ပူတာအို ၂၄ ဇူလိုင်
ကချင်ပြည်နယ်၊ ပူတာအိုခရိုင်၊ နောင်မွန်းမြို့နယ်တွင် ဇူလိုင်လအတွင်း မိုးသည်းထန်စွာ အဆက်အပြတ် ရွာသွန်းမှုများကြောင့် ရေကြီးရေလျှံမှုဖြစ်ပေါ်ခဲ့ကာ စပါးကျီအတွင်း သိုလှောင်ထားသော စပါးများပျက်စီးပြီး စိုက်ပျိုးလယ်ယာပျိုးခင်းများ (၅၅ ဒသမ ၆၀)ဧက ပျက်စီးဆုံးရှုံးမှု ရှိခဲ့ကြောင်း ပူတာအို ခရိုင်စိုက်ပျိုးရေးဦးစီးဌာနမှ သိရသည်။
နောင်မွန်းမြို့နယ်မြို့ပေါ် ရပ်ကွက်(၄)ရပ်ကွက်နှင့် နောင်မွန်းအုပ်စု၊ ကဆန်ခူးကျေးရွာအုပ်စု၊ ရပ်ဘော့ကျေးရွာအုပ်စုများအတွင်း လုပ်ကိုင်နေသော စိုက်ပျိုးတောင်သူ(၁၄၀)ဦးတို့ လယ်(ပျိုးခင်း)များ (၅၅ ဒသမ ၆၀)ဧကပျက်စီးပြီး ရပ်ဘော့ကျေးရွာအုပ်စုမှ တောင်သူ(၆၄)ဦးတို့၏ ယာခင်းများ(၁၁ ဒသမ ၂၀)ဧကနှင့် ရေကြီးရေလျှံကာ နေအိမ်ပျက်စီးမှုကြောင့် စပါးတင်း(၂၉၆)တင်း ပျက်စီးမှုများရှိခဲ့ကြောင်း သိရသည်။
ဆန်းညွှန့်(ပူတာအို)
