ဒီးမော့ဆို ၂၆ ဇူလိုင်
ကယားပြည်နယ် ဒီးမော့ဆိုမြို့နယ်တွင် မိုးရွာသွန်းမှုနည်းပါးသည့်အတွက် ဆည်/ မြောင်း/ တမံအတွင်း ရေဝင်ရောက်မှု နည်းပါးသောကြောင့် ငွေတောင်ဆည်မှ ပေးဝေသော စိုက်ပျိုးရေကို ရေလှည့်စနစ်ဖြင့် ဇူလိုင် ၂၆ ရက်မှ သြဂုတ် ၃၁ ရက်ထိ ရေပေးဝေသွားမည်ဖြစ်ကြောင်း သိရသည်။
ယခုနှစ် မိုးစပါးစိုက်ပျိုးချိန်တွင် မိုးရွာသွန်းမှုနည်းပါးသည့်အတွက် ဒီးမော့ဆိုမြို့နယ်ရှိ ငွေတောင်ဆည်အတွင်း ရေဝင်ရောက်မှုနည်းပါးသဖြင့် စိုက်ပျိုးရေကို အလေအလွင့် မရှိ၊ အကျိုးရှိစွာ အသုံးပြုနိုင်ရန် ရေလှည့်စနစ်ဖြင့် စိုက်ပျိုးရေပေးဝေသွားမည်ဖြစ်ကြောင်း မြို့နယ်ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာနမှ သိရသည်။
ငွေတောင်ဆည်မှ ရေလှည့်စနစ်ဖြင့် ပေးဝေရာတွင် မြောင်းရင်းမှ မိုင်နာ ၁၄ ထိ တစ်ပိုင်း၊ မြောင်းမ မိုင်နာ ၁၅ မှ မြောင်းမမိုင်နာ ၂၀ ထိ တစ်ပိုင်းဟူ၍ အပိုင်းနှစ်ပိုင်းခွဲကာ ရေပေးဝေမည့်ရက်များကို သတ်မှတ်ထားပြီး တောင်သူများအနေနှင့် မိမိတို့၏ ရေလှည့်တွင်သာ ရေရယူကြရန် အသိပေးဆောင်ရွက်လျက်ရှိသည်။
ဒီးမော့ဆိုမြို့နယ်တွင် ယခုနှစ်မိုးရာသီ၌ မိုးစပါး ၃၄၅၆၅ ဧက စိုက်ပျိုးနိုင်ရန် လျာထားပြီး တောင်သူများ မိုးစပါးစိုက်ပျိုးချိန်တွင် မိုးရွာသွန်းမှု နည်းပါးသည့်အတွက် လယ်အတွင်း ရေရရှိမှု မရှိခြင်းကြောင့် မိုးစပါးအချိန်မီ စိုက်ပျိုးနိုင်ရန် ခက်ခဲလျက်ရှိကြောင်း သိရသည်။
ရီရယ်(ဒီးမော့ဆို)
