ကိုရင်ဩ

 

နိုဝင်ဘာလ ၃ ရက်နေ့ အမေရိကန်ရွေးကောက်ပွဲကြီးအတွက် ခြေလှမ်းပြင်လျက်ရှိနေချိန်အတွင်း ရီပတ်ဘလီကန်ပါတီ ကိုယ်စားပြု ဒုတိယသမ္မတ မိုက်ပင့်စ်နှင့် ဒီမိုကရက်တစ် ပါတီကိုယ်စားပြု ကမ္မလာ ဟဲရစ္စတို့ အောက်တိုဘာ ၈ ရက်ညက ယူတားပြည်နယ် ဆော့လိတ်မြို့ရှိ ယူတား တက္ကသိုလ်တွင် နိုင်ငံရေးစကားစစ်ထိုးပွဲ ပြုလုပ်ကြသည်ဆိုသော သတင်းတစ်ပုဒ်ကို ကျွန်ုပ်ဖတ်ရှုရသောအခါ လေးစားကော်ရော် တိုင်းလုံးကျော်သည့် အကျော်ဒေးယျ ပုဂ္ဂိုလ်များ၏ ဟောသံပြောသံများ သောသောညံနေပုံကို တစ်ထောက်တစ်နား စောင့်စားကြည့်ရှုစေ့ငုမိလေ၏။

 

“ချိုးနှစ်ကောင် ထနောင်းပင်ညီနောင်က လွမ်းအောင် ကူချွဲ” တေးကဗျာကို ရေးကာဆိုရင်း “စကားစစ်ထိုးခြင်း အနုပညာ” အသို့ရှိသည်ကို ကျွန်ုပ်အဝေးမှ အကဲခတ်ကာ ကြည့်မိလေသော် တွေ့မြင်ရသည်မှာကား တိုင်းရေးပြည်ရွာ ပြဿနာများနှင့်ပတ်သက်၍ မဲဆန္ဒရှင်များ၏ ရှေ့မှောက်ဝယ် ဆွေးနွေးငြင်းခုံနေကြသူ နှစ်ဦးဖြစ်၏။

 

အမေရိကန်ပြည်ထောင်စု၏ (၄၈) ဦးမြောက် ဒုတိယသမ္မတ ပင့်စ်နှင့် ၂၀၁၇ ခုနှစ်မှစ၍ ကာလီဖိုးနီးယား ပြည်နယ်၏ အထက်လွှတ်တော် (ဆီးနိတ်) အမတ် ဟဲရစ္စ တို့၏ နိုင်ငံရေးစကားစစ်ထိုးပွဲတွင် သဘာပတိ (ဝါ) မော်ဒရေတာအဖြစ် ‘အမေရိကန်နေ့စဉ်’ (USA Today) သတင်းစာတိုက်၏ မြို့တော်ဝါရှင်တန်ဗျူရို အကြီးအကဲ စူဆန်ပေ့ဂျ်က တာဝန်ယူဆောင်ရွက်သည်။

 

အိုးနင်းခွက်နင်း ကသောင်းကနင်းဆန်သော စကားစစ်ထိုးပွဲအဖြစ် ပြောစမှတ်ပြုခဲ့ကြရသော ထရမ့်- ဘိုင်ဒင် နိုင်ငံရေးစကားစစ်ထိုးပွဲအပြီး ရက်သတ္တတစ်ပတ်အကြာတွင် ပြုလုပ်သော ပင့်စ်-ဟဲရစ္စ စကားစစ်ထိုးပွဲမှာ ယခင် စကားစစ်ထိုးပွဲနှင့် နှိုင်းယှဉ်လျှင် ပိုမို၍ ဣန္ဒြေရရ ဆွေးနွေးငြင်းခုံကြပုံကို တွေ့မြင်ကြရသော်လည်း အပေါက်အလမ်း မတည့်သော တင်းမာမှုလက္ခဏာများကိုလည်း ကြိုးကြား ကြိုးကြား တွေ့မြင်ခဲ့ကြရလေသည်။

 

စကားဖြတ်မှု၊ ပုဂ္ဂိုလ်ရေးတိုက်ခိုက်မှုနှင့် မော်ဒရေတာ ဗျာများခဲ့ရမှုတို့ လွှမ်းခြုံခဲ့ရသော ထရမ့်-ဘိုင်ဒင် စကားစစ်ထိုးပွဲနှင့်မတူ တစ်မူထူးကဲလှသည့် ယခုစကားစစ်ထိုးပွဲ ကျင်းပချိန်တွင် ကိုဗစ်-၁၉ ကူးစက်ရောဂါကြောင့် ဆေးဝါးကုသမှုခံယူအပြီး အိမ်ဖြူတော်တွင် နာလန်ထူလာသူ သမ္မတ ထရမ့်က မဲဆွယ်စည်းရုံးရေးခရီးနှင်ရန် အားတက်သရော ရှိနေချိန်ဖြစ်၏။

 

သမ္မတလောင်း ဂျိုးဘိုင်ဒင်နှင့်အတူ ဒုတိယအကျော့ စကားစစ်ထိုးပွဲကို အွန်လိုင်းမှ ပြုလုပ်လိုခြင်းမရှိသူ သမ္မတ ထရမ့်မှာ ဒေါင်းတည်မောင်းတည်ရှိနေပြီး အဖိုးတန်လှသည့် မဲဆွယ်စည်းရုံးရေးကာလကို အချိန်မဖြုန်းတီးဘဲ ဆက်လက်ဖြတ်သန်းရန် တာစူလျက်ရှိသည်။

 

နိုင်ငံရေးဝါဒလမ်းစဉ်

 

ဒုတိယသမ္မတလောင်း စကားစစ်ထိုးပွဲသည် မဲဆန္ဒရှင်များ၏ သဘောထားအမြင်ကို သိသိသာသာ ပြောင်းလဲစေဖွယ်မရှိဟု ယူဆရသော်လည်း ရွေးကောက်ပွဲ၌ အကြိတ်အနယ် ယှဉ်ပြိုင်ကြမည့် ရီပတ်ဘလီကန်နှင့် ဒီမိုကရက်တစ်ပါတီတို့၏ နိုင်ငံရေးဝါဒလမ်းစဉ်ကို မဲဆန္ဒရှင်များ အကျေအလည် သိရှိနိုင်ကြစေရန် ထုတ်ဖော်ပြသပွဲအဖြစ် မှတ်ယူနိုင်ပေလိမ့်မည်။

 

ကိုရိုနာကပ်ရောဂါ မွှေနှောက်နေဆဲကာလတွင် ကျင်းပရသော စကားစစ်ထိုးပွဲမှာ ကျန်းမာရေးအရ ဆောင်ရန်၊ ရှောင်ရန်ကိစ္စရပ်များကို အလေးပေးလျက် ပြုလုပ်ခြင်းဖြစ်ပြီး စကားစစ်ထိုးသူနှစ်ဦးကို အနီးကပ် စောင့်ကြည့်သော ရွှေပွဲလာပရိသတ်များကလည်း နှာခေါင်းစည်းကိုယ်စီကိုယ်င တပ်ဆင်ကြကာ နားထောင် လျက်သားရှိနေကြ၏။ အလင်းပေါက် ပလတ်စတစ်အမာ အကာအရံ (Plexiglass) ကို တံတိုင်းသဖွယ်ခြားလျက် တစ်ဦးနှင့်တစ်ဦး ၁၂ ပေခြားကာ ရှိနေကြသော ပင့်စ်နှင့် ဟဲရစ္စတို့၏ စကားစစ်ထိုးပွဲကို ရုပ်မြင်သံကြားမှ တိုက်ရိုက် ရိုက်ကူးထုတ်လွှင့်ပေးခဲ့၏။

 

ကမ္ဘာ့ကပ်ရောဂါအပေါ် သမ္မတထရမ့်၏ အစိုးရအဖွဲ့က ကိုင်တွယ်ဆောင်ရွက်ပုံမှသည် တရားရုံးချုပ် တရားသူကြီးခန့်အပ်ရေး ကိစ္စရပ်အထိ၊ တရားဥပဒေ စိုးမိုးရေးကိစ္စရပ်မှသည် ရာသီဥတုစက်ဝန်း လည်ပတ်ပုံ ပြောင်းလဲလာသည့်ကိစ္စရပ်အထိ တစ်နံတစ်လျား နိုင်ငံရေးပြဿနာများနှင့်ပတ်သက်၍ အပြန်အလှန် ဆွေးနွေးငြင်းခုံကြရင်း နိုင်ငံရေးပင်လယ်အတွင်း လက်ပစ်ကူးခဲ့ကြ၏။

 

အောက်တိုဘာလ ၈ ရက်နေ့ ည စကားစစ်ထိုးပွဲအပြီး ဗြိတိန်အခြေစိုက် ဘီဘီစီသတင်းဌာနကြီး၏ သတင်းအချက်အလက် မှန်၊ မမှန် စိစစ်သုံးသပ်ရေးအဖွဲ့က ပင့်စ်နှင့် ဟဲရစ္စတို့၏အဟောအပြောများတွင် ပါဝင်သောအချက်အလက်များ ခိုင်လုံမှု ရှိ၊ မရှိ သုံးသပ်လေ့လာချက် ပေါ်ထွက်လာရာ နိုင်ငံရေးနှင့် ဒုံးဝေးလှသော လူပြိန်းများအတွက် အမှားနှင့်အမှန်ကို ကိုယ်တိုင်ကိုယ်ကျ ပိုင်းခြားချိန်ဆရန် အထောက်အပံ့ပေးနိုင်ပုံကို ကျွန်ုပ်စေ့ငုမိ၏။

 

ကမ္ဘာ့သတင်းဌာနများက နိုင်ငံတကာရွေးကောက်ပွဲများနှင့်ပတ်သက်၍ တာဝန်ကျေပွန်စွာ တင်ဆက်လျက်ရှိ ကြရာတွင် ဘီဘီစီသတင်းဌာနကြီး၏ “အချက်အလက်မှန် ဖော်ထုတ်ရေးအဖွဲ့” (Fact Check Team) ၏ တွေ့ရှိချက်များ အသို့ရှိသည်ကို ကျွန်ုပ်တီးခေါက်ကြည့်ရာဝယ် ဦးစွာ ပင့်စ်၏ ပြောကြားချက်နှင့်ပတ်သက်၍ သုံးသပ်ထားပုံဖြစ်၏။

 

“တရုတ်နိုင်ငံမှ ခရီးနှင်လာမှုတွေအားလုံး အမေရိကန် ပြည်ထောင်စုအတွင်းသို့ မဝင်နိုင်အောင် သမ္မတ ထရမ့်ရဲ့ အစိုးရအဖွဲ့က လုပ်ဆောင်ခဲ့တယ်” ဟူသော ပင့်စ်၏ အဟောအပြောသည် လုံးဝမှန်ကန်မှုမရှိဟု အဆိုပါအဖွဲ့က သုံးသပ်သည်။

 

ထရမ့်အစိုးရအဖွဲ့သည် တရုတ်နိုင်ငံမှ လာရောက်သူများအားလုံး ပြည်ဝင်ခွင့်မရှိစေရန် တားမြစ်ပိတ်ပင်ပေးခဲ့ခြင်းဖြင့် သိန်းပေါင်းများစွာသော အမေရိကန်ပြည်သူတို့အား ကိုရိုနာဗိုင်းရပ်စ် ဘေးအန္တရာယ်မှ ကာကွယ်ပေးနိုင်သည်ဟုဆိုသော်လည်း ပကတိအားဖြင့်မူ ပုဂ္ဂိုလ်အချို့ကို ခြွင်းချက်ပြု၍ လက်သင့်ခံခဲ့သည်ဆို၏။

 

သွေးနီးဆွေမျိုး ခြွင်းချက်

 

ဇန်နဝါရီလ ၃၁ ရက်နေ့တွင် ထုတ်ပြန်ခဲ့သော သမ္မတထရမ့်၏ အမိန့်အရ ပြည်ဝင်ခွင့် ပိတ်ပင်ခဲ့သည်ဟုဆိုသော်လည်း အမေရိကန်နိုင်ငံသားများ၊ တရားဝင်အခြေစိုက် နေထိုင်ခွင့် ရရှိထားသူများ၊ ၎င်းတို့၏ သွေးနီးဆွေမျိုးသားချင်းများကို ခြွင်းချက်ပြု၍ ပြည်ဝင်ခွင့်ပေးခဲ့သည်ဟု အချက်အလက်မှန် ဖော်ထုတ်ရေးအဖွဲ့က ဆိုသည်။

 

နယူးယောက်တိုင်းမ်သတင်းစာ၏ ဆန်းစစ်လေ့လာချက်အရ သမ္မတ ထရမ့်၏ တားမြစ်ချက် ပေါ်ထွက်လာအပြီး နှစ်လတာကာလအတွင်း လူပေါင်း ၄၀၀၀၀ ခန့်သည် အမေရိကန်ပြည်ထောင်စုသို့ တရုတ်နိုင်ငံမှ ဝင်ရောက်လာခဲ့ကြောင်း၊ လေယာဉ်ခရီးစဉ် မှတ်တမ်းအထောက်အထားများအရ ယင်းသို့ သိရှိရခြင်းဖြစ်ကြောင်း သိရသည်။

 

ကိုရိုနာဗိုင်းရပ်စ်ပိုးသည် ဓမ္မတာအရဖြစ်ပေါ်လာသည်မဟုတ်မူ၍ ‘လုပ်ဇာတ်’ အရ ဖြစ်ပေါ်လာသည်ဟု သမ္မတ ထရမ့်က ပြောဆိုခဲ့ကြောင်း အထက်လွှတ်တော်အမတ် ဟဲရစ္စက ဝေဖန်ခဲ့ပြီး သမ္မတထရမ့်သည် ကပ်ရောဂါ ဘေးဆိုးအပေါ် အလေးအနက်ထား ကိုင်တွယ်ခဲ့ခြင်းမရှိပါဟု သူက စကားစစ်ထိုးပွဲတွင် စွပ်စွဲခဲ့သည်။

 

သတင်းအချက်အလက်စိစစ်ရေးအဖွဲ့၏ တွေ့ရှိချက်မှာ သမ္မတထရမ့်သည် ကိုရိုနာဗိုင်းရပ်စ်ပိုးကို ‘လုပ်ဇာတ်’ ဟူ၍ တိုက်ရိုက်ပြောကြားခဲ့ခြင်းမရှိဟုဆိုသည်။ သဘာဝအရ ဖြစ်ပေါ်လာခြင်းမဟုတ်ဘဲ ‘လူ့ပယောဂ’ ကြောင့် ဖြစ်ပေါ်လာခဲ့သည့် ကူးစက်ရောဂါပိုးအဖြစ် သမ္မတထရမ့်က မည်သည့်အခါတွင်မျှ တိုက်ရိုက်ညွှန်းဆိုခဲ့ခြင်းမရှိပါဟု အဆိုပါအဖွဲ့က စိစစ်တွေ့ရှိရသည်။

 

ကိုရိုနာပိုးကိစ္စနှင့်ပတ်သက်၍ ဒီမိုကရက်တို့က မိမိအား နိုင်ငံရေးအရ ထိုးနှက်တိုက်ခိုက်နေသည်ဟု သမ္မတ ထရမ့်က ဖေဖော်ဝါရီလအတွင်း စွပ်စွဲပြောကြားခဲ့သည်။

 

ကိုရိုနာဗိုင်းရပ်စ်ပိုးအပေါ် ကိုင်တွယ်ဆောင်ရွက်ပုံနှင့် ပတ်သက်၍ ဒီမိုကရက်တို့ ‘လုပ်ဇာတ်’ ခင်းနေသည်ဟူ၍ သာလျှင် သမ္မတ ထရမ့်ပြောဆိုခဲ့သည်ဟု အဆိုပါအဖွဲ့က လေ့လာတွေ့ရှိရသည်။

 

ပြန်လည်ဖန်တီးပေးခဲ့

 

ကမ္ဘာ့ကပ်ရောဂါကြီးကြောင့် လူပေါင်း ၂၂ သန်းအလုပ် အကိုင်နေရာများ ဆုံးရှုံးရသည့် အခြေအနေကို မိမိတို့ ရင်ဆိုင်ခဲ့ရသော်လည်း နောက်ပိုင်းတွင် အလုပ်အကိုင် နေရာပေါင်း ၁၁ ဒသမ ၆သန်းအထိ မိမိတို့ ပြန်လည်ဖန်တီး ပေးနိုင်ခဲ့သည်ဟု ပင့်စ်က စကားစစ်ထိုးပွဲတွင် ပြောကြားခဲ့သည်။

 

ပင့်စ်၏ ပြောကြားချက်မှာ ယေဘုယျအားဖြင့် မှန်ကန်သည်ဟု အချက်အလက်မှန် ဖော်ထုတ်ရေးအဖွဲ့က ထောက်ခံချက်ပေးသည်။

 

အမေရိကန် အလုပ်သမားရေးရာ စာရင်းအင်းရုံး၏ မှတ်တမ်းအရ ယခုနှစ် မတ်လမှ ဧပြီလအထိ အမေရိကန် နိုင်ငံသား ၂၂ ဒသမ ၇ သန်း အလုပ်အကိုင်ဆုံးရှုံးခဲ့ရသည်ဟု သိရှိရသည်။

 

ထိုအချိန်မှစ၍ အလုပ်အကိုင်နေရာ ၁၁ ဒသမ ၄ သန်း ခန့်ကို ပြန်လည်ဖန်တီးပေးနိုင်ခဲ့သော်လည်း အမေရိကန် ပြည်ထောင်စု၏ အလုပ်လက်မဲ့နှုန်းမှာ ယခုထက်တိုင်အောင်ပင် ကပ်ရောက်ဂါ ဆိုက်ရောက်ခြင်းမရှိမီကာလ အခြေအနေသို့ ပြန်လည်ရောက်ရှိခြင်းမရှိပေ။

 

အမေရိကန်ပြည်ထောင်စု၏ အလုပ်လက်မဲ့နှုန်းသည် ယခုအခါ ၇ ဒသမ ၉ ရာခိုင်နှုန်းတွင် ရှိနေသည်။ ယခုနှစ် ဖေဖော်ဝါရီလ အခြေပြစာရင်းအရမူ ၃ ဒသမ ၅ ရာခိုင်နှုန်း တွင် ရှိခဲ့သည်။

 

ပြီးဆုံးခဲ့သောလပေါင်း အတန်ကြာကာလအတွင်း လူပေါင်းသန်း ၃၀ ကျော်သည် အလုပ်လက်မဲ့များအတွက် လူမှုဖူလုံရေး အကျိုးခံစားခွင့်ရရှိရန် လျှောက်ထားခဲ့ကြသည် ဟု ဟဲရစ္စက ပြောကြားခဲ့ပြီး ယင်းမှာ ဖေဖော်ဝါရီလ နောက်ပိုင်း အမှန်တကယ်ရှိနေခဲ့သော ကိန်းဂဏန်းအမှန် ဖြစ်သည်ဟု လေ့လာတွေ့ရှိရသည်။

 

ဖေဖော်ဝါရီလတွင် ကူးစက်ရောဂါ စတင်ဖြစ်ပွားခဲ့ပြီးနောက် လူပေါင်း သန်း ၃၀ က အလုပ်လက်မဲ့ လူမှုဖူလုံရေး အကျိုးခံစားခွင့် လျှောက်ထားခဲ့ကြပြီး ယခုအခါ ယင်းသို့ လျှောက်ထားသူဦးရေ ၁၂ သန်းခန့်တွင် တန့်နေသည်ဟု အလုပ်သမားရေးရာ စာရင်းအင်းအဖွဲ့၏ အစီရင်ခံစာတွင် ဖော်ပြထားသည်။

 

သမ္မတထရမ့်နှင့် မိမိတို့သည် ကျန်းမာရေးစောင့်ရှောက်မှုလုပ်ငန်း တိုးတက်စေမည့် အစီအစဉ်တစ်ရပ်ကို ပြင်ဆင်ထားခဲ့ကြပြီး အမေရိကန်နိုင်ငံသားတိုင်း ကပ်ဘေးမဆိုက်မီ အခြေအနေသို့ ပြန်လည်ရောက်ရှိစေရေးအတွက် ကြိုးပမ်းခဲ့ကြကြောင်း ပင့်စ်၏ပြောကြားချက်နှင့် ပတ်သက်၍ သတင်းအချက်အလက် စိစစ်ရေးအဖွဲ့က ဆန်းစစ်ကြည့်ရာတွင် သူတို့၏ အစီအစဉ်များနှင့်ပတ်သက်၍ အသေးစိတ် အချက်အလက်များကို မတွေ့ရှိရဟု ဆိုသည်။

 

စကားစစ်ထိုးပွဲတွင် နှစ်ဖက်အရှိန်မြှင့်၍ တိုက်ခိုက်ပြောဆိုခဲ့ကြရသော အကြောင်းရပ်မှာ လူမျိုးခွဲခြားမှု ပြဿနာနှင့် လူမည်းများ ပါဝင်ပတ်သက်နေသော ရာဇဝတ်မှုခင်းများတွင် ရဲတပ်ဖွဲ့ဝင်များ၏ ကိုင်တွယ်ဆောင်ရွက်ပုံ နှင့် ဆက်နွှယ်နေသော အကြောင်းရပ်ဖြစ်သည်။

 

ပြင်းပြင်းထန်ထန် ဝေဖန်

 

လူမည်းတို့၏ ဆန္ဒပြပွဲများအတွင်း အကြမ်းဖက်မှုများ ပေါ်ပေါက်ပါက ရဲတပ်ဖွဲ့က အင်အားအလုံးအရင်း အသုံးပြုသည့် ဖြစ်စဉ်များနှင့်ပတ်သက်၍ ဆွေးနွေးကြရာတွင် ဟဲရစ္စက နှုတ်သီးကောင်းလျှာပါး ပြင်းပြင်းထန်ထန် ဝေဖန်နိုင်ခဲ့သည်။ ဆန်ဖရန်စစ္စကို အစိုးရရှေ့နေ၊ ကာလီဖိုးနီးယားပြည်နယ် ရှေ့နေချုပ်ရာထူးများတွင် တာဝန်ထမ်းဆောင်ခဲ့ဖူးသူ ဟဲရစ္စမှာ တရားဥပဒေ စိုးမိုးရေး အရေးကြီးပုံကို ချက်နှင့်လက်နှင့် ထိထိမိမိ ပြောဆိုနိုင်ခဲ့သည်။

 

ရာသီဥတုပြောင်းလဲမှုနှင့် စီးပွားရေးဘဝ သာတူညီမျှမှု မရှိသည့်ပြဿနာကို အလေးပေးကိုင်တွယ်ရန် ရည်ရွယ်သော “အစိမ်းရောင် သဘောတူညီချက်သစ်” (Green New Deal) ဥပဒေမူကြမ်း အဆိုပြုချက်ကို တင်သွင်းခဲ့သူ ဟဲရစ္စကို ပင့်စ်က တုံ့ပြန်ပြောဆိုရာတွင် အမေရိကန်၏ စွမ်းအင် အရင်းအမြစ်များကို ဖျက်ဆီးပစ်မည့် အဆိုပြုအချက်အဖြစ် ပင့်စ်က သတိပေးခဲ့သည်။

 

ပင့်စ်နှင့် ဟဲရစ္စတို့၏ စကားစစ်ထိုးပွဲများ မိနစ် ၉၀ ကြာမြင့်ခဲ့ပြီး နှစ်ဦးစလုံးအနေဖြင့် ထိထိမိမိ ပြောဆိုနိုင်မှု များရှိသလို အားနည်းချက်အချို့လည်း ရှိခဲ့သည်ဟု သုံးသပ်ရသည်။

 

ဒီမိုကရက်တစ်နှင့် ရီပတ်ဘလီကန်ပါတီတို့၏ အနာဂတ်ဘဝကို ဖော်ကျူးနေသော စကားစစ်ထိုးပွဲသည် ပြည်သူများ၏ အကျိုးစီးပွားကို အမှန်တကယ်သယ်ပိုး ပေးမည့်အစိုးရအဖွဲ့ ပေါ်ထွန်းလာစေရေးအတွက် မဲဆန္ဒရှင် ပြည်သူများက ဆက်လက်စောင့်စားကြည့်ရှုကြရပေလိမ့်မည်။

 

ထိုစဉ်အတွင်း သမ္မတလောင်းများ၏ ဒုတိယအကျော့ စကားစစ်ထိုးပွဲ ပျက်သွားရပြီဖြစ်ကြောင်း သမ္မတ လောင်းများ စကားစစ်ထိုးပွဲ ကျင်းပရေးကော်မရှင်က အောက်တိုဘာ ၉ ရက်တွင် ထုတ်ပြန်ကြေညာခဲ့သည်။

 

သမ္မတထရမ့်သည် ကိုဗစ်-၁၉ ကူးစက်ရောဂါအတွက် ဆေးဝါးကုသမှုခံယူခဲ့ရသဖြင့် ဖလော်ရီဒါပြည်နယ် မိုင်ယာမီမြို့၌ အောက်တိုဘာလ ၁၅ ရက်နေ့တွင် ကျင်းပရန် စီစဉ်ထားသော စကားစစ်ထိုးပွဲကို အွန်လိုင်း အသုံးပြု၍ ကျင်းပရန် ကော်မရှင်က ဆုံးဖြတ်ခဲ့သော်လည်း သမ္မတ ထရမ့်က အွန်လိုင်းစကားစစ်ထိုးပွဲတွင် သူပါဝင်မည်မဟုတ်ဟု ချက်ချင်းတုံ့ပြန်ပြောဆိုခဲ့သည်။

 

လတ်တလောတွင်မူ ကျင်းပပြုလုပ်ခဲ့ပြီးသော စကား စစ်ထိုးပွဲပေါ်မှနေ၍ ပြတ်ပြတ်သားသားရလဒ်များ ထွက်ပေါ်လာခြင်း မရှိသေးချေ။

 

သမ္မတလောင်း တတိယအကျော့ စကားစစ်ထိုးပွဲကို တင်နက်ဆီပြည်နယ် နက်ရှ်ဗီးလ်မြို့၌ ကျင်းပရန် စီစဉ်ထားပြီး ပြိုင်ဘက်ပါတီကြီး နှစ်ပါတီအကြား ယှဉ်ပြိုင်မှုများ ဆက်လက်မြင့်တက်နေမည့်အရေးကို ကျွန်ုပ် အလေးပေးတွေးတောမိရင်း “ပြည်သူ့မျှော်လင့်ချက် နိုင်ငံရေးခရီးဆက်” ဟု ကျူးရင့်မိပါ သတည်း။ ။

 

ကိုးကား - Daily News