၁၃၈၄ ခုနှစ် မြန်မာ့ရိုးရာ မဟာသင်္ကြန်ပွဲတော်ကို အနယ်နယ်အရပ်ရပ်တွင် ဆင်နွှဲလျက်ရှိရာ ပဲခူးတိုင်း ဒေသကြီး၊ တောင်ငူခရိုင်၊ ဖြူးမြို့နယ်၌ မဟာသင်္ကြန်ပွဲတော်ကာလအတွင်း ဖြူးချောင်းဆည်သို့ သွားရောက်၍ ရေပိုလွှဲအတွင်း  ရေကစားသူများဖြင့် စည်ကားလျက်ရှိကြောင်း သိရသည်။

ပူပြင်းခြောက်သွေ့သော နွေရာသီကာလသို့ ရောက်ရှိလာမှုနှင့် အတူ မြန်မာနှစ်သစ်ကူး သင်္ကြန်ပွဲတော်ကာလ အတွင်း မန္တလေးတိုင်းဒေသကြီး  ညောင်ဦးမြို့နယ်၌ ကျေးလက်နေပြည်သူများ သောက်သုံးရေအခက်အခဲများ ကြုံတွေ့ နေရကြောင်း သိရသဖြင့် ဧပြီ ၁၅ ရက် နံနက် ၈ နာရီက ညောင်ဦးမြို့ မြင့်မြတ်သူ စေတနာ သွေးလှူရှင်နှင့် လူနာတင်ယာဉ်ကူညီမှုအသင်းမှ ပရဟိတအသင်းသားများက  သောက်သုံးရေ အခက်ကြုံ နေသည့် ညောင်ဦးမြို့နယ် ကန်စောက်ကျေးရွာနှင့် ထနောင်းဝန်း(န)ကျေးရွာမှ ဒေသခံပြည်သူများထံ ရေသယ် ယာဉ်ဖြင့် သောက်သုံးရေများ ဖြန့်ဝေလှူဒါန်းပေးခဲ့ကြောင်း သိရသည်။

မန္တလေးတိုင်းဒေသကြီး ၊ ညောင်ဦးမြို့နယ်ရှိ ဝင်ငွေနည်းအိမ်ထောင်စုများအတွက် သင်္ကြန်ကာလ စားသောက်ရေး အဆင်ပြေစေရန် ရည်ရွယ်၍ ဧပြီ ၁၄ ရက်  နံနက်ပိုင်းက ပုဂံမြို့ ရတနာဘုံစံတောရဓမ္မရိပ်သာ ကျောင်းတိုက် နာယက ဆရာတော် ဘဒ္ဒန္တသာဂရအား အမှူးပြု၍ စေတနာအလှူရှင်များ စုပေါင်းအဖွဲ့က ဆန်နှင့် ကြက်ဥများ ထောက်ပံ့လှူဒါန်းပေးခဲ့ကြောင်း သိရသည်။