ရန်ကုန် ၂၈ ဇန်နဝါရီ
မြန်မာနိုင်ငံတိုင်းရင်းသားလုပ်ငန်းရှင်များအသင်းကကြီးမှူး၍မြန်မာတိုင်းရင်းသားတို့၏ ရိုးရာယဉ်ကျေးမှုပြပွဲနှင့် ခရီးသွားလုပ်ငန်းမြှင့်တင်ရေးပွဲတော်အဖြစ် “သွေးချင်းတို့ ရဲ့ပွဲတော်ဆီ” ပွဲတော်၏ စတုတ္ထနေ့ကို ဆက်လက်ကျင်းပလျက်ရှိပြီး Miss Ethnic Myanmar ၏ နောက်ဆုံးပြိုင်ပွဲဖြစ်သည့်တိုင်းရင်းသားအလှမယ်ရွေးချယ်ပွဲကိုပွဲတော် ပဉ္စမနေ့ညပိုင်းတွင် ကျင်းပသွားမည်ဖြစ်ကြောင်းပွဲတော် သတင်းပြန်ကြားရေးအဖွဲ့မှ သိရသည်။
ယနေ့ကျင်းပသည့် စတုတ္ထနေ့ပွဲတော်တွင် ခရီးသွားလုပ်ငန်းရှင်များ၏ ပြခန်းများ နှင့် ဒေသအလိုက် သဘာဝတန်ဖိုးမြှင့် ထုတ်ကုန်များ၊ တိုင်းနှင့်ပြည်နယ်များမှ တိုင်းရင်း သားတို့၏ဒေသအလိုက် ခရီးသွားလုပ်ငန်းများ၊စီးပွားရေးလုပ်ငန်းများ၊ ခရီးသွား ဒေသများနှင့်အထင်ကရနေရာများ၊ ဒေသထွက်ကုန် အမှတ်တရလက်ဆောင်ပစ္စည်း အရောင်းပြခန်းများ၊ တိုင်းရင်းသားရိုးရာစားသောက်ကုန်အရောင်းဆိုင်ခန်းများသို့ လာရောက်ကြည့်ရှု အားပေးကြသူများနှင့်စည်ကားလျက်ရှိသည်။
“သွေးချင်းတို့ရဲ့ပွဲတော်ဆီ” ပွဲတော်တွင် မြန်မာပြည်ဒေသအနှံ့အပြားမှ မြန်မာ တိုင်းရင်းသား၁၃၅မျိုးတို့၏ ရိုးရာ၊ ယဉ်ကျေးမှု၊ ဓလေ့၊ အဝတ်အထည်နှင့်စားသောက်ကုန်များ၊ စာပေ၊ ဂီတတူရိယာများ၊ ရိုးရာဓလေ့လုပ်ငန်းသုံးပစ္စည်းများ၊ တိုင်းရင်းဆေးများ၊ တိုင်းရင်းသားလူမျိုးအလိုက်သမိုင်း၊ လွတ်လပ်ရေးအတူကြိုးပမ်းရယူခဲ့ကြသည့် သမိုင်းများ၊ စာအုပ်စာပေများ၊ စီးပွားရေးလုပ်ငန်းများ၊ ဒေသထွက်ကုန်များကိုခင်းကျင်း ပြသထားသည်။
“သွေးချင်းတို့ရဲ့ပွဲတော်ဆီ” ပွဲတော်ကို မြန်မာနိုင်ငံတိုင်းရင်းသားလုပ်ငန်းရှင်များ အသင်းကကြီးမှူး၍ ရန်ကုန်မြို့၊ တာမွေမြို့နယ်၊ ကျိုက္ကဆံအားကစားကွင်း၌နံနက် ၁၁ နာရီခွဲမှ ည ၁၀နာရီကျော်အထိကျင်းပလျက်ရှိရာ ဇန်နဝါရီ ၃၀ရက်အထိ ဆက်လက် ကျင်းပသွားမည်ဖြစ်ကြောင်းသိရသည်။
သတင်း - သန့်ဇင်ဝင်း၊ ဓာတ်ပုံ-ဇော်မင်းလတ်
