မော်လမြိုင်ကျွန်းမြို့နယ်တွင် ၂၀၁၉ ခုနှစ်၊ ဒီဇင်ဘာပြည်သူ့အားကစား လလှုပ်ရှားမှုများအဖြစ် လူထုစုပေါင်းလမ်းလျှောက်ခြင်းနှင့် ကိုယ်လက်လှုပ်ရှား အားကစား အစီအစဉ်ကို မြို့နယ်အားကစားနှင့်ကာယပညာဦးစီးဌာနမှဦးဆောင်၍ ယနေ့နံနက် ၅နာရီခွဲအချိန်တွင် မြို့နယ်အထွေထွေအုပ်ချုပ်ရေးဦးစီးဌာနရုံးရှေ့မှ စတင်ထွက်ခွာ၍မဟာဗန္ဓုလ လမ်းမကြီးမှအောင်သပြေလမ်း၊ အောင်ဆန်းလမ်း၊ (၈)လမ်း၊ စိန်ပန်းပတ်လမ်းမှ မြို့ဦးစေတီအထိ ဒီဇင်ဘာတတိယပတ်အဖြစ် စုပေါင်းလမ်းလျှောက်ခဲ့ကြပြီး  ကျွန်းထိပ်မြို့ဦးစေတီတွင် စုပေါင်းကိုယ်လက်ကြံ့ခိုင်ရေး လေ့ကျင့်ခန်းများကို မြို့နယ်အားကစားနှင့်ကာယပညာဦးစီးဌာန၊ မြို့နယ်ဦးစီးမှူး ဒေါ်နှင်းမိုးလှိုင်က ဦးဆောင်၍လေ့ကျင့်ခန်းများ လေ့ကျင့်ခဲ့ကြသည်။ 

တနင်္သာရီတိုင်းဒေသကြီး၊ မြိတ်ခရိုင်၊ ကျွန်းစုမြို့နယ်တွင် တစ်မျိုးသားလုံးကျန်းမာကြံ့ခိုင်သန်စွမ်းရေး  အတွက် ဌာနဆိုင်ရာအကြီးအကဲများနှင့်ဝန်ထမ်းများ၊ မိဘပြည်သူများ၊ ကျောင်းသား၊ ကျောင်းသူများစုပေါင်း၍ ဒီဇင်ဘာလူထုလမ်းလျှောက်ပွဲကို ဒီဇင်ဘာ ၂၁ ရက်နေ့ နံနက် ၅ နာရီခွဲအချိန်က ကျွန်းစုမြို့ဦး သံသရာအေး စေတီမုခ်ဦးရှေ့မှ စတင်ကာ မြို့နယ်အားကစားကွင်းဆီသို့ စုပေါင်းလမ်းလျှောက်ခဲ့ကြကြောင်း သိရသည်။

ကျန်းမာရေးနှင့်အားကစားဝန်ကြီးဌာန မြန်မာနိုင်ငံကရာတေးအဖွဲ့ချုပ်မှ ကြီးမှူး၍ မန္တလေးတိုင်းဒေသကြီး အစိုးရအဖွဲ့နှင့် Advertising NAGATA Co.Ltd တို့၏ ပံ့ပိုးကူညီမှုဖြင့် ကျင်းပပြုလုပ်သော TAKUYA TANIYAMA CUP KARATE CHAMPIONSHIPS 2019 ဖိတ်ခေါ်ကရာတေးပြိုင်ပွဲဖွင့်ပွဲကို မန္တလေးမြို့၊မန္တလာသီရိမိုးလုံလေလုံ အားကစားကွင်းတွင် ယနေ့ နံနက် ၉ နာရီ က ကျင်းပပြုလုပ်သည်။

၂၀၁၉-၂၀၂၀ ရာသီ ဖူဆယ်လိဂ်ပြိုင်ပွဲ ပွဲစဉ်(၈)ကို ဒီဇင်ဘာ ၂၁ ရက် နံနက်ပိုင်းမှစတင်ကာ အမျိုးသားအားကစားပြိုင်ပွဲရုံ-၂ လှိုင်၌ ဆက်လက်ကျင်းပမည်ဖြစ်သည်။

မြန်မာနိုင်ငံဂေါက်သီးအဖွဲ့ချုပ်နှင့် ဂျပန်နိုင်ငံ Seiko Cooperation (Golf Management) တို့မှ Myanmar Hero's Golf Management Co., Ltd အမည်ဖြင့် Myanmar Hero's Golf Project ကိုအကောင်အထည်ဖော်ဆောင်ရွက်မည့် နားလည်မှု စာချွန်လွှာ လက်မှတ်ရေးထိုးပွဲ၊ ဂေါက်ကွင်းများသို့ world Handicap System (WHS) အသိအမှတ်ပြုလက်မှတ်  ပေးအပ်ပွဲအခမ်းအနားကို ယနေ့မွန်းလွဲပိုင်းက ရန်ကုန်ဂေါက်ကွင်း (တညင်းကုန်း) ၌ ကျင်းပသည်။