သတင်းဆောင်းပါး - ကိုရင်သြ

 

“ရုပ်ရှင်” ထက်ပင် “ရင်ရှုပ်” စရာကောင်းလှသည့် ပကတိ လောကဓံတရားများကို ကျွန်ုပ်၏ ဘဝဖြတ်သန်းမှုတွင် ကြိုးကြားကြိုးကြား တွေ့ကြုံခံစားခဲ့ရဖူးခြင်းကြောင့် လည်းကောင်း၊ သမုဒ္ဒရာဝမ်းတစ်ထွာ မိသားစုအရေးအတွက် နေ့မအား၊ ညမနား ဇယ်ခုပ်သလို လုပ်ကိုင်စားသောက်နေရသည့် ဘဝတွင် ကာလအတော်များများ ကျင်လည်နေရကာ ဃရာဝါသမှု အတောမသတ်ဖြစ်နေခြင်းကြောင့် လည်းကောင်း၊ စာတိုပေစ ရေးသားခြင်းဖြင့် “အချိန်” နှင့် “ကျွန်ုပ်” လိုက်တမ်းပြေးတမ်း ကစားဘိသကဲ့သို့ တဝဲလည်လည်ဖြစ်နေသည်က အလေးသာနေခြင်းကြောင့်လည်းကောင်း ရုပ်ရှင်ဇာတ်ကားကို ပြီးဆုံးသည့် တိုင်အောင်တရစပ်ကြည့်ရှုနိုင်ခြင်းမရှိ။ အဆုံးတိုင် အားပေးနိုင်ခြင်းလည်း မရှိသည့် ကျွန်ုပ်သည် ရုပ်ရှင်အနုပညာကို တန်ဖိုးထားလေးစားသူဖြစ်ပါလျက်၊ အနုပညာဂုဏ်သိန်ကြီးမြတ် ထည်ဝါလှသော အလွှာပါးပါး ဖလင်ကော်ပြားပေါ်မှ ပုံရိပ်များကို ကြည့်ရှုခံစားချင်ပါလျက်၊ တွေးတောငေးမောကြည့်ချင် ဇောရှိပါလျက် မကြည့်ရှုနိုင်ခဲ့သည်မှာ နှစ်ပရိစ္ဆေဒအတန်ကြာမျှရှိခဲ့ချေပြီ။

 

သို့တစေ ဖေဖော်ဝါရီလ ၁၆ ရက်နေ့ထုတ် “ကြေးမုံ” သတင်းစာတွင် ပါရှိလာသည့် သတင်းတစ်ပုဒ်က ကျွန်ုပ်၏ ရွှေရင်အစုံကို တစ်မျိုးတစ်ဖုံ လှုပ်ခတ်သွားစေခဲ့ရ၏။ အကြောင်း မူကား ကျွန်ုပ်တို့၏ အမိမြန်မာနိုင်ငံတော်သို့ ပြည်ပမှ အကျော် ဇေယျရုပ်ရှင် ကုမ္ပဏီတစ်ခုက လာရောက်၍ ရုပ်ရှင်ဇာတ်ကား ရိုက်ကူးမှု စတင်ပြုလုပ် မည်ဆိုသော သတင်းတစ်ပုဒ်၏ နှိုးဆော်မှုအရ ဖြစ်၏။

 

မြန်မာကို ကမ္ဘာကသိစေသည့် ရည်ရွယ်ချက်

 

ယဉ်ကျေးမှုအရလည်း နွေးထွေးစေ၊ အနုပညာအရလည်း ပေါင်းစည်းစေ၊ မြန်မာကိုလည်း ကမ္ဘာကသိစေ စသည့်ကောင်းမြတ်သော ရည်ရွယ်ချက်များနှင့်အတူ ဖြစ်တည်လာသော ရုပ်ရှင်ဇာတ်ကား တစ်ကား အဖြစ် Line Walker-2  ဟူ၍ အမည်သညာပြုထားသော “အက်ရှင်” ဇာတ်ကား တစ်ကားကို ရန်ကုန်မြို့၌ ရိုက်ကူးမည်ဆိုသော သတင်းမှာ ရုပ်ရှင်ကို ချစ်မြတ်နိုးသော မြန်မာပရိသတ်ကြီးအတွက် တစ်မူထူးခြား လှပေရကား ရှားတောင့်ရှားခဲ ဇာတ်ကားမျိုးကို ဖန်တီး ရန် သူတို့ဘဇာကြောင့် လုပ်ကိုင်နေကြပါသနည်းဟု ကျွန်ုပ်စေ့ငု လေ့လာမိလေသည်။

 

မြန်မာနိုင်ငံ၌ ရုပ်ရှင်ဇာတ်ကားရိုက်ကူးရန် ပြင်ဆင်နေသော ပြည်ပရုပ်ရှင်ကုမ္ပဏီမှာ ]]ရှောဘရားသား}}ဟု တိုင်းတုန်ပြည်တုန်သိရှိကြသော Shaw Brother Pictures International Ltd. ဖြစ်၏။ တရုတ်နိုင်ငံ ဟောင်ကောင်အခြေစိုက် ယင်းကုမ္ပဏီမှာ ယင်းဒေသ၏ အကြီးဆုံးရုပ်ရှင်ထုတ်လုပ်ရေးလုပ်ငန်းတစ်ခုဖြစ်ပြီး အထူးအောင်မြင်ကျော်ကြား ရေပန်းစားခဲ့သော Line Walker ရုပ်ရှင်ဇာတ်ကား၏ အဆက်အဖြစူ်ငညန Line Walker – 2 ဇာတ်ကားကို ရန်ကုန်မြို့၌ လာရောက် ရိုက်ကူးမည်ဆို၏။

 

“ရှောဘရားသား” သည်ကား ရုပ်ရှင်ဇာတ်ကားပေါင်း ၁၀ဝ၀ ကျော် ရိုက်ကူးခဲ့သည့် ရုပ်ရှင်ကုမ္ပဏီကြီး ဖြစ်ပြီးလျှင်ကွန်ဖူး (ဝါ) တရုတ်သိုင်းကားများဖြင့် ကမ္ဘာကျော်ကြား လူသိများ၏။

 

ရန်ကုန်မြို့လယ်၌ ဖေဖော်ဝါရီလ ၁၇ ရက်တွင် အစမ်း လေ့ကျင့် ရိုက်ကူးမည်ဟု သိရှိရပြီး ဖေဖော်ဝါရီလ ၁၈ ရက်တွင်မြန်မာတို့၏ နှလုံးသည်းပွတ်ဖြစ်သော သိင်္ဂုတ္တရ ကုန်းတော်ပေါ်ရှိရွှေတိဂုံစေတီတော်အနီးတစ်ဝိုက်တွင် အစမ်းလေ့ကျင့် ရိုက်ကူး ရန် စီစဉ်ထားသည်။ အပီအပြင် ရုပ်ရှင်ရိုက်ကူးမှုကို ဖေဖော်ဝါရီလ ၂၁ ရက်တွင် စတင်ပေလိမ့်မည်။

 

Line Walker (ဝါ) Operation Mid-night Shadow (ဝါ) “ညသန်းခေါင်အရိပ်မည်းစစ်ဆင်ရေး” ဟု ညွှန်းဆိုထားသော ယင်းဇာတ်ကားမှာ လူကုန်ကူးမှု တိုက်ဖျက်ရေးဆိုင်ရာ သုတ၊ ရသ အက်ရှင်ဇာတ်ကား တစ်ကား ဖြစ်လေသည်။

 

မြန်မာနိုင်ငံ၌ ယခင်က တစ်ကြိမ်တစ်ခါဖူးမျှ ရုပ်ရှင်ရိုက်ကူးခြင်း အတွေ့အကြုံမရှိခဲ့သော ဒါရိုက်တာ ချင်ကာလော့သည် “စတန့်” ထွင်လုံး အံ့ဖွယ်သရဲ ခက်ခက်ခဲခဲ စွန့်စားခြင်း ပြကွက်များကို ရိုက်ကူးနိုင်ရန် ဟန်ရေးကြွယ်လျက် လမိုင်းကပ်နေပုံရသည်။ 

 

 

မြန်မာနိုင်ငံသို့ ပိုမိုလာရောက်စေရန်တွန်းအား တစ်ရပ်ဖြစ်စေ

 

ဝါရင့်သမ္ဘာရင့် ပြည်ပရုပ်ရှင်ထုတ်လုပ်ရေး ကုမ္ပဏီကြီးက မြန်မာနိုင်ငံ၌ ရုပ်ရှင်ဇာတ်လမ်းကောင်းတစ်ပုဒ် ပုံဖော်ထုတ်လုပ်ခြင်းဖြင့် ကျွန်ုပ်တို့၏နိုင်ငံမှာ ရုပ်ရှင်လုပ်ငန်းကဏ္ဍကို အားပေး မြှင့်တင်ရာရောက်သည့်အပြင် ကျွဲကူးရေပါ ဟူဘိသို့ က္ဘာလှည့်ခရီးသွားဧည့်သည်များ မြန်မာနိုင်ငံသို့ ပိုမိုလာရောက်စေရန်တွန်းအားတစ်ရပ် ဖြစ်စေလိမ့်မည်။ 

 

ဧကန်မူကား “ရုပ်ရှင်” ဟူသည် ပရိသတ်ကို “ရင်ရှုပ်” စေသောအရာ မဟုတ်ပါချေ။ ရုပ်ရှင်တည်းဟူသော အနုပညာသည် ကမ္ဘာပေါ်တွင် အရေးပါသော အနုပညာတစ်ရပ်အဖြစ်အခိုင်အမာ ရပ်တည်နေဆဲဖြစ်သည်။

 

ကမ္ဘာတစ်လွှားတွင် လူမျိုးမရွေး၊ ဘာသာမရွေး အပြန် အလှန် နားလည်မှုရရှိစေရေးအတွက် ရုပ်ရှင်လောကသားတို့က မဆုတ်မနစ် ကြိုးပမ်းလျက်ရှိကြပြီးလျှင် ဂန္ထဝင်မြောက် ရုပ်ရှင်ဇာတ်ကားများမှာ ခေတ်စနစ်တို့ အလီလီပြောင်းပါစေ၊ မဟောင်းဘဲ၊ မပြောင်းဘဲ ခေတ်လူသားတို့ကို ထာဝစဉ်အမှတ်တရ ရှိနေစေမည်သာတည်း။

 

စစ်ကို အခြေခံသော၊ အချစ်ကို ဗဟိုပြုသော၊ စွန့်စားခန်းကိုဇာတ်အိမ်ပြုသော၊ လောကီထုပ္ပတ် လူတို့ဇာတ်ကို ပဓာနပြုသော၊ သမိုင်းမှတ်တမ်းများကို ညွှန်းဆိုသော၊ သိပ္ပံနှင့် နည်းပညာကိုအလေးကဲသော၊ ဘဝဒဿနကို ဖွင့်ဆိုရှင်းပြသော၊ မျက်မှောက်နိုင်ငံတကာရေးရာများကို သရုပ်ဖော်ကျူးသော၊ ဘဝသရုပ်ကိုဖော်ထုတ် ပညာပေးသော ရုပ်ရှင်ဇာတ်ကားကောင်းများသည်ဂန္ထဝင်ဇာတ်ကားများအဖြစ် မညှိုးဂုဏ်ရောင်ထွန်းပြောင်နေ ပေလိမ့်မည်။

 

ရုပ်ရှင်အနုပညာရှင်ကြီးများ၏ အာစ္ဏိ (ဝါ) အလေ့အကျင့် ထုံမွမ်းမှုနှင့်အတူ ထမင်းမေ့ဟင်းမေ့ ဖြစ်စရာ လက်ရာ ကောင်းများကို ဖန်တီးကြသောအခါ အနုပညာအရ လက်ခမောင်းခတ်နိုင်သော ရုပ်ရှင် ဇာတ်ကားကောင်းများ ပေါ်ထွန်းလာပြီးလျှင် ပရိသတ်၏ လက်ခုပ်ဩဘာသံများကိုသောသောညံစေပါလိမ့်မည်။

 

ဤတွင်ရွေ့ကား ရုပ်ရှင်အနုပညာရှင်များအနေဖြင့်လမ်းမှန်ကမ်းမှန် သရုပ်မှန်စွာ သူ့ထက်ငါ ထူးကဲလျက် အစွမ်းပြကြဖို့ လိုလိမ့်မည်။ ထို့ပြင် တစ်ဝ အနုပညာလုံးရပ်သဏ္ဌာန်မှန်ကန်ကြဖို့၊ “ဿျှို”ရှိကြဖို့လိုလိမ့်မည်ဟု ကျွန်ုပ်တွေးဆမိ၏။ ဧကန်မူကား ရုပ်ရှင်ဗျူဟာမှာ ကြီးမြတ်သော သဘောသ္ဌာန်ကို ဆောင်ပြီး မိမိနိုင်ငံ၏ ပရိသတ်ကို ဖမ်းစားနိုင်ရုံမျှ သက်သက်မဟုတ် ကမ္ဘာ့ပရိသတ်ကြီးအထိ ဆွဲဆောင်စည်းရုံး နိုင်ဖို့ လိုပေသည်။

 

ရုပ်ရှင်လောကသားများ အားလုံးအတွက် “စေတနာ” မှန်ကြပြီဆိုလျှင် ကုသိုလ်လည်းရ ဝမ်းလည်းဝ အလုပ်ဖြစ်လိမ့်မည်။ ကုသိုလ်ဟူသည် “ကောင်းကျိုး”ကို ဆိုလို၏။ 

 

ရုပ်ရှင်သည် “ဂလိုဘယ်” ဖြစ်၏ (ဝါ) ကမ္ဘာနှင့် ချီ၏။ မိမိ၏နိုင်ငံကို ကမ္ဘာက သိစေ၏။ ကမ္ဘာကို မိမိ၏ နိုင်ငံက သိစေ၏။ရုပ်ရှင်ဇာတ်ကား တစ်ကားအတွက် “မှန်ကိုင်” မှသည်ဒါရိုက်တာအထိ ကိုယ့်အလုပ်အပေါ် စေတနာထားကြလျှင်ဆုလာဘ်ကို ရရှိခံစားထိုက်ပေသည်။ ပြည်သူတို့က ချီးမွမ်း ဂုဏ်ပြုကြပေမည်။ ချစ်ခင် မြတ်နိုးကြပေမည်။

 

ပြည်သူတို့ကို အပန်းလည်းပြေစေ၊ စိတ်လည်း ရွှင်စေ၊ မှတ်သားစရာလည်း ကျန်စေအောင် အနုပညာ အတတ်ဖြင့်ဝိုင်းဝန်းပုံဖော် ထုဆစ်ကြသောအခါ အလင်္ကာမြောက်ရုပ်ရှင်ကားများ ဖြစ်တည်လာ၏။

 

ပြုံးရွှင်ခြင်း၊ ရယ်မောခြင်း၊ ချစ်ကြိုက်ခြင်း၊ သနားကြင်နာ ခြင်း၊ လွမ်းဆွတ်ခြင်း၊ ကြေကွဲခြင်း၊ အံ့ဩခြင်း စသည့် ရသများ နှင့်အတူ ပြည်သူတို့ကို (ဝါ) ကမ္ဘာသားတို့ကို ဖျော်ဖြေပေးရန်၊ ပညာပေးရန် လုပ်ဆောင်ကြရသည်မှာ ရုပ်ရှင်ဖြစ်ပြီးလျှင်လူသားတို့ တသသကျန်ရစ်စေမည့် ရုပ်ရှင်ကားကောင်းများ ပေါ်ထွန်းလာပါစေကြောင်း ကျွန်ုပ်ဆန္ဒပြုမိပါသည်။

 

ရုပ်ရှင်သည် မီးခိုးမထွက်သောစက်ရုံ (ဝါ) ခရီးသွားလုပ်ငန်း ကို အကျိုးပြုစေနိုင်သည်ဟု ကျွန်ုပ်ရှုမြင်မိသည်။

 

ဒါရိုက်တာ Peter Jackfon ရိုက်ကူးသည့် ''The Lord of the Rings(LOIR)''  ဇာတ်ကားများကြောင့် နယူး ဇီလန်သည် နိုင်ငံခြားခရီးသွားများ ပိုမိုများပြားစေခဲ့သည်။ ၂၀၁၄ ခုနှစ်မှစ၍ ယင်းဇာတ်ကားရိုက်ကူးသည့် ရိုက်ကွင်းနေရာ သို့ သွားရောက်လေ့လာသူ နိုင်ငံခြားသားများ တစ်နှစ်လျှင်ပျမ်းမျှ ၄၇၀ဝ၀ ကျော်ရှိသည်။

 

ဒါရိုက်တာ Ron Howard ရိုက်ကူးသည့် ''The Da Vinci Code (2016)''  ဇာတ်ကားကြောင့် ပြင်သစ်နိုင်ငံပါရီမြို့ရှိ''Louvre'' ပြတိုက်ကြီးမှာ ထောင်ပေါင်းများစွာသော နိုင်ငံခြားသားများ ပိုမို လာရောက်လေ့လာခဲ့ပြီး စကော့တလန်ရှိ ''The Little Roslyn Chapel (Collegiate Chapel of St. Matthew )'' မှာ ဥရောပ၌ ခရီးသွားများအား ဆွဲဆောင်မှု အရှိဆုံး နေရာများအနက် တစ်ခုအဖြစ် ပါဝင်လာသည်။

 

''The Games of Thrones''  ဇာတ်လမ်းတွဲများ ကြောင့်လည်း ခရိုအေးရှားသို့ နိုင်ငံခြားသား ခရီးသွားများ ပိုမိုဝင်ရောက်ခဲ့သည်။

 

ဟောလိဝုဒ် Blockbuster  (ဝါ) ဝက်ဝက်ကွဲ ဇာတ်ကား တစ်ကားဖြစ်သည့် Warner Bros, Legendary Entertainment and Tencent Production က ထုတ်လုပ်သည့် Kong: Skull Island ဇာတ်ကား၏ ၇၀ ရာ ခိုင်နှုန်းခန့်ကို ဗီယက်နမ်နိုင်ငံ၌ ရိုက်ကူးခဲ့ပြီးနောက် ခရီးသွာလုပ်ငန်းအနေဖြင့် ယင်းရုပ်ရှင် ဇာတ်ကားရိုက်ကူးရာ ပြည်နယ်သုံးခု၌ Kong: Skull Island Road ဟူ၍ အရောင်း မြှင့်တင်ရေး ဆောင်ရွက် နိုင်ခဲ့ပြီး နိုင်ငံခြားခရီးသွားဧည့်သည်များသာမက ပြည်တွင်းခရီးသွား ဧည့်သည်များကိုပါ ဆွဲဆောင်နိုင်ခဲ့သည်။

 

ဗီယက်နမ်တို့အနေဖြင့် ၎င်းရုပ်ရှင်ဇာတ်လမ်းကိုအကြောင်းပြု၍ အမေရိကန် ဒါရိုက်တာ Jordan Vogt-Roberts အား နိုင်ငံ၏ ပထမဆုံးသော နိုင်ငံခြားသား Tourism Ambassador အဖြစ် ခန့်အပ်ခဲ့သည်။

 

Mr. Jordan အနေဖြင့် ဗီယက်နမ်ပြည်တွင်း ရုပ်ရှင်လောကနှင့် ပူးပေါင်းကာ ဗီယက်နမ်နှင့် နိုင်ငံတကာ ရုပ်ရှင်သရုပ်ဆောင်များ ပါဝင်သည့် ပရော်ဖက်ရှင်နယ် ပရောဂျက်တစ်ခုကို ဟိုချီမင်းမြို့၌ ဆောင်ရွက်ရန် စီစဉ်ထားရှိပြီး ကမ္ဘာ့အကြီးဆုံးဂူဖြစ်သည့် Son Dong ဂူ၌ ရိုက်ကူးရန် ဆောင်ရွက်လျက်ရှိသည်ဟု ကျွန်ုပ် လေ့လာမှတ်သားရ၏။

 

ကမ္ဘာလှည့်ခရီးသွားလုပ်ငန်း မြင့်မားတိုးတက်မှုကိုဖြစ်စေ

 

မိမိ၏နိုင်ငံတွင် ရိုက်ကူးသော ရုပ်ရှင်ဇာတ်ကားတစ်ကားသည် နိုင်ငံတကာသို့ ပျံ့နှံ့ရောက်ရှိခြင်းဖြင့် ကမ္ဘာလှည့်ခရီးသွား လုပ်ငန်း မြင့်မားတိုးတက်မှုကို ဖြစ်စေသော သာဓက ယုတ္တိများနှင့် အာဂမယုတ္တိများကို ကျွန်ုပ် ဆက်လက်ဖော်ပြလိုပေသည်။

 

Tomorrow Never Die (1997)  ရုပ်ရှင်ကားကိုဂျိန်းစ်ဘွန်းမင်းသားက မလေးရှားမင်းသမီး မီရှဲလ်ယိုနှင့်တွဲဖက်၍ တရုတ်နိုင်ငံနှင့် ပြင်သစ်နိုင်ငံ၊ ထိုင်းနိုင်ငံ၊ ဂျာမနီ၊ မက္ကဆီကိုနှင့် ယူနိုက်တက်ကင်းဒမ်း၊ ဗီယက်နမ်နိုင်ငံရှိ Hua Long ပင်လယ်အော်တို့တွင် ရိုက်ကူးခြင်းဖြင့် ဗီယက်နမ်နိုင်ငံ Hua Long ပင်လယ်အော်သို့ ကမ္ဘာလှည့် ခရီးသွားများ ပိုမိုလာရောက်လည်ပတ်ကြောင်း သိရှိရလေသည်။

 

၂၀၁၃ ခုနှစ်တွင် ရုံတင်ပြသသည့် ဒါရိုက်တာ Jonathan Teplitzky ရိုက်ကူးသည့် Railway man ရုပ်ရှင်ဇာတ်ကားကို ရုံတင်ပြသပြီးနောက် ထိုင်းနိုင်ငံဘက်အခြမ်းရှိ သေမင်းတမန်ရထားလမ်းသို့ ကမ္ဘာလှည့်ခရီးသွားများ ပိုမိုလာရောက်လည်ပတ်သည်သာမက မြန်မာနိုင်ငံ သံဖြူဇရပ်ရှိ သေမင်းတမန် ရထားလမ်း စတင်ဖောက်လုပ်ရာ နေရာသို့လည်း ကမ္ဘာလှည့်ခရီးသွားများ ပိုမိုလာရောက်လည်ပတ်ကြောင်း တွေ့ရှိရလေသည်။ 

 

ပြည်ပမှ အကျော်ဇေယျ ရုပ်ရှင်ထုတ်လုပ်ရေး ကုမ္ပဏီကြီးတစ်ခုက မြန်မာနိုင်ငံသို့ လာရောက်၍ ရုပ်ရှင်ရိုက်ကူးခြင်းသည်ကျွန်ုပ်တို့နိုင်ငံ၏ ခရီးသွားလုပ်ငန်း ဖွံ့ဖြိုးရေးကို မြှင့်တင်အား ပေးနိုင်ကြောင်း ကျွန်ုပ်ယုံကြည်ယူဆမိသည်။ နိုင်ငံတကာ ရုပ်ရှင်ထုတ်လုပ်ရေးလုပ်ငန်းများ မြန်မာနိုင်ငံ၌ ရုပ်ရှင်လာရောက် ရိုက်ကူးခြင်းဖြင့် ကမ္ဘာလှည့်ခရီးသွားလုပ်ငန်းကိုသာမက နိုင်ငံ့ဝင်ငွေတိုးတက်ရေးအတွက်ပါ ကြီးစွာအထောက် အကူပြုပါလိမ့်မည်။

 

Line Walker -2 ဇာတ်ကားတွင် မြန်မာနိုင်ငံနှင့်သက်ဆိုင်နေသော ရိုက်ကွင်း၊ ရိုက်ကွက်များ ပါရှိခြင်းဖြင့်အာဆီယံအပါအဝင် ဒေသဆိုင်ရာ နိုင်ငံများအားလုံးက မြန်မာနိုင်ငံကို ပိုမိုရင်းနှီးလာပြီး ကျွန်ုပ်တို့နိုင်ငံ၏ မြင့်မားသော ယဉ်ကျေးမှု၊ ထူးခြားသော အနုလက်ရာများ၊ အသွေးအရောင်စုံလင်သော လူနေမှုဘဝများ၊ မြန်မာ့လှူအဖွဲ့အစည်း၏ ဝိသေသ လက္ခဏာများကို ကမ္ဘာက ထူးထူးခြားခြား သိရှိခွင့်ရရှိကာ နိုင်ငံများအချင်းချင်း ချစ်ကြည်မှု သင်္ဂါရ ရသကို တိုးစေလျက်လောကအလှကို ရသပေါ်လွင်စွာ မျှဝေခံစားနိုင်ကြလိမ့်မည်ဟု ကျွန်ုပ်တွေးတောမိရင်း စီကာပတ်ကုံး စာပန်းချီခြယ်မှုန်းမိပါသတည်း။ ။