ဝက်လက် ၂၆ သြဂုတ်
စစ်ကိုင်းတိုင်းဒေသကြီး ရွှေဘိုခရိုင် ဝက်လက်မြို့နယ် ယင်းမတောကျေးရွာတွင် လေဆင်နှာမောင်း တိုက်ခတ်ခဲ့သဖြင့် နေအိမ် (၁၃) လုံးပြိုလဲကာ နေအိမ်အလုံး ၅၀ အမိုးလန်မှုဖြစ်ပွာခဲ့ကြောင်း ရွှေဘိုခရိုင်မီးသတ်ဦးစီးမှူး လက်ထောက်ညွှန်ကြားရေးမှူး ဦးအေးမြင့်ထံမှ သိရသည်။
ဝက်လက်မြို့နယ် မီးသတ်စခန်း၏ အနောက်ဘက် ၉ မိုင်ခန့်အကွာ ဝက်လက်မြို့နယ် ရွာသာကြီးကျေးရွာအုပ်စု ယင်းမတောကျေးရွာတွင် သြဂုတ် ၂၅ ရက် ည ၉ နာရီခွဲ အချိန်မှ ည ၁၀ နာရီခွဲထိ လေဆင်နှာမောင်းတိုက်ခတ်ခဲ့သဖြင့် နေအိမ် (၁၃) လုံးပြိုလဲကာ ၊ အလုံး ၅၀ အမိုးလန် သစ်ပင်ပိခြင်းနှင့် သစ်ပင်များပြိုလဲမှုကြောင့် လမ်းပိတ်ဆို့နေမှုများအား သြဂုတ် ၂၆ ရက် နံနက် ၇ နာရီခွဲတွင် ဝက်လက်မြို့နယ်မီးသတ်စခန်းမှ ရှင်းလင်းဆောင်ရွက်ခဲ့ကြောင်း သိရသည်။
လေဆင်နှာမောင်းတိုက်ခတ်မှုကြောင့် လေဘေးဒုက္ခခံရသူများအား စစ်ကိုင်းတိုင်းဒေသကြီးအစိုးရအဖွဲ့ လူမှုရေးဝန်ကြီး ဒေါက်တာဇော်ဝင်း၊ စစ်ကိုင်းတိုင်းဒေသကြီး မီးသတ်ဦးစီးမှူးနှင့် ဘေးအန္တရာယ် စီမံခန့်ခွဲရေးဦးစီးဌာန တိုင်းဦးစီးမှူးတို့မှ ယင်းမတောကျေးရွာမဟာဂန္ဓာရုံကျောင်းတိုက်တွင် ငွေကျပ် (၃၂၆၃၈၀ဝ)ကျပ် ထောက်ပံ့ပေးအပ်ခဲ့ကြောင်း သိရသည်။
မိုးသောက် (ရွှေဘို)
