ဧရာဝတီတိုင်းဒေသကြီး၊ ဖျာပုံခရိုင်၊ ဖျာပုံမြို့နယ်တွင် လွှတ်တော်ကိုယ်စားလှယ်များနှင့် ဖျာပုံခရိုင်၊ မြို့နယ်ယာဉ်စည်းကမ်းထိန်းသိမ်းရေးကြီးကြပ်မှုကော်မတီမှ ကြီးမှူး၍ ယာဉ်အန္တရာယ်ကင်းရှင်းရေး လှုပ်ရှားမှုအနေဖြင့် ယာဉ်အန္တရာယ်ကင်းရှင်းရေးကို ပြည်သူများ ပူးပေါင်းပါဝင်လာစေရေးအတွက် မော်တော်ဆိုင်ကယ်စီး ဉီးထုပ်များ အခမဲ့ဖြန့်ဝေခြင်းကို ယနေ့ နံနက် (၁၀) နာရီက ဖျာပုံမြို့ သီရိအဏ္ဏဝါ ခန်းမ၌ ကျင်းပသည်။

တနင်္သာရီတိုင်းဒေသကြီး ထားဝယ်ခရိုင် သရက်ချောင်းမြို့နယ် တိုင်းရင်းဆေးကုသရေးဦးစီးဌာနမှ ဦးစီးမှူးနှင့်ဝန်ထမ်းများက ယနေ့ နေ့လယ်ပိုင်းက သရက်နှစ်ခွကျေးရွာ၌ ကျန်းမာရေး အသိပညာပေး ဟောပြောခြင်းနှင့် တိုင်းရင်းဆေးဖြင့် အခမဲ့ကွင်းဆင်းကုသ ဆောင်ရွက်ပေးခဲ့သည်။

၂၀၁၉ ခုနှစ်၊ အပြည်ပြည်ဆိုင်ရာ အိုလံပစ်နေ့အထိမ်းအမှတ် ခရီးရှည်မြင်းစီး လက်ရည်စစ်ပြိုင်ပွဲကို ဇူလိုင် ၁၄ ရက် နံနက် ၆ နာရီတွင် နေပြည်တော် မြင်းစီးအားကစားကွင်း၌ ကျင်းပမည်ဖြစ်ကြောင်း သိရသည်။

မြန်မာနိုင်ငံတွင် မူလတန်းအရွယ် ကလေးငယ်များ မိမိကိုယ်ကို အားကိုးပြီး ယုံကြည်မှုအပြည့်ဖြင့် သူတစ်ပါးအပေါ် ကူညီတတ်သည့် စိတ်ရှိကာ ပျော်ရွှင်ခြင်းနှင့် စွန့်စားမှုကို နှစ်သက်စေရန် ရည်ရွယ်သည့် လူငယ်လေးများအဖြစ် အရွယ်ရောက်လာစေရန်၊ ကင်းထောက်အသိပညာများ တိုးတက်ပြန့်ပွားပြီး လေ့ကျင့်လှုပ်ရှားနိုင်ရန် ရည်ရွယ်၍ မြန်မာနိုင်ငံ ကင်းထောက်အဖွဲ့မှ စင်ကာပူနိုင်ငံနှင့် အင်ဒိုနီးရှားနိုင်ငံ ကင်းထောက်အဖွဲ့မှ နည်းပြများ ပူးပေါင်းကူညီမှုဖြင့် ရှမ်းပြည်နယ် တောင်ကြီးမြို့၊ Brainworks TOTAL International School တွင် ပထမအကြိမ် ကင်းထောက်ငယ် (Cub Scout) သင်တန်းကို ဇူလိုင်လ ၁၂ ရက်နေ့ နံနက်ပိုင်းက ဖွင့်လှစ်ခဲ့သည်။ 

အဆင့်မြင့်ပညာပုဂ္ဂလိကကျောင်းများဆိုင်ရာ လုပ်ငန်းညှိနှိုင်းဆွေးနွေးပွဲအခမ်းအနားကို ယနေ့နံနက် ၁၀ နာရီတွင် ရန်ကုန်မြို့ ပါမောက္ခချုပ်များကော်မတီရုံး အစည်းအဝေးခန်းမ၌ ကျင်းပသည်။