သီရိလင်္ကာခရစ်ကက်ကစားသမား ဆူရန်ဂါလက်ခ်မယ်ဟာ ဖေဖော်ဝါရီလနဲ့ မတ်လတို့မှာ အိန္ဒိယနိုင်ငံ၌ ကျင်းပမယ့် ခရစ်ကက်ပြိုင်ပွဲတွေပြီးဆုံးပါက နိုင်ငံတကာ ခရစ်ကက်ကစားသမားဘဝကနေ အနားယူ တော့မှာဖြစ်တယ်လို့ သိရပါတယ်။

ပေကျင်းအိုလံပစ်အားကစားပြိုင်ပွဲနဲ့ ဆက်နွှယ်သူတွေထဲက ဖေဖော်ဝါရီလ ၁ ရက်နေ့ တစ်ရက် တည်းမှာ ၃၂ ဦးအထိ ကိုဗစ်-၁၉ ရောဂါ ကူးစက်ခံခဲ့ရတယ်လို့ ပေကျင်း ၂၀၂၂ ဆောင်းရာသီအိုလံပစ် အားကစားပြိုင်ပွဲရဲ့ ပြိုင်ပွဲစီစဉ်ညွှန်ကြားရေးကော်မတီက ဖေဖော်ဝါရီ ၂ ရက်မှာ ပြောကြားခဲ့ပါတယ်။

အိုင်ယာလန်လက်ဝှေ့မယ် တေလာနဲ့ ကာရစ်ဘီယံကျွန်းစုနိုင်ငံတစ်ခုဖြစ်တဲ့ ပူတိုရီကိုလက်ဝှေ့မယ် ဆာရာနိုတို့ရဲ့ လက်ဝှေ့ပွဲကို ဧပြီ ၃၀ ရက်တွင် နယူးယောက်မြို့ရှိ မက်ဒီဆင်စကွဲဂါးဒင်း၌ ယှဉ်ပြိုင် ထိုးသတ်မှာ ဖြစ်တယ်လို့သိရပါတယ်။ တေလာနဲ့ ဆာရာနိုတို့ဟာ လက်ရှိအချိန်မှာ ကမ္ဘာ့အကောင်းဆုံး အမျိုးသမီးလက်ဝှေ့မယ်နှစ်ဦးလည်း ဖြစ်ပါတယ်။

ဆီနီဂေါအသင်းဟာ ဖေဖော်ဝါရီ ၂ ရက် ညပိုင်းက ယှဉ်ပြိုင်ကစားခဲ့တဲ့ အာဖရိကနိုင်ငံများဖလားပြိုင်ပွဲ ဆီမီးဖိုင်နယ်ပွဲစဉ်မှာ ဘာကီနာဖာဆိုအသင်းကို သုံးဂိုး-တစ်ဂိုးနဲ့ အနိုင်ရရှိခဲ့တာကြောင့် အာဖရိကနိုင်ငံ များ ဖလားပြိုင်ပွဲရဲ့ နောက်ဆုံးဗိုလ်လုပွဲကို တတိယအကြိမ်မြောက် တက်လှမ်းခွင့်ရရှိခဲ့ပြီဖြစ်ပါတယ်။

အာဆီယံ မသန်စွမ်းအားကစားအဖွဲ့ချုပ်သည် ကိုဗစ်-၁၉ ကပ်ရောဂါကြောင့် ဖျက်သိမ်းခဲ့ရသည့် (၁၁) ကြိမ်မြောက် အာဆီယံမသန်စွမ်းအားကစားပြိုင်ပွဲကို အင်ဒိုနီးရှားနိုင်ငံ၌ ပြောင်းလဲကျင်းပရန် ဆုံးဖြတ်ခဲ့သည်။