စစ်ကိုင်းတိုင်းဒေသကြီး ကန့်ဘလူမြို့နယ် သောက္ကန်ကျေးရွာနေ အလယ်တန်းပြ ဆရာမ ဒေါ်ယဉ်အေး(၄၃)နှစ်သည် မတ် ၁၁ ရက် ညနေ ၃ နာရီခွဲတွင် အလယ်လျှိုကျေးရွာ အခြေခံပညာအထက်တန်းကျောင်း(ခွဲ)တွင် တက္ကသိုလ်ဝင်စာမေးပွဲအခန်းစောင့်ပြီး နေအိမ်သို့ ဆိုင်ကယ်ဖြင့်ပြန်လာစဉ် သောက္ကန်ကျေးရွာအနောက်ဘက်ရှိ ကျေးရွာချင်းဆက် လမ်းမပေါ်၌ အမည်မသိ အမျိုးသား(၃)ဦးမှ ရပ်တန့်ရန်တားဆီးပြီး တုတ်ဖြင့်ရိုက်ကာ ဆိုင်ကယ်အား လုယူမောင်းနှင်ထွက်ပြေးသွားသဖြင့် ဇီးကုန်းနယ်မြေရဲစခန်းမှ အမှုဖွင့် ဆောင်ရွက်ခဲ့သည်။

ဖလမ်းမြို့နယ်၊ လုမ်ဘန်းကျေးရွာ ဒေါ်ခွမ်းဆွေးနေအိမ်တွင် မတ် ၁၄ ရက် နံနက် ၉ နာရီက  လျှပ်စစ်ဒယ်အိုးနီဖြင့် ဟင်းချက်ရာမှ အပူလွန်ကဲပြီး မီးလောင်မှုဖြစ်ပွားသည်။

မိုးကုတ်မြို့နယ် တောင်ကချင်ရပ်ကွက် သီတဂူဘုန်းတော်ကြီးကျောင်းရှိ ကိုရင်ဆောင်တွင် မတ်လ ၁၃ ရက် နံနက် ၇နာရီ၄၅မိနစ်က မီးလောင်ကျွမ်းမှုဖြစ်ပွားခဲ့သည်။