ပြည်ထောင်စုဝန်ကြီး ဦးစိုးဝင်း မြန်မာနိုင်ငံဆိုင်ရာ ဆွစ်ဇာလန်နိုင်ငံ သံအမတ်ကြီးနှင့် ကိုရီးယားသမ္မတနိုင်ငံ သံအမတ်ကြီးတို့ကို သီးခြားစီတွေ့ဆုံ

နေပြည်တော် ၁၆ စက်တင်ဘာ

စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးစိုးဝင်းသည် မြန်မာနိုင်ငံဆိုင်ရာ ဆွစ်ဇာလန်နိုင်ငံ သံအမတ်ကြီး Mr. Tim Enderlin နှင့် ယနေ့နံနက် ၁၀ နာရီတွင် လည်းကောင်း၊ မြန်မာနိုင်ငံဆိုင်ရာ ကိုရီးယားသမ္မတနိုင်ငံ သံအမတ်ကြီး Mr. Lee Sang-hwa နှင့် မွန်းလွဲ ၂ နာရီတွင် လည်းကောင်း နေပြည်တော်ရှိဝန်ကြီးရုံး အစည်းအဝေးခန်းမ၌ သီးခြားစီတွေ့ဆုံသည်။

ဆွစ်ဇာလန်နိုင်ငံ သံအမတ်ကြီးနှင့် တွေ့ဆုံစဉ် မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း (Myanmar Sustainable Development Plan-MSDP)တွင် နိုင်ငံအတွက် ထားရှိသည့် ဖွံ့ဖြိုးရေးမျှော်မှန်းချက်များ၊ နိုင်ငံတော်အဆင့် မဟာဗျူဟာ စီမံကိန်းများကို MSDP ၏ လွှမ်းခြုံမှုအောက်တွင် ပြည်သူ့ရင်းနှီးမြှုပ်နှံမှုဆိုင်ရာ စီမံကိန်းဘဏ် (Project Bank)အဖြစ်တစ်စု တစ်ဝေးထဲ ထားရှိအကောင်အထည်ဖော်မှုများ၊ ရင်နှီးမြှုပ်နှံမှု လုပ်ငန်းများ ပိုမိုလွယ်ကူရန် မြေနှင့် အဆောက်အအုံ သတင်းအချက်အလက်ဘဏ် ( Land and Property Bank )နှင့် စပ်လျဉ်းသည့် ကိစ္စရပ်များ၊ မြန်မာနိုင်ငံ၏ အသေးစား၊ အငယ်စားနှင့် အလတ်စား စီးပွားရေးလုပ်ငန်းများ(MSMEs) ဖွံဖြိုးတိုးတက်ရေးဆောင်ရွက်နေမှုများကို ဆွေးနွေး ကြသည်။

ကိုရီးယားသမ္မတနိုင်ငံ သံအမတ်ကြီးနှင့် တွေ့ဆုံစဉ် မြန်မာ-ကိုရီးယား နှစ်နိုင်ငံစီးပွားရေး ပူးပေါင်းဆောင်ရွက်မှုများနှင့် ရှေ့ဆက်လက်ဆောင်ရွက်မည့် ကိစ္စရပ်များကို ဆွေးနွေးကြသည်။

(သတင်းစဉ်)