မန်စီးတီးအသင်းဟာ ချန်ပီယံလိဂ် ၁၆ သင်းအဆင့်မှာ စပို့တင်းလစ္စဘွန်းအသင်းကို နှစ်ကျော့ပေါင်း ရလဒ် ငါးဂိုး-ဂိုးမရှိနဲ့ အနိုင်ရရှိခဲ့တာကြောင့် ချန်ပီယံလိဂ်ကွာတားဖိုင်နယ်အဆင့်ကို တက်လှမ်းခွင့် ရရှိခဲ့ပြီး အခုလို ကွာတားဖိုင်နယ်တက်လှမ်းခွင့်ရရှိခဲ့တာဟာ မန်စီးတီးအသင်းအတွက် ဘောလုံးရာသီ ငါးရာသီဆက်တိုက် ချန်ပီယံလိဂ်ကွာတားဖိုင်နယ်အဆင့် တက်လှမ်းခွင့်ရရှိခဲ့တာဖြစ်ပါတယ်။ 

ပီအက်စ်ဂျီအသင်းတိုက်စစ်မှူး မက်ဆီဟာ ဗင်နီဇွဲလားအသင်း၊ အီကွေဒေါအသင်းတို့နဲ့ ယှဉ်ပြိုင် ကစားမယ့် ကမ္ဘာ့ဖလားခြေစစ်ပွဲစဉ်တွေမှာ အာဂျင်တီးနားနိုင်ငံလက်ရွေးစင်အသင်းနဲ့အတူ ပြန်လည် ပါဝင်လာမှာဖြစ်တယ်လို့ အာဂျင်တီးနားဘောလုံးအဖွဲ့ချုပ်က ပြောကြားခဲ့ပါတယ်။

ပြင်သစ်တိုက်စစ်မှူး ဘင်ဇီမာဟာ ရီးယဲလ်မက်ဒရစ်အသင်းနဲ့ ပီအက်စ်ဂျီအသင်းတို့ မတ် ၉ ရက် ညပိုင်းက ယှဉ်ပြိုင်ကစားခဲ့တဲ့ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ ရီးယဲလ်မက်ဒရစ် အသင်းနဲ့အတူ သွင်းဂိုးသုံးဂိုး သွင်းယူနိုင်ခဲ့တာကြောင့် ချန်ပီယံလိဂ်ပြိုင်ပွဲသမိုင်းမှာ ဟက်ထရစ်သုံးကြိမ် သွင်းယူနိုင်ခဲ့တဲ့ ပထမဆုံးပြင်သစ်ကစားသမား ဖြစ်လာခဲ့ပါတယ်။

ဆားဘီးယားတင်းနစ်အကျော်အမော်ဂျိုကိုဗစ်ဟာ အမေရိကန်နိုင်ငံရဲ့ ချမှတ်ထားတဲ့ ကိုဗစ်-၁၉ ရောဂါဆိုင်ရာ စည်းမျဉ်းတွေကြောင့် အင်ဒီယန်ဝဲလ်နဲ့ မီယာမီအိုးပင်းတင်းနစ်ပြိုင်ပွဲတွေကနေ  နုတ်ထွက်ခဲ့ရပြီဖြစ်ပါတယ်။

လက်စတာစီးတီးအသင်းတိုက်စစ်မှူး ဗာဒီဟာ ဒူးဒဏ်ရာရရှိထားတာကြောင့်သီတင်းပတ်အနည်းငယ် ကြာ အနားယူရမှာဖြစ်တယ်လို့ သိရပါတယ်။ အသက် ၃၅ နှစ်အရွယ်ရှိ တိုက်စစ်မှူးဗာဒီဟာ မတ် ၅ ရက်က လက်စတာစီးတီးအသင်းက လိဒ်ယူနိုက်တက်အသင်းကို တစ်ဂိုး-ဂိုးမရှိနဲ့ အနိုင်ရရှိခဲ့တဲ့ ပရီမီယာလိဂ်ပွဲစဉ်မှာ ဒူးဒဏ်ရာရရှိခဲ့တာဖြစ်ပါတယ်။