တယ်လီနောမြန်မာသည် ၎င်း၏ရှယ်ယာများကို ရောင်းချခြင်းအတွက် လိုအပ်သည့် သက်ဆိုင်ရာ ခွင့်ပြုမိန့်ကို စောင့်ဆိုင်းနေဆဲဖြစ်ကြောင်းနှင့် တယ်လီနောမြန်မာ၏လုပ်ငန်းများမှာ ပုံမှန်အတိုင်း ဆက်လက်လည်ပတ်နေပြီး မြန်မာနိုင်ငံရှိ လူအားလုံးကို ဆက်သွယ်ချိတ်ဆက်ပေးနိုင်ရန် ကြိုးပမ်း လျက်ရှိကြောင်း တယ်လီနောမြန်မာက ဖေဖော်ဝါရီ ၁၁ ရက်က ထုတ်ပြန်ကြေညာထားသည်။

ဇန်နဝါရီ ၆ ရက်က ထုတ်ပြန်ခဲ့သည့် ပြည်ထောင်စု၏ အခွန်အကောက်ဥပဒေကို ပြင်ဆင်သည့် ဥပဒေအရ ဆင်းကတ်အသစ်ကို စတင်အသုံးပြုနိုင်ရန် ဝန်ဆောင်ခနှင့် အင်တာနက်ဒေတာ သုံးစွဲမှု အတွက် ဝန်ဆောင်ခနှုန်းထားများ မြင့်တက်လာရာ ဒေတာကုန်ကျမှုသက်သာစေမည့်အကြံပြုချက် ခြောက်ခုကို တယ်လီနောမြန်မာက ဇန်နဝါရီ ၂၄ ရက်တွင် ထုတ်ပြန်ခဲ့သည်။

ယခုနှစ် ဇန်နဝါရီ ၆ ရက်က ထုတ်ပြန်ခဲ့သည့် ပြည်ထောင်စု၏ အခွန်အကောက်ဥပဒေကို ပြင်ဆင်သည့်ဥပဒေအရ MPT အသုံးပြုသူများအနေဖြင့် အင်တာနက်ဒေတာသုံးစွဲမှုများအတွက် ဝန်ဆောင်မှုနှုန်းထားနှင့် ဆင်းကတ် အသစ်များကို စတင်အသုံးပြုနိုင်ရန်ဆောင်ရွက်ပေး ဝန်ဆောင်မှု (SIM card activation) အပေါ်တွင် ပြောင်းလဲမှုများရှိမည်ဖြစ်ကြောင်း MPT က ဇန်နဝါရီ ၁၄ ရက်တွင် သတင်း ထုတ်ပြန်သည်။

အင်တာနက်ဝန်ဆောင်မှုပေးသည့် လုပ်ငန်းတစ်ခုဖြစ်သော မြန်မာနက်အနေဖြင့် လစဉ်သုံးနှင့် လုပ်ငန်းသုံး အင်တာနက်ဝန်ဆောင်မှုအချို့အတွက် ဈေးနှုန်းများကို ဇန်နဝါရီ ၈ ရက် မှစ၍ ပြောင်းလဲ သတ်မှတ်ထားကြောင်းနှင့် ပြည်ထောင်စု၏ အခွန်အကောက်ဥပဒေကို ပြင်ဆင်သည့်ဥပဒေအရ ပြောင်းလဲခြင်းဖြစ်ကြောင်း သိရသည်။