စစ်ကိုင်းတိုင်းဒေသကြီး၊ ချောင်းဦးမြို့နယ်တွင် နိုင်ငံတော်မှ  ထောက်ပံ့ပေးသည့် အခြေခံ စားသောက်ကုန်ပစ္စည်းများဖြစ်သည့် ဆန်၊ ဆီ၊ ဆား၊ ပဲနှင့် ကြက်သွန်နီများကို ပုံမှန်ဝင်ငွေမရှိသော အခြေခံလူတန်းစားများ လက်ဝယ်အရောက်ဖြန့်ဝေ ပြီးစီးကြောင်း သိရသည်။

နေပြည်တော်ကောင်စီနယ်မြေ လယ်ဝေးမြို့နယ်ရှိ အခြေခံလူတန်းစား အိမ်ထောင်စုများအား အခြေခံစားကုန် ငါးမျိုးကို ဧပြီ ၁၀ ရက်မှ စတင်ထောက်ပံ့ပေးအပ်လျက်ရှိရာ ယနေ့တွင်လည်း အိမ်အရောက်ပို့စနစ်ဖြင့် ဆက်လက် ထောက်ပံ့ပေးအပ်လျက်ရှိကြောင်း လယ်ဝေးမြို့နယ် အုပ်ချုပ်ရေးမှူး ဦးထွန်းရွှေထံမှ သိရသည်။

မန္တလေး၊ အောင်မြေသာစံမြို့နယ်တွင် ကိုဗစ်-၁၉ ရောဂါ ကာကွယ်ထိန်းချုပ်ရေးလုပ်ငန်းများ၌ ပါဝင်ဆောင်ရွက် လျက်ရှိသည့် ဌာနဆိုင်ရာများနှင့် လူမှုရေးအသင်းအဖွဲ့များအား အလှူငွေနှင့် Mask များ ပေးအပ်ခြင်းကို ယနေ့ ညနေ ၃ နာရီက အောင်မြေသာစံမြို့နယ်၊ အထွေထွေအုပ်ချုပ်ရေးဦးစီးဌာနရုံး၊ အစည်းအဝေးခန်းမတွင် ပြုလုပ်သည်။

ရှမ်းပြည်နယ်အစိုးရအဖွဲ့၏ ဦးဆောင်မှု၊ ကမ္ဘောဇဘဏ်၏ ကူညီထောက်ပံ့မတည်မှုဖြင့် ရှမ်းပြည်နယ် ပြည်သူလူထု စားနပ်ရိက္ခာ ထောက်ပံ့ရေးကော်မတီနှင့် ပြည်နယ် ကျန်းမာရေးထောက်အကူပြုပစ္စည်းများ စီမံခန့်ခွဲမှုကော်မတီ အနေဖြင့် တိုက်နယ်ဆေးရုံများ၊ ကျေးလက်ဆေးပေးခန်းများနှင့် ကျန်းမာရေးစောင့်ကြည့် စခန်းများအရောက် နေ့စဉ်ထောက်ပံ့ရေးပစ္စည်းများနှင့် ကာကွယ်ရေးပစ္စည်းများ လှူဒါန်းလျက်ရှိသည်။

ကရင်ပြည်နယ်၊ ဘားအံမြို့နယ်တွင် ကိုဗစ် ၁၉ ရောဂါ ထိန်းချုပ်ကာကွယ်နိုင်ရေးအတွက် ကျေးလက်ဒေသ ဖွံဖြိုးတိုးတက်ရေး ဦးစီးဌာနနှင့် UNICEF တို့ ပူးပေါင်း၍ အများသုံးလက်ဆေးစင် အစုံ ၄၀ ကို တပ်ဆင်ပေးခဲ့ကြောင်း သိရသည်။

ကရင်ပြည်နယ်၊ မြဝတီမြို့တွင် သင်္ကြန်ကာလအတွင်း ပုံမှန်ဝင်ငွေမရှိသော အိမ်ထောင်စုများအတွက် အခြေခံစားသောက်ကုန် (၅)မျိုးအား အိမ်တိုင်ရာရောက် ထောက်ပံ့ဖြန့်ဝေပေးလျက်ရှိရာ ယနေ့ ငါးရက်မြောက်နေ့အဖြစ် အိမ်ထောင်စု ၂၅၀၀ စုအား ဖြန့်ဝေပေးခဲ့ကြောင်း မြဝတီခရိုင်အုပ်ချုပ်ရေးမှူး ဦးတေဇာအောင်ထံမှ သိရသည်။