ဇန်နဝါရီ ၅
စပါးဈေးကွက် မတည်ငြိမ်မှုများ အနည်းနှင့်အများဆိုသလို ရှိနေသော်လည်း ရွှေဘိုနယ်မှထွက်ရှိသည့် ပေါ်ဆန်းစပါးဈေးကွက်မှာမူ နှစ်စဉ် ကောင်းမွန်ခိုင်မာမှုရှိနေကြောင်း ဒေသခံများထံမှ သိရသည်။
“ကျွန်တော်က ပေါ်ဆန်း/ဘေးကြားကို ၃၈ ဧကဝန်းကျင် စိုက်ပျိုးထားပါတယ်။ ပေါ်ဆန်းက ဈေးကွက် ကောင်းတဲ့အပြင် ကျွန်တော်တို့ဒေသမှာစိုက်ပျိုးတဲ့အခါ အရည်အသွေးကောင်း ထွက်တာကြောင့် စိုက်ပျိုးဖြစ်ခဲ့တာပါ။ ရွှေဘိုနယ်ကထွက်တဲ့ ပေါ်ဆန်းဆိုရင် အရည်အသွေးကောင်းမွန်တဲ့အတွက် ဝယ်လက်တွေက ကြိုက်ကြတယ်။ တစ်နိုင်ငံလုံးက စပါးစိုက်တောင်သူတွေထဲမှာ ရွှေဘိုနယ်က တောင်သူတွေက ကံအကောင်းဆုံးလို့ ပြောလို့ရပါတယ်။ ဈေးကွက်ပျက်တာမျိုး မရှိပါဘူး။ ဈေးကွက် ခိုင်မာမှု ရှိနေပါတယ်”ဟု စစ်ကိုင်းတိုင်းဒေသကြီး၊ ရွှေဘိုမြို့နယ်၊ လိပ်ချင်းကျေးရွာမှ ပေါ်ဆန်း/ ဘေးကြား စိုက်ပျိုးသူ ကိုမျိုးမင်းသန်းက ပြောသည်။
ပေါ်ဆန်း/ဘေးကြားစပါး စိုက်ပျိုးရာတွင် ဒေသတစ်ခုနှင့်တစ်ခု စိုက်ပျိုးနည်းစနစ်နှင့် စိုက်ပျိုးကုန်ကျ စရိတ်များ မတူညီဘဲ၊ အကြမ်းဖျဉ်းအားဖြင့် တစ်ဧကစိုက်ပျိုးစရိတ်မှာ ကျပ်(၄)သိန်းမှ ကျပ်(၅)သိန်း အတွင်း ကုန်ကျနိုင်ကြောင်း သိရသည်။
“အထွက်နှုန်းကတော့ တစ်ဧကကို တင်း (၇၀) ကနေ တင်း (၁၀၀) ကြား ထွက်ရှိပါတယ်။ အထွက်နှုန်း က သွင်းအားစု ကျွေးမွေးပုံနဲ့ ပြုစုစောင့်ရှောက်ပုံအပေါ်လည်း မူတည်ပါတယ်။ တစ်ဧက စိုက်ပျိုးစရိတ် ကလည်း တစ်ယောက်နဲ့တစ်ယောက် မတူညီနိုင်ပါဘူး။ တချို့ကျတော့ မိသားစုဝင်များတော့ ကိုယ့်လယ်ကို ကိုယ်တိုင်စိုက်ပျိုးကြတယ်။ လုပ်သားစရိတ် မကုန်ကျတာမျိုးလည်း ရှိနိုင်ပါတယ်။ ရွှေဘို ပေါ်ဆန်းစိုက်တယ်ဆိုရင် အဓိကကတော့ မျိုးကောင်းမျိုးသန့် ရရှိဖို့ပါပဲ။ နောက်တစ်ခု သတိထား ရတာကတော့ ပိုးမွှားရောဂါ ကျရောက်မှုပါပဲ။ တခြားသီးနှံတွေထက်စာရင် ပိုးမွှားကြိုက်တတ်တဲ့ သီးနှံ မို့လို့ပါ။ ကြွက်တို့ ဆစ်ပိုးတို့ ကိုက်တတ်တယ်။ စိုက်ပျိုးတဲ့အခါမှာ အဲ့ဒီအချက်လေးတွေ သတိထား ရပါတယ်”ဟု ကိုမျိုးမင်းသန်းက ဆက်လက်ပြောသည်။
ရွှေဘိုနယ်မှ ထွက်ရှိသော ပေါ်ဆန်း/ဘေးကြားများကို ကုန်သည်/စက်ပိုင်များမှတဆင့် ရန်ကုန်မြို့နှင့် တခြားဒေသများသို့ တင်ပို့ရောင်းချနေပြီး၊ စပါးဈေးအနေဖြင့် စပါးတင်း (၁၀၀) လျှင် (၁၀) သိန်းကျပ်နှင့် အထက် ရရှိနေကြောင်း သိရသည်။
နန်းထက်ထက်ချစ်
