နေပြည်တော် ၆ ဇူလိုင်

မြန်မာ့အသံနှင့်ရုပ်မြင်သံကြား (MRTV) နှင့် ကွမ်ရှီး ပြည်သူ့အသံလွှင့်ဌာနတို့ ပူးပေါင်း တင်ဆက်သည့် မြန်မာနောက်ခံစကားပြော တရုတ်ကာတွန်းဇာတ်လမ်းတွဲ ထုတ်လွှင့်ပြသမည့် အစီအစဉ်နှင့်ပတ်သက်၍ မိတ်ဆက်သည့် အခမ်းအနားကို ယနေ့မွန်းလွဲ ၃ နာရီက ရန်ကုန်မြို့၊  မြန်မာ့အသံနှင့်ရုပ်မြင်သံကြား (MRTV) ဝင်းတွင် ကျင်းပခဲ့သည်။

အဆိုပါ ကာတွန်းဇာတ်လမ်းတွဲ၏ အမည်မှာ "တောပျော်မျောက်ကေလေးကြွမ့်ကြွမ့်" ဖြစ်ပြီး ကာတွန်းဇာတ်လမ်းတွဲကိုမူ သြဂုတ်လ မှစတင်၍ တနင်္ဂနွေနေ့ နံနက်တိုင်းတွင် ပြသသွားမည်ဖြစ်ကြောင်း သိရသည်။ ဇာတ်လမ်းမှာ တရုတ်နိုင်ငံ ကွမ်ရှီးပြည် အနောက်တောင်ပိုင်းဒေသရှိ တောတောင်များကြားတွင် နေထိုင်သည့် ခေါင်းဖြူမျောက်ကလေး ကြွမ့်ကြွမ့်နှင့် တိရိစ္ဆာန်အပေါင်းအဖော်များကြားတွင် စည်းစည်းလုံးလုံးရှိပုံနှင့် တောတောင်သဘာဝပတ်ဝန်းကျင်ကို ထိန်းသိမ်းကာကွယ်ကြပုံ အကြောင်းဖြစ်သည်။

အခမ်းအနားတွင် မြန်မာ့အသံနှင့်ရုပ်မြင်သံကြားညွှန်ကြားရေးမှူးချုပ် ဦးမြင့်ထွေးနှင့် ကွမ်ရှီး ပြည်သူ့အသံလွှင့်ဌာန ညွှန်ကြားရေးမှူးချုပ် မစ္စတာဖန်းရီတို့က နှုတ်ခွန်စကားများပြောကြားခဲ့ကြပြီး ကလေးငယ်များမှ ဉာဏ်စမ်းမေးခွန်းများ ဖြေဆိုခြင်း၊ ပန်းချီဆွဲခြင်း တို့ကို ပြုလုပ်ခဲ့သည်။

ယင်းနောက် ပြသလျက်ရှိသည့် မြန်မာနောက်ခံစကားပြော တရုတ်ဇာတ်လမ်းတွဲများနှင့် ပတ်သတ်၍ ကြည့်ရှုအားပေးမှုကို ဆန်းစစ်ခြင်းများ ပြုလုပ်ကာ ပထမဆုရရှိသူ နှစ်ဦး၊ ဒုတိယဆုရရှိသူ လေးဦး၊ တတိယဆု ခြောက်ဦးနှင့် နှစ်သိမ့်ဆုရရှိသူ (၃၈) ဦးတို့အား ဆုများအသီးသီးပေးအပ်ခဲ့ပြီး ပထမဆုရရှိသူများသည် ကွမ်ရှီးဒေသသို့ ငါး ရက်တာ သွားရောက်ခွင့်ရရှိခဲ့သည်။

မြန်မာ့အသံနှင့်ရုပ်မြင်သံကြားညွှန်ကြားရေးမှူးချုပ် ဦးမြင့်ထွေးက " စတင်မိတ်ဆက်တဲ့ ကာတွန်းဇာတ်လမ်းတွဲကို လာမယ့် သြဂုတ်လမှာ စတင်ပြသပါမယ်။  အကြမ်းဖျဉ်း တနင်္ဂနွေနေ့ မနက်ပိုင်းမှာ ပြသဖို့ရည်ရွယ်ထားပါတယ်။ အပိုင်း ၃၀ လောက်ပါပါတယ်။ တည်းဖြတ်ရင်းနဲ့ အပိုင်းတွေလည်း ပိုများလာပါတယ်။ နှစ်ဖက်စာချုပ်အရ တရုတ်နိုင်ငံနဲ့ ဇာတ်လမ်းတွဲတွေကို သုံးနှစ်လောက် ဆက်လက်ပြသမှာပါ။ မြန်မာအသံထွက်ပြီး ပြတဲ့ဇာတ်ကားက သိပ်ပြီး အလေ့အထ မရှိတော့ နားထောင်ကာစမှာ ကြည့်ရှုရတာ အခက်အခဲရှိပါတယ်။ ဝေဖန်မှုတွေလည်း လာပါတယ်။ အခုအချိန်မှာတော့ သက်ကြီးရွယ်အိုတွေက စာကို လိုက်မဖတ်နိုင်ဘူး။ နောက်စာတက်ကာစ ကလေးတွေကစာကို သိပ်ပြီး လိုက်မဖတ်နိုင်ဘူး။ ဒါကြောင့် သက်ကြီးတွေနဲ့ ကလေးတွေ ကြည့်ရှုရတာ အဆင်ပြေပါတယ်ဆိုတဲ့ မက်ဆေ့ ကျွန်တော်တို့ဆီ ပြန်ရောက်ပါတယ်။ လူကြိုက်လည်းများလာပါတယ်။  ဒါကြောင့် မြန်မာအသံထွက် ဇာတ်ကားတွေ ဆက်လက်ထုတ်လွှင်ဖို့ စီစဉ်နေပါတယ်။ အခု ပူးပေါင်းဆောင်ရွက်ဖို့ စီစဉ်ထားတဲ့ကိစ္စက ကျွန်တော်တို့ဆီမှာ မြန်မာဇာတ်ကားတွေကို မြန်မာနိုင်ငံမှာလာရိုက်ပြီး တရုတ်နိုင်ငံမှာ ပြန်ပြဖို့ပါ။ ဒါကို ကျွန်တော်တို့ ဆွေးနွေးနေပါတယ်။ ကျွန်တော်တို့ဆီမှာ စိတ်ဝင်စားဖွယ် ဇာတ်လမ်းတွေ အများကြီးရှိပါတယ်။ ပုဂံခေတ်၊ အင်းဝခေတ် စသည်ဖြင့်ပေါ့။ ဒါကို ကျွန်တော်တို့ ဆီမှာလည်း ပြမယ်။ သူတို့ဆီမှာလည်းပြမယ်။ အကုန်အကျ များနိုင်လို စီစဉ်နေဆဲပါ" ဟုပြောသည်။

တရုတ်ပြည်သူ့သမ္မတနိုင်ငံ ကွမ်ရှီးပြည်သူ့အသံလွှင့်ဌာနနှင့်  မြန်မာ့အသံရုပ်မြင်သံကြား (MRTV)တို့အကြား အသံလွှင့်လုပ်ငန်း သဘောတူညီချက်ဆောင်ရွက်မှုကို ၂၀၁၃ စက်တင်ဘာတွင် လက်မှတ်ရေးထိုးခဲ့သည်။ စာချုပ်အရ ၂၀၁၃ မှ ၂၀၁၅ အထိ ကွမ်ရှီးနှင့် MRTV တို့မှ ကိုယ်စားလှယ်များ အပြန်အလှန် လေ့လာရေး သွားရောက်ခဲ့ပြီး လုပ်ငန်းလုပ်ဆောင်မှု ဖြည့်စွက်သဘောတူ ညီချက်စာချုပ်ကို ၂၀၁၇ မတ်လတွင် ရေးထိုးခဲ့သည်။ တရုတ်ရုပ်ရှင်ဇာတ်ကားများ ပူးတွဲထုတ်လုပ်ခြင်းသဘောတူစာချုပ်ကို ၂၀၁၇ ဇွန်လတွင် လက်မှတ်ရေးထိုးခဲ့သည်။

ကွမ်ရှီး ပြည်သူ့အသံလွှင့်ဌာန ညွှန်ကြားရေးမှူးချုပ် မစ္စတာဖန်းရီက " တရုတ်နိုင်ငံမှာ လူကြိုက်များ ကျော်ကြားတဲ့ ကာတွန်းရုပ်သံဇာတ်လမ်းတွဲကို မြန်မာပြည်သူလူထုကို ပြသချင်လို့ အခုလို စီစဉ်တာပါ။ မြန်မာလူမျိုးတွေ ဘယ်လိုနေထိုင်တယ်ဆိုတာ တရုတ်လူမျိုးတွေအနေနဲ့လည်း သိချင်ပါတယ်။ မြန်မာနိုင်ငံမှာ ရုပ်ရှင်လာရောက်ရိုက်ကူးပြီး မြန်မာလူမျိုးတွေ ဘယ်လို ပုံစံနေထိုင်တယ်ဆိုတာကိုလည်း တရုတ်နောက်ခံ စကားပြောနဲ့ ဖော်ပြချင်ပါတယ်" ဟုပြောသည်။

ကွမ်ရှီးပြည်သူ့အသံလွှင့်ဌာနနှင့်  မြန်မာ့အသံရုပ်မြင်သံကြားတို့၏ စာချုပ်ရလဒ်အဖြစ် တရုတ်ရုပ်သံ ဇာတ်လမ်းတွဲများကို မြန်မာစကားပြောနှင့် ထုတ်လွှင့်ပြသခဲ့သည်။ မြန်မာနောက်ခံစကားပြော ဇာတ်လမ်းတွဲများမှာ မင်္ဂလာပါ ချောင်ဟန်း၊ မေတ္တာမျဉ်းပြိုင်၊ အေးအတူပူအမျှ စသည့် ဇာတ်လမ်းတွဲများဖြစ်ပြီး လက်ရှိ မျဉ်းဖြောင့်တစ်ကြောင်း၏ မှတ်တမ်း ရုပ်ရှင်ဇာတ်လမ်းတွဲကို ပြသလျက်ရှိသည်။

သတင်းနှင့်ဓါတ်ပုံ- ညွန့်ကိုကို