နိုဝင်ဘာ ၁၄
တူကီယဲနိုင်ငံ အစ္စတန်ဘူလ်ရှိ လူသိများသောခရီးသွားနေရာတစ်ခု၌ ပေါက်ကွဲမှုတစ်ခုဖြစ်ပွားခဲ့ကြောင်း သိရသည်။
အဆိုပါပေါက်ကွဲမှုကြောင့် လူခြောက်ဦးသေဆုံးပြီး အခြား ၈၁ ဦး ဒဏ်ရာရရှိခဲ့ကြောင်းနှင့် ယင်းပေါက်ကွဲမှုသည် အကြမ်းဖက်တိုက်ခိုက်မှုတစ်ခုဖြစ်ဖွယ်ရှိသည်ဟုယူဆကြောင်း အစိုးရကပြောကြားသည်။
ထိုပေါက်ကွဲမှုသည် ယမန်နေ့ကဈေးဝယ်သူများစုပြုံတိုးနေစဉ်ဖြစ်ပွားခဲ့ခြင်း ဖြစ်သည်။
၎င်းပေါက်ကွဲမှုဖြစ်ပွားခြင်းကြောင့် လုံခြုံရေးကင်မရာတွင်အမည်းရောင် ယာယီဖုံးလွှမ်းသွားပြီးနောက် လူအများ မြေပေါ်သို့လဲကျသွားခြင်းနှင့် ဝေးရာသို့ထွက်ပြေးခြင်းတို့ကို တွေ့မြင်ရသည်ဟု သိရသည်။
ဗွီဒီယိုတိပ်ခွေနှင့်မျက်မြင်သက်သေတွေ့ရှိချက်များအရ အမျိုးသမီးတစ်ဦး၏အကြမ်းဖက်တိုက်ခိုက်မှုဖြစ်သည်ဟု ယူဆရကြောင်း တူကီယဲအစိုးရတာဝန်ရှိသူများက ပြောကြားသည်။
၂၀၁၆ ခုနှစ်က တိုက်ခိုက်မှုများဆက်တိုက်ဖြစ်ပွားပြီးနောက် အစိုးရကလုံခြုံရေးတင်းကြပ်မှုများပြုလုပ်ခဲ့ကြောင်းနှင့် ယင်းနောက်ပိုင်းတွင် အကြမ်းဖက်တိုက်ခိုက်မှုကြီးကြီးမားမားမရှိကြောင်း ဖော်ပြထားသည်။
ကိုးကား-အင်န်အိတ်ချ်ကေ
ဘာသာပြန်-မြင့်မြင့်ချို
