ပရီမီယာလိဂ်ပွဲစဉ် (၁၇)မှ အကောင်းဆုံးပွဲစဉ် တစ်ပွဲဖြစ်သည့် အာဆင်နယ်အသင်းနှင့် ဝက်စ်ဟမ်း အသင်းတို့ ပွဲစဉ်ကို ဒီဇင်ဘာ ၁၆ ရက် နံနက်ပိုင်းက အမ်းမရိတ်ကွင်း၌ ယှဉ်ပြိုင်ကစားခဲ့ရာ အာဆင်နယ်အသင်းက နှစ်ဂိုး-ဂိုးမရှိဖြင့် အနိုင်ရရှိခဲ့သည်။

စင်ကာပူနိုင်ငံ၌ ပြုလုပ်နေသည့် ၂၀၂၀ အာဆီယံဆူဇူကီးဖလားပြိုင်ပွဲ အုပ်စုနောက်ဆုံးပွဲများကို ဒီဇင်ဘာ ၁၈၊ ၁၉ ရက်တွင် ဆက်လက်ကျင်းပသွားမည်ဖြစ်ပြီး ဆီမီးဖိုင်နယ်တက်ရောက်မည့် နှစ်သင်း ထပ်မံထွက်ပေါ်မည်ဖြစ်သည်။

ပရီမီယာလိဂ်ပွဲစဉ် (၁၇)မှ ကြားပွဲအဖြစ် ယှဉ်ပြိုင်ကစားခဲ့သည့် မန်စီးတီးအသင်းနှင့် လိဒ်စ် အသင်းတို့ပွဲစဉ်ကို ဒီဇင်ဘာ ၁၅ ရက် နံနက်ပိုင်းက အီတီဟက် ကွင်း၌ ယှဉ်ပြိုင်ကစားခဲ့ရာ မန်စီးတီးအသင်းက ခုနစ်ဂိုးဂိုးမရှိဖြင့် အနိုင်ရရှိခဲ့သည်။ မန်စီးတီးအသင်းသည် ယခု အနိုင်ပွဲကြောင့် ပွဲစဉ် (၁၇) အပြီး ရမှတ် ၄၁ မှတ်ဖြင့် အမှတ်ပေးဇယားကို ဆက်လက်ဦးဆောင်ထားသည်။