ကရင်ပြည်နယ်၊ ဘားအံမြို့ အောင်သံလွင်ပြည်နယ် အားကစားကွင်း၏ မြေသားပြေးလမ်းကို ၂၀၁၉-၂၀၂၀ ဘဏ္ဍာနှစ်  ပြည်ထောင်စုရန်ပုံငွေ ကျပ်သန်းပေါင်း ၇၄၅ သန်းဖြင့် မီတာ ၄၀၀ Synthetic ပြေးလမ်းခင်းခြင်းလုပ်ငန်းကို ဆောင်ရွက်လျက်ရှိရာ ဇူလိုင်လ ၁၆ ရက်နေ့တွင်  ၈၅ ရာခိုင်နှုန်းပြီးစီး၍ အပေါ်ယံ Synthetic Rubber Layers ခင်းခြင်း လုပ်ငန်းကို စတင်ဆောင်ရွက်နေပြီဖြစ်သည်။ 

စစ်ကိုင်းတိုင်းဒေသကြီး၊ မော်လိုက်မြို့နယ် စည်ပင်သာယာရေးကော်မတီ၏ ၂၀၂၀-၂၀၂၁ ခု၊ ဘဏ္ဍာရေးနှစ် အရပ်ရပ်အခွင့်အရေးလိုင်စင်များအား တစ်နှစ်သက်တမ်းတိုးစနစ်ဖြင့် လေလံတင်ရောင်းချပွဲကို ယနေ့နံနက်ပိုင်းက မော်လိုက်မြို့ မြို့တော်ခန်းမတွင် ကျင်းပပြုလုပ်ခဲ့ကြောင်း သိရသည်။

၂၀၂၀ ပြည့်နှစ် နိုဝင်ဘာလ (၈) ရက်နေ့တွင် ကျင်းပပြုလုပ်မည့် ၂၀၂၀ ပြည့်နှစ် အထွေထွေရွေးကောက်ပွဲတွင် ကချင်ပြည်နယ်အတွင်း၌ ၂၀၁၅ ခုနှစ် ပါတီစုံဒီမိုကရေစီအထွေထွေရွေး ကောက်ပွဲကျင်းပခဲ့သည့် မဲရုံအရေအတွက်ထက် လက်ရှိအချိန်ထိ ကောက်ယူခဲ့သည့် မဲဆန္ဒရှင်စာရင်းအရ မဲရုံ (၇၆)ရုံ ထပ်မံတိုးချဲ့လျာထားဆောင်ရွက်လျက်ရှိကြောင်း ပြည်နယ်ရွေးကောက်ပွဲကော်မရှင် အဖွဲ့ခွဲ အတွင်းရေးမှူးထံမှ သိရှိရသည်။

အစားအသောက်နှင့် ဆေးဝါးကွပ်ကဲရေးဦးစီးဌာနမှ ဦးဆောင်၍ ဌာနဆိုင်ရာပူးပေါင်းအဖွဲ့က ဇူလိုင် ၁၆ ရက် နံနက် ၁၀ နာရီတွင် ဖလမ်းမြို့ရှိ ကုန်စုံအရောင်းဆိုင်များတွင် သက်တမ်းလွန် အစားအသောက်များ ရောင်းချခြင်း ရှိ မရှိ ရှောင်တခင် စစ်ဆေးခဲ့သည်။

အခြေခံပညာကျောင်းများ ပြန်လည်ဖွင့်လှစ်ချိန်တွင် ကိုဗစ်-၁၉ ကာကွယ်တားဆီးရေးအတွက် တိုင်းဒေသကြီး/ ပြည်နယ်ပညာရေးမှူးများ၊ ပြည်သူ့ကျန်းမာရေးနှင့်ကုသရေးဦးစီးမှူးနှင့် တာဝန်ရှိသူများ ဆွေးနွေးညှိနှိုင်းပွဲကို ယနေ့နံနက်ပိုင်းတွင် ကျန်းမာရေးနှင့်အားကစားဝန်ကြီးဌာန၌ Video conferencing ဖြင့် ကျင်းပသည်။