေးကွက်သို့ ဖြန့်ဖြူးနေမှု၊ အေးသုခစက်မှုဇုန်ရှိ Yangon Paper Product စက္ကူစက်ရုံ၌ Recycle Paper ကုန်ကြမ်းရရှိမှု၊ စက္ကူကတ်ထူလိပ်ကုန်ချောများ ထုတ်လုပ်နေမှု အခြေအနေတို့ကို လှည့်လည်ကြည့်ရှုစစ်ဆေးပြီး သိလိုသည်များ မေးမြန်းကာ ပေါင်းစပ်ညှိနှိုင်း ဆောင်ရွက်ပေးခဲ့ကြောင်း သိရသည်။

သတင်းစဉ်