ရှေးခေတ်လူကြီးများ ပမာပြုပြောဆိုခဲ့သော ဥပမာစကားများအနက်မှ ‘‘အသစ်တွေ ဘယ်လို ကောင်းကောင်း အဟောင်းတလည်လည်’’ ဆိုသည့် စကားဥပမာတစ်ခုက ပြန်လည်ပြုပြင်ပြီးစီး လုနီးပါးရှိနေသည့် ဗားကရာချောက်နံရံများက စာရေးသူကို ထင်လင်းစွာ အလင်းတန်း ပြလိုက်ခြင်းပင်ဟု ယုံကြည်မိပါသည်။

ကိုဗစ်-၁၉ ကပ်ရောဂါဘေးနှင့် ရင်ဆိုင်နေရသော်ငြားလည်း မြို့တော်ရန်ကုန်က မိမိ၏ ဖွံ့ဖြိုးတိုးတက်မှု အရှိန်အဟုန်ကို ရပ်တန့်မနေခဲ့ပေ။ နိုင်ငံ၏ ပင်မစီးပွားရေးမြို့တော် ကြီးဖြစ်သောကြောင့် ရန်ကုန်၏ ဖွံ့ဖြိုးတိုးတက်မှုသည် နိုင်ငံ၏ စီးပွားရေးဖွံ့ဖြိုးတိုးတက်မှုပင်ဖြစ်သည်။ နိုင်ငံတစ်နိုင်ငံ စီးပွားရေးဖွံ့ဖြိုး တိုးတက်ရန် နိုင်ငံရပ်ခြားနှင့် ကုန်သွယ်မှုပြုရာတွင် လမ်းပန်းဆက်သွယ်နိုင်မှုသည် အဓိက အရေးပါ လှသည်။ ရန်ကုန်မြို့တော်နှင့် ပြည်ပနိုင်ငံများ ကုန်သွယ်မှုပြုရာတွင် မော်တော်ယာဉ်လမ်းများ၊ လေကြောင်းခရီးလမ်းများနှင့် ရေလမ်းခရီးတို့ကို အသုံးပြုလျက်ရှိရာ နိုင်ငံ၏ သွင်းကုန် ၉၀ ရာခိုင်နှုန်း ကျော်သည် ရေလမ်းခရီးကို အသုံးပြုကာ ဝင်ရောက်လျက်ရှိသည်။