သတင်းဆောင်းပါး - မြင့်ဆွေဦး
မိုးက စိုစို၊ ကျီးအုပ်ပြို၍
ထိုမှ ဤမှ၊ တို့လမ်းမတွင်
ပျံကြ ဝဲကြ၊ ငရဲထသို့
အုံကြွမြည်အာ၊ မသာယာကို
ငါကြားခဲ့၏ မှတ်မိ၏။
ထိုနေ့၌ပင်၊ ထိုချိန်ထင်၏
သခင်အောင်ဆန်း၊ ပြည်သူ့ပန်းသည်
ပွင့်လန်းခါစ၊ ကြွေလိုက်ရ၏။
ဇော်ဂျီ
၁၉၄၇ ခုနှစ် ဇူလိုင်လ ၁၉ ရက်နေ့ နံနက်ပိုင်းတွင်မိုးက တဖွဲဖွဲရွာလျက်ရှိသည်။ တစ်ခါတစ်ခါ သဲသဲမဲမဲရွာချနေသည်။ ရန်ကုန်မြို့သည် ခါတိုင်းနေ့များလိုပင်သက်ဝင်လှုပ်ရှား သွားလာနေကြသည်။
ရန်ကုန်မြို့ အတွင်းဝန်ရုံးတွင် ဗိုလ်ချုပ်အောင်ဆန်း ဦးဆောင်သော ဝန်ကြီးများသည် အစည်းအဝေး ကျင်းပနေသည်။ ၁၀ နာရီ ၃၇ မိနစ်တွင် ဝန်ကြီးများအစည်း အဝေးကျင်းပနေသည့်နေရာမှ (ဒိုင်း၊ ဒိုင်း၊ ဒိုင်း)အသံများ ရုတ်တရက်ထွက်ပေါ်လာခဲ့လေသည်။ ဗိုလ်ချုပ်အောင်ဆန်းနှင့်ဝန်ကြီးများ အစည်း အဝေးပြုလုပ်နေစဉ်လူသတ်သမားများက အမှတ် (၁၂) တပ် ခြင်္သေ့တံဆိပ်ပါသော စစ်ယူနီဖောင်းများ ဝတ်ဆင်လျက် အစည်းအဝေး အခန်းအတွင်းသို့ ဝင်ရောက်ခဲ့ခြင်းဖြစ်သည်။
ဤသို့နှင့် မြန်မာ့သမိုင်းတွင် အကျည်းတန်အရုပ်ဆိုးသောဖြစ်ရပ်ကြီး ဖြစ်ပေါ်လာခဲ့သည်။ လူထုကြီး တစ်ရပ်လုံး၏ ချစ်ကြည်လေးစားမှုကို ယုံကြည်စိတ်ချလျက် အကာအကွယ်မယူ၊ မစီမံဘဲ လွတ်လပ်စွာ စည်းဝေးလျက်ရှိသော ဝန်ကြီးများသည် ရုတ်တရက်တိမ်းရှောင်ခုခံရန် မတတ်နိုင်ဘဲ လူသတ်သမားတို့၏ တရစပ်ပစ်ခတ်သော စက်သေနတ်ကျည်သင့်၍ အတုံးအရုံး ကျဆုံးခဲ့လေသည်။
ဗိုလ်ချုပ်အောင်ဆန်းနှင့်တကွ ဝန်ကြီးများ လုပ်ကြံခံရ၍ ကျဆုံးသွားခဲ့ပြီးနောက် ဗိုလ်ချုပ်အောင်ဆန်း၏ ဇနီးဖြစ်သူ ဒေါ်ခင်ကြည်က တိုင်းပြည်သို့ မှာကြားချက်အဖြစ် အသံ လွှင့်ရုံမှတစ်ဆင့် ပြောဆိုခဲ့သည်။ “ကျွန်မ၏ ခင်ပွန်းသည်ဖြစ်သည့် ဗိုလ်ချုပ်အောင်ဆန်းဟာ လူမျိုး အတွက် ကြိုးပမ်းရင်း လမ်းခုလတ်မှာပဲ အခုတော့ကျဆုံးသွားရှာပါပြီ။ ဒီတော့ကာ ကျဆုံးသွားရတဲ့ သူတွေလည်း ကျဆုံးသွားကြပြီဖြစ်တဲ့အတွက် ချဲ့ထွင်လို့လည်းပဲမပြောလိုတော့ပါဘူး။
“ကျဆုံးသွားတဲ့ ပုဂ္ဂိုလ်များကို ချစ်ကြည်လေးစား ကြရင်ဖြင့် သူတို့ရည်ရွယ်ထားခဲ့တဲ့ ပန်းတိုင် အထိရောက်အောင် ချမှတ်ခဲ့တဲ့လမ်းစဉ်အတိုင်း လိုက်နာဆောင်ရွက်ကြပါလို့ ပြောပါရစေတော့။
“ကျွန်မမှာတော့ ကြီးလေးတဲ့တာဝန်တွေကိုရှေ့ဆောင် ရှေ့ရွက်အဖြစ်နဲ့ မလုပ်နိုင်သေးလို့ နောက်က နေပြီးတော့ပဲ ဗိုလ်ချုပ်ချမှတ်ခဲ့တဲ့ လမ်းစဉ်များကိုတစ်နည်းတစ်ဖုံပြုစုအားပေးပြီး သူ့ရဲ့ရင်နှစ်ဖြစ်တဲ့ ကလေးများကို သူတို့ရဲ့ဖခင်သွေးပီပီ ဖခင်လို ဖြစ်ထွန်းလာစေဖို့ ပြုစုပျိုးထောင်ပေးတော့မယ်လို့ ဆုံးဖြတ်ပြီးပါပြီ။
“ကျွန်မနည်းတူ ကျွန်မနှင့် ကံတူအကျိုးပေးဖြစ်ကြ ရတဲ့၊ ကျဆုံးသွားကြတဲ့ ခေါင်းဆောင်ကြီးများရဲ ဇနီးသည်များမှာလည်း ဝမ်းနည်းပက်လက်ဖြစ်ကြပေလိမ့်မယ်လို့ သိပါရဲ့။ ဒါပေမယ့် ကျွန်မပြောလို တာကတော့သူတို့ကို တကယ်ချစ်ရိုးမှန်ရင်ဖြင့် သူတို့ချမှတ်ထားခဲ့တဲ့လမ်းစဉ်ကို လိုက်ကြစေလိုပါ တယ်။ ဒါမှလည်းပဲ သူတို့ကို ချစ်ရာခင်ရာရောက်ပါလိမ့်မယ်။
“ဒီတော့ ကျွန်မတို့က အကောင်အထည်ပေါ်အောင်ဝိုင်းဝန်းပြီး အားပေးကြဖို့ လိုပါတယ်။ ကျွန်မတို့ တိုင်းသူပြည်သားများကလည်း ကျဆုံးသွားတဲ့ ပုဂ္ဂိုလ်ကြီးများကိုလေးစားတဲ့အနေနဲ့ ဒေါသရှေ့ထားပြီး စိတ်လိုက်မာန်ပါ မပြုလုပ်ကြဘဲ ကွယ်လွန်တဲ့ ပုဂ္ဂိုလ်များရဲ့ ချမှတ်ထားခဲ့တဲ့လမ်းစဉ်အတိုင်း တစ်သဝေမတိမ်း လိုက်နာဆောင်ရွက်ဖို့လိုပါတယ်။
“ဖဆပလအဖွဲ့ကြီးနဲ့ ဖဆပလအစိုးရအဖွဲ့ကိုအားလုံးထောက်ခံကြပြီး ကွယ်လွန်ရှာကြတဲ့ ခေါင်းဆောင်များရဲ့ ရည်မှန်းချက်ဖြစ်တဲ့ (လုံးဝလွတ်လပ်ရေး) မရမနေကြိုးစား အားထုတ်ကြပါလို့သာ တိုင်းပြည်အား အပြီးသတ်မှာကြားခဲ့ပါတယ်။”
ပြိုင်ဘက်မဲ့ ခေါင်းဆောင်ကြီး အာရှတိုက်ကြီး၏ သတ္တိခဲ ရဲဘော်ကြီး ဗိုလ်ချုပ်အောင်ဆန်း ဆုံးရှုံး သဖြင့်ယူကျုံးမရဖြစ်ရပြီဟု အိန္ဒိယကြားဖြတ်အစိုးရ ဒုတိယဥက္ကဋ္ဌ ပဏ္ဍစ်ဂျဝါဟလာနေရူးက ထုတ်ဖော်ပြောဆိုခဲ့သည်။ ဤကဲ့သို့ ထင်ရှားသောခေါင်းဆောင်ကြီးများကိုလွတ်လပ်ရေးတံခါးဝသို့ ဆိုက်ရောက်နေချိန်၌ လုပ်ကြံခြင်း မှာ ပြော၍မဆုံးနိုင်လောက်အောင် ကြေကွဲဝမ်းနည်းရသည်ဟု ဆိုလေသည်။
ဦးအောင်ဆန်းသည် လူငယ်ပင်ဖြစ်စေကာမူကျွန်ုပ်၏ရဲဘော်မိတ်ဆွေဖြစ်ကာ မြန်မာလူထု၏ ပြိုင်ဘက်မဲ့ခေါင်းဆောင်နှင့် မြန်မာ့လွတ်လပ်ရေးကို ဖန်တီးမည့်ပုဂ္ဂိုလ်ဖြစ်၍ များစွာဝမ်းနည်းကြောင်း၊ ကျဆုံးရှာသော ၎င်း၏အဖော်များအတွက်လည်း ဝမ်းနည်းကြောင်း၊ အာရှတိုက်ကြီးမှာ ရဲစွမ်း သတ္တိနှင့်ပြည့်စုံသော သားကောင်းရတနာများ ဆုံးရှုံးရခြင်းကြောင့်လည်း ဝမ်းနည်းကြောင်း ထုတ်ဖော် ပြောကြားခဲ့သည်။
ဤဆိုးရွားသော အဖြစ်သနစ်သည် စည်းမဲ့ကမ်းမဲ့ပရမ်းပတာဖြစ်မှုနှင့် ကြောက်မက်ဖွယ်ရာ အန္တရာယ်များကိုသတိပေးခြင်းဖြစ်ကြောင်း၊ ယင်းတို့မှာ လွတ်လပ်ရေး၏ ရန်ဆူးရန်ငြောင့်များဖြစ်၍ အကျိုးအားဖြင့် ဖရိုဖရဲ ပျက်စီး ဆုံးပါးခြင်း၊ စိတ်နှလုံး ပူပန်ညစ်နွမ်းခြင်းသာ အဆုံးရှိပေကြောင်း၊ အိန္ဒိယပြည်၊ မြန်မာပြည်နှင့် အာရှတိုက်သည်၎င်းတို့၏လွတ်လပ်ရေးအတွက် အကြမ်းဖက်မှုများကို ရင်ဆိုင်ကြရကြောင်း၊ ကျွန်ုပ်သည် အိန္ဒိယလူမျိုးတို့၏ ကိုယ်စား လှိုက်လှိုက်လှဲလှဲ ဝမ်းနည်းပူဆွေး ကြောင်းကိုမြန်မာလူထုသို့ပြောကြားပါကြောင်း၊ အနာဂတ်အခက်အခဲတွေ့ကြုံရသည့်အခါများတွင် အိန္ဒိယပြည်သည်မြန်မာတို့နှင့်အတူ ယှဉ်တွဲဆောင်ရွက်မည်ဖြစ်ကြောင်း အိန္ဒိယခေါင်းဆောင် ပဏ္ဍစ်နေရူးက ထုတ်ဖော်ပြောဆိုခဲ့သည်။
အိန္ဒိယနိုင်ငံ၏ အမျိုးသားခေါင်းဆောင်ကြီး မဟတ္တမဂန္ဒီကြီးကလည်း မြန်မာနိုင်ငံမှ လုပ်ကြံမှုကြီးနှင့် ပတ်သက်၍ ပြုလုပ်သော ဆုတောင်းပတ္ထနာပွဲတွင်ဆုတောင်းစကားပြောဆိုခဲ့သည်။
“မြန်မာနိုင်ငံသည် အိန္ဒိယကဲ့သို့ လွတ်လပ်ရေးရ တော့မည်။ မြန်မာနိုင်ငံခေါင်းဆောင် ဂျင်နရယ် အောင်ဆန်းသည် ခေတ်သစ်မြန်မာနိုင်ငံကို မွေးဖွားသူဖြစ်ပြီးလျှင်မြန်မာနိုင်ငံကို လွတ်လပ်ရေးတံခါး၀ ၌ ထားပစ်ခဲ့သည်။ ဂျင်နရယ်အောင်ဆန်းသည် သူရဲကောင်းလုလင်ဖြစ်သည်။ သူ့ကြောင့် ယနေ့ မြန်မာနိုင်ငံလွတ်လပ်ရေးရတော့မည်။ လက်နက်ကိုင်တစ်စုက သူနှင့်သူ့ရဲဘော်များကို လုပ်ကြံ သတ်ဖြတ်လိုက်သည်။ ယင်းမှာ သေးငယ်သော အဖြစ်အပျက်မဟုတ်ပေ။ မြန်မာနိုင်ငံသည် ကျွန်ုပ်တို့နှင့်ဘယ်လောက်ပင်ဝေးဝေး ယင်းအဖြစ်အပျက်သည်ကျွန်ုပ်တို့အတွက် စိတ်မချမ်းမြေ့ ဖွယ်ပင် ဖြစ်သည်။ အကယ်၍ ယင်းအဖြစ်အပျက်မျိုး ဖြစ်ပျက်နေခဲ့သော်ကမ္ဘာကြီး၏ အခြေအနေ ဘယ်လိုဖြစ်သွားမည်နည်း။ မြန်မာနိုင်ငံတွင် ကျွန်ုပ် အတော်ကြာအောင် နေခဲ့ဖူးသည်။ မြန်မာနိုင်ငံ သည် ဗုဒ္ဓဘာသာထွန်းကားသည့်နိုင်ငံ ဖြစ်သည်။ မြန်မာပြည်သူ ပြည်သားတို့သည် များသောအားဖြင့် ဗုဒ္ဓဘာသာကို ကိုးကွယ်ကြသူများဖြစ်သည်။ ဗုဒ္ဓဘာသာ ထွန်းကားသည့်နိုင်ငံ၌ ဘာကြောင့် ယခုလို သွေးထွက်သံယိုအဖြစ်မျိုး ပေါ်ပေါက်လာရသနည်း။ လွတ်လပ်ရေး တံခါး၀၌ ခြေချနေစဉ် ယခုလိုဖြစ်ရသည်မှာ အလွန်တရာ ဝမ်းနည်းဖွယ်ကောင်းသည်။
“အိန္ဒိယသည် မြန်မာနိုင်ငံတွင် ဖြစ်ပျက်သော အဖြစ်အပျက်မှ သင်ခန်းစာယူလိမ့်မည်ဟု ကျွန်ုပ် မျှော်လင့်သည်။ အကြောင်းမူကား ယင်းအဖြစ်အပျက်သည် မြန်မာနိုင်ငံအတွက်မျှသာမက အာရှတိုက် တစ်ခုလုံးအတွက် ကြေကွဲဝမ်းနည်းဖွယ် အဖြစ်ဆိုးတစ်ရပ်ဖြစ်သောကြောင့်တည်း။ ဘုရားသခင်သည် ကျွန်ုပ်တို့ကဲ့သို့ပင် လွတ်လပ်ရေးအတွက်ဗျာများနေသော မြန်မာပြည်သူ ပြည်သားတို့အား ယခုလို ပူဆွေးဒုက္ခရောက်နေချိန်၌ နှစ်သိမ့်မှုပေးပါစေရန်လည်းကောင်း၊ ကွယ်လွန်သူခေါင်းဆောင်များ၏ မိသားစုများအား သောကပရိဒေ၀ ခံနိုင်စွမ်းရှိအောင် စွမ်းရည်သတ္တိပေးပါစေဟူ၍လည်းကောင်း ကျွန်ုပ်တို့ ဆုတောင်း ပတ္တနာပြုလိုက်ပါသည်။”
ဗိုလ်ချုပ်အောင်ဆန်းနှင့် ဝန်ကြီးများ လုပ်ကြံခံရမှုနှင့်ပတ်သက်၍ က္ဘာ့ခေါင်းဆောင်များကလည်း ဝမ်းနည်းကြောင်း သဝဏ်လွှာများ ပေးပို့ခဲ့ကြသည်။အင်္ဂလန်နိုင်ငံ ဆဋ္ဌမမြောက် ဂျော့ဘုရင်ထံမှ ပေးပို့သော သဝဏ်လွှာတွင် “မိမိသည် ဇန်နဝါရီလ အတွင်းက ဗိုလ်ချုပ်အောင်ဆန်းနှင့် သခင်မြတို့ အား တွေ့ဆုံခဲ့ရသည်ကို ဝမ်းပန်းတသာ သတိရလျက်ပင်ရှိရ သေးသည့်အခါ၌ မြန်မာပြည် အစိုးရအဖွဲ့ဝင် ဝန်ကြီးများအား ဝင်ရောက်သတ်ဖြတ်သည့် သတင်းကို ကြားရ သောအခါ များစွာပင် စိတ်မကောင်းဖြစ်ရပါသည်။
ဆက်လက်၍ မိမိပြင်းပြစွာဝမ်းနည်းကြောင်းကိုလုပ်ကြံခံရသော အစိုးရအဖွဲ့ဝင်ဝန်ကြီးများ၏ ဆွေမျိုးများထံ ပို့ပေးရန် ဆန္ဒရှိပါသည်။ ယင်းအပြင် မိမိကလည်း အနာတရဒဏ်ရာရသော ပုဂ္ဂိုလ်များ၏ အခြေအနေကိုအစုံအလင် သတင်းပေးပို့ရန် လိုလားပါသည်။ မိမိသည်အဆိုပါပုဂ္ဂိုလ်များ ကျန်းမာ ချမ်းသာကြလိမ့်မည်ဟုယုံကြည်ပါသည်”ဟု ရေးသားဖော်ပြခဲ့သည်။
ဗြိတိသျှအစိုးရကပေးပို့သော သဝဏ်လွှာတွင် “မြန်မာပြည်အစိုးရအဖွဲ့ဝင် ဝန်ကြီးများအား လုပ်ကြံ သည့်သတင်းကို ကြားရသောအခါ များစွာပင် တုန်လှုပ်ချောက်ချားမိပါသည်။ ထိုသို့ လုပ်ကြံခံရသော ပုဂ္ဂိုလ်များ၏ဆွေမျိုးများထံ ပြင်းပြစွာ ဝမ်းနည်းမိသည့်အကြောင်းကို သိစေအပ်ပါသည်။ ဗြိတိသျှ အစိုးရအဖွဲ့ဝင်ဝန်ကြီးများသည် ဗိုလ်ချုပ်အောင်ဆန်းနှင့် သခင်မြတို့အား ယူနိုက်တက် ကင်းဒမ်းပြည်သို့ ဇန်နဝါရီလအတွင်း ရောက်ရှိလာစဉ်က ခင်မင်ရင်းနှီးစွာ သိရှိပြီးဖြစ်ပါသည်။ ဗိုလ်ချုပ်အောင်ဆန်း ကွယ်လွန်ခြင်းအားဖြင့် မြန်မာပြည်တွင် တိုင်းပြည်၏ သစ္စာရှိစွာသော ခေါင်းဆောင်တစ်ဦး ဆုံးရှုံးခဲ့ရလေသည်”ဟု ရေးသားထားသည်။
အိန္ဒိယနိုင်ငံဘုရင်ခံချုပ် လော့စ်မောင့်ဘက်တန်ထံမှ မြန်မာနိုင်ငံဘုရင်ခံထံသို့ သဝဏ်လွှာပေးပို့ ခဲ့သည်။ “သင်နှင့် မြန်မာနိုင်ငံအစိုးရတို့ထံသို့ ဝမ်းနည်းစကား ကြားရောက်အပ်ပါသည်။ ကြောက်မက်ဖွယ်ရာ ကောင်းလှသော ဤဖြစ်ပွားမှုကြီးအတွက် အထူးပင်စိတ်တုန်လှုပ်မိပါတော့ သည်။”
ထို့အတူ အမေရိကန်အစိုးရကလည်း သဝဏ်လွှာ ပေးပို့ခဲ့ပါသည်။
ဇူလိုင်လ ၁၉ ရက်နေ့က ဗိုလ်ချုပ်အောင်ဆန်းနှင့်တကွ အခြားဝန်ကြီးများနှင့် အစိုးရအရာရှိအချို့ ရက်စက်စွာ လုပ်ကြံခံရခြင်းအတွက် အမေရိကန်ပြည်ထောင်စုအစိုးရက အထူးဝမ်းနည်းသည့် အကြောင်းကို ရန်ကုန်မြို့ရှိ အမေရိကန်ကောင်စစ်ဝန်ချုပ်မှတစ်ဆင့် နိုင်ငံခြားရေးဝန်ကြီး သခင်နုထံ သို့ ဝမ်းနည်းကြောင်းသဝဏ်လွှာ ပေးပို့ခဲ့လေသည်။
ကမ္ဘာ့သတင်းစာများကလည်း လုပ်ကြံမှုကြီးနှင့်ပတ်သက်၍ သတင်းများရေးသားတင်ပြခဲ့သည်။ ထိုသတင်းစာများမှာ ဘော့ဗ်ဇားဗားသတင်းစာ၊ ရိုက်တာသတင်း ၊ အခု ဗန်ကောက်ပို့စ်သတင်းစာ၊ တိုင်း(မ်)သတင်းစာ စသည်တို့ဖြစ်သည်။ထို့အတူ မြန်မာနိုင်ငံမှ သတင်းစာများကလည်း ထိုလုပ်ကြံမှု ကြီးသတင်းကို ဝေဖန်ချက်များနှင့်အတူရေးသားတင်ပြခဲ့ကြလေသည်။ လုပ်ကြံမှုကြီးနှင့်ပတ်သက်၍ ထိုနေ့ထိုရက်က ပြောကြားခဲ့သော၊ ထုတ်ပြန်ခဲ့သော သတင်းအချက်အလက်များကို တင်ပြ လိုက်ခြင်းဖြစ်သည်။
