နေပြည်တော် ဒီဇင်ဘာ ၂၉

သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးလှမိုးသည် ယနေ့ မွန်းလွဲပိုင်းက သက်ဆိုင်ရာ တာဝန်ရှိသူများနှင့်အတူ ပြည်ထောင်စုနယ်မြေ၊ နေပြည်တော်၊ လယ်ဝေးမြို့နယ် ဝဲကြီးကျေးရွာနှင့် ကွေ့ကြီးကျေးရွာတို့တွင် သမဝါယမလုပ်ငန်းများနှင့် ဒေသဖွံ့ဖြိုးရေးလုပ်ငန်းများ ဆောင်ရွက်နေမှု အခြေအနေ များကို ကြည့်ရှုစစ်ဆေးသည်။

ရှေးဦးစွာ ပြည်ထောင်စုဝန်ကြီးနှင့်အဖွဲ့သည့် လယ်ဝေးမြို့နယ် ရွှေပြည်သာကျေးရွာအုပ်စု၊ ဝဲကြီးကျေးရွာ၌ ဝဲကြီးကျေးရွာ စိုက်ပျိုးရေးနှင့် အထွေထွေသမဝါယမအသင်းသား တောင်သူများ၊ ဒေသခံပြည်သူများနှင့် တွေ့ဆုံရာ ပြည်ထောင်စုနယ်မြေ နေပြည်တော် သမဝါယမဦးစီးဌာန ဦးစီးမှူးက အသင်းသားဦးရေ ၆၄ ဦး၏ စိုက်ပျိုးမြေဧက ၂၅၀ ကျော်တွင် မိုးစပါးစိုက်ပျိုးခဲ့မှုနှင့် အထွက်နှုန်းကိစ္စရပ်များ၊ လက်ရှိ ပန်းပွင့်ဖြူ၊ ပန်းစိမ်း၊ ဂေါ်ဖီ၊ ငရုတ်၊ ခရမ်း၊ ပြောင်း စိုက်ပျိုးရေး လုပ်ငန်းများ အခြေအနေများကိုလည်းကောင်း၊ ကျေးလက် ဒေသဖွံ့ဖြိုးတိုးတက်ရေးဦးစီးဌာန ဦးစီးမှူးက ဆိုလာစနစ်ဖြင့် စိုက်ပျိုးရေရရှိရေး ဆောင်ရွက်ပေးခဲ့မှုကိုလည်းကောင်း ရှင်းလင်းတင်ပြကြသည်။

ရှင်းလင်းတင်ပြမှုများနှင့်စပ်လှဉ်း၍ပြည်ထောင်စုဝန်ကြီးက မိမိတို့ဝန်ကြီးဌာနအနေဖြင့် စိုက်ပျိုးရေရရှိရေး ဆောင်ရွက်ပေးပြီးဖြစ်၍ ဆိုလာနှင့် ဆက်စပ်ပစ္စည်းများ ရေရှည်တည်တံ့ခိုင်မြဲရေး ပြုပြင်ထိန်းသိမ်းရေးလုပ်ငန်းများ စဉ်ဆက်မပြတ် ဆောင်ရွက်နိုင်ရေးအတွက် ရေသုံးစွဲသူအစုအဖွဲ့များအား စနစ်တကျဖွဲ့စည်း၍ ရန်ပုံငွေများ ကောက်ခံဆောင်ရွက်သွားရန်လိုအပ်ကြောင်း၊ စိုက်ပျိုးနိုင်သည့် မြေများတွင် ဒေသနှင့်ကိုက်ညီသည့် ဈေးကွက်ဝင် သီးနှံများ သီးထပ်(၃)သီး အမှန်တကယ် စိုက်ပျိုးဆောင်ရွက်ကြရန် လိုအပ်ကြောင်း၊ ဒါမှသာ စိုက်ပျိုးရေအတွက် ကုန်ကျမှုအပေါ် သီးနှံစိုက်ပျိုးထုတ်လုပ်မှုမှ အကျိုးအမြတ်များ ပြန်လည်ရရှိမှာဖြစ်ပြီး ဆောင်ရွက်ခဲ့မှု ထိရောက် အကျိုးရှိမှာဖြစ်ကြောင်း၊ မည့်သည့်သီးနှံအမျိုးအစားကိုမဆို လိုအပ်သည့် မျိုးကောင်းမျိုးသန့်၊ မြေအမျိုးအစား၊ စိုက်ပျိုးရေ၊ စိုက်ပျိုး နည်းစနစ်များအတိုင်း လိုက်နာဆောင်ရွက်မှ ပန်းတိုင်အထွက်နှုန်း ရရှိနိုင်မှာဖြစ်ကြောင်း၊ ထွက်ရှိလာသော သီးနှံများအား တောင်သူများကိုယ်တိုင်ဈေးကွက်သို့ တိုက်ရိုက်ရောင်းချနိုင်ရေးအတွက် သက်ဆိုင်ရာတာဝန်ရှိသူများနှင့် ပေါင်းစပ်ဆောင်ရွက်ပေးမည်ဖြစ်ကြောင်း ဆွေးနွေးကြားပြီး အသင်းသား တောင်သူများစိုက်ပျိုးထားသော ပြောင်း၊ ပန်းပွင့်ဖြူ၊ ပန်းစိမ်း၊ ဂေါ်ဖီစိုက်ပျိုးနေမှု အခြေအနေများကို ကြည့်ရှု စစ်ဆေးသည်။

ဆက်လက်၍ ပြည်ထောင်စုဝန်ကြီးနှင့် အဖွဲ့သည့် လယ်ဝေးမြို့နယ်၊ ညိုပင်ကျေးရွာအုပ်စု၊ ကွေ့ကြီးကျေးရွာသို့ ရောက်ရှိပြီး ကျေးရွာယာယီရှင်းလင်းဆောင်၌ ကွေ့ကြီးကျေးရွာ စိုက်ပျိုးရေးနှင့် အထွေထွေသမဝါယမ အသင်းသား တောင်သူများ၊ ဒေသခံပြည်သူများနှင့်တွေ့ဆုံရာ သက်ဆိုင်ရာ တာဝန်ရှိသူများက ကဏ္ဍအလိုက် လုပ်ငန်း ဆောင်ရွက်နေမှုကို ရှင်းလင်းတင်ပြကြပြီး ပြည်ထောင်စုဝန်ကြီးက စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာနမှ ဆိုလာစနစ်ဖြင့် စိုက်ပျိုးရေရရှိရေးလုပ်ငန်းများ ဆောင်ရွက်ပေးပြီးဖြစ်၍ အသင်းသားတောင်သူများ အနေဖြင့် လုပ်ငန်းများ ရေရှည်တည်တံ့ခိုင်မြဲရေး ဝိုင်းဝန်းထိန်းသိမ်းဆောင်ရွက်ကြရန်နှင့် ပြန်လည်ပြင်ဆင်ရေး လုပ်ငန်းများ ဆောင်ရွက်နိုင်ရေးအတွက် ရန်ပုံငွေများ စနစ်တကျကောက်ခံ ဆောင်ရွက်သွားရန် လိုအပ်ကြောင်း၊ စိုက်ပျိုးနိုင်သည့် မြေများတွင် ရာသီအလိုက် သီးထပ်(၃)သီး အမှန်တကယ် စိုက်ပျိုးဆောင်ရွက်ကြရန်လိုအပ် ကြောင်း၊ ထိုကြောင့် သီးနှံစိုက်ပျိုးထုတ်လုပ်မှုမှ အကျိုးအမြတ်များ ရရှိနိုင်မည်ဖြစ်ပြီး တစ်မိသားစုချင်းဝင်ငွေများ တိုးပွားလာမှာဖြစ်ကြောင်း ဆွေးနွေးပြောကြားပြီးပြောင်း၊ ပန်းပွင့်ဖြူ၊ ပန်းစိမ်း၊ ကြက်သွန်၊ ခရမ်းချဉ် သီးနှံများ စိုက်ပျိုးနေမှု အခြေအနေများကို လှည့်လည်ကြည့်ရှုစစ်ဆေးခဲ့ကြောင်း သိရသည်။

(သတင်းစဉ်)