မန္တလေးမြို့နေ ဦးကျော်သူအောင်၏သား သီဟနိုင်(ခ)အသေးလေး အသက်(၂၉)နှစ်သည် မန္တလေးမြို့ ပြည်ကြီးတံခွန်ရပ်နေ အသက်(၈)နှစ်အရွယ် မိန်းကလေးတစ်ဦးအား ၂၀၁၈ ခုနှစ် ဒီဇင်ဘာ ၁၄ ရက် နေ့လယ်ပိုင်းက ခိုးယူသွားပြီးထိုးကြိတ်၍ သားမယားအဖြစ်ပြုကျင့်ကာ ပြင်ဦးလွင်မြို့နယ် ပြင်စာကျေးရွာအနီးတွင် စွန့်ပစ်ခဲ့သဖြင့် ကလေးငယ်၏ ဖခင်ဖြစ်သူ ဦးသန့်ဇင်ဦးက တရားလိုပြုလုပ်၍ ပြင်စာနယ်မြေရဲစခန်း၌ ဥပေဒအရ အရေးယူပေးရန် တိုင်တန်းခဲ့သည်။

စစ်ကိုင်းတိုင်းဒေသကြီး၊ မုံရွာမြို့နယ်၊ ကျောက္ကာ(မြောက်)ကျေးရွာ၏ အရှေ့မြောက်ဘက် ၁ မိုင်ခန့်အကွာရှိ ရေနံကုန်း၌ ဇန်နဝါရီ ၂၈ ရက် မွန်းလွဲ ၃ နာရီ ၂၅ မိနစ်က မီးလောင်မှုဖြစ်ပွားပြီး အမျိုးသား ၃ ဦး ဒဏ်ရာရရှိခဲ့ကြောင်း သိရသည်။

မန္တလေးတိုင်းဒေသကြီး ရဲတပ်ဖွဲ့မှ တပ်ဖွဲ့ဝင်များသည် ဇန်နဝါရီ ၂၇ ရက် ညနေ ၄ နာရီခွဲတွင် ပုသိမ်ကြီးမြို့နယ်၊ ကြူဝန်းကျေးရွာ၊ ရွာလယ်လမ်း၌ လမ်းလျှောက်လာသူ စကုမြို့နယ်၊ ခရုကန်ကျေးရွာနေ တင်ဇော်လင်း (၂၀)နှစ်အား မသင်္ကာ၍ စစ်ဆေးရာ ၎င်းကိုင်ဆောင်လာသော စက္ကူလက်ဆွဲအိတ်အတွင်းမှ ကျောက်မိုင်းခွဲရာတွင် အသုံးပြုမည့် ဒီတိုနေတာ ၆၀ဝ ခုတို့အား တွေ့ရှိသဖြင့် စစ်မေးရာ အဆိုပါပစ္စည်းများအား ပုသိမ်ကြီးမြို့နယ်၊ ကျောက်ချောကျေးရွာနေ ခင်မောင်ကြူး (၄၂)နှစ်ထံမှ ဝယ်ယူခဲ့ကြောင်း သိရှိရ၍ ခင်မောင်ကြူး၏နေအိမ်သို့ သွားရောက်ရှာဖွေရာ ခင်မောင်ကြူးအား ၁ အိတ်လျှင် ၄၀ ကီလိုခန့်ပါ အမိုနီယမ်နိုက်ထရိတ် ၁၃ အိတ် (၅၂၀ ကီလိုခန့်)၊ စက္ကူဂျပ်ဖာဖြင့်ထည့်လျက် ဒီတိုနေတာ ၃၈ ခု၊ ပလတ်စတစ်အိတ်ဖြင့်ထည့်လျက် ၁ အိတ်လျှင် ၁ ပိဿာခန့်ရှိ အမိုနီယမ်နိုက်ထရိတ် ၃၆ အိတ် (၅၈ ကီလိုခန့်)၊ အရှည် ၅၀ ပေခန့်ရှိ ယမ်းကြိုးခွေ ၅ ခွေတို့နှင့်အတူ တွေ့ရှိဖမ်းဆီးရမိခဲ့သည်။

ရှမ်းပြည်နယ်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဇန်နဝါရီ ၂၈ ရက်က ပင်လောင်းမြို့နယ်၊ ဝါးလီကျေးရွာ၏ အနောက်ဘက် ၂ မိုင်ခန့်အကွာ၌ အမြင့် ၁ ပေခန့် သီးပွင့်ဆဲ ဘိန်းစိုက်ခင်း ၁ ဒသမ ၅ ဧကခန့်ကို ဖျက်ဆီးနိုင်ခဲ့ကြောင်း သိရသည်။