မကွေးတိုင်းဒေသကြီး၊ မင်းဘူး(စကု)မြို့နယ် အိုင်းမကျေးရွာအုပ်စု၊ အိုးပြင်မဲကျေးရွာရှိ မီးဘေးသင့်ပြည်သူများ အဆင်ပြေစွာ နေထိုင်စားသောက်နိုင်ရေးအတွက် ဖေဖော်ဝါရီ ၁၉ ရက် နံနက် ၁၀ နာရီက ပွင့်ဖြူမြို့နယ် လက်ခုပ်ကျေးရွာ အုပ်ချုပ်ရေး ဦးဇော်လင်းထွန်း ဦးဆောင်၍ ရပ်မိရပ်ဖများက ကျေးရွာနေပြည်သူများ စုပေါင်းထည့်ဝင် လှူဒါန်းငွေကျပ်  ၇ သိန်းတန်ဖိုးရှိ ဆန်နှင့် အိမ်အသုံးအဆောင်ပစ္စည်းများ သွားရောက်ကူညီ ထောက်ပံ့လှူဒါန်းပေးခဲ့ကြောင်း သိရသည်။

၂၀၁၆ ခုနှစ်က လှုပ်ခတ်ခဲ့သည့် ငလျင်ဒဏ်ကြောင့် ထိခိုက်ပျက်စီးမှုများ ဖြစ်ပေါ်ခဲ့သည့် ပုဂံဒေသရှိ ရှေးဟောင်းဘုရား ၉၂ ဆူအား အိန္ဒိယနိုင်ငံ၏ ကူညီထောက်ပံ့မှုဖြင့် ယခုလအတွင်း ပြုပြင်ထိန်းသိမ်းမှုလုပ်ငန်းများ စတင်လုပ်ဆောင်နေပြီဖြစ်ကြောင်း သိရသည်။

ပဲခူးတိုင်းဒေသကြီး ညောင်လေးပင်မြို့နယ် လူငယ်ရေးရာကော်မတီမှ ဦးဆောင်ကျင်းပသော စာဖတ်ရှိန်မြှင့်တင်ရေးနှင့် စာအုပ်ဈေးရောင်းပွဲတော် ဖွင့်ပွဲအခမ်းအနားကို ဖေ‌‌ဖော်ဝါရီ ၁၉ ရက် နံနက် ၉ နာရီက ညောင်လေးပင်မြို့ ပြန်ကြားရေးနှင့် ပြည်သူ့ဆက်ဆံရေးဦးစီးဌာနရုံး လူထုအခြေပြုဗဟိုဌာန၌ ကျင်ပသည်။

ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ် စည်ပင်သာယာရေးကော်မတီမှ အမှိုက်စွန့်ပစ်မှုပညာပေးခြင်းနှင့် အမှိုက်ခွဲခြားစွန့်ပစ်မှု ကစားနည်းပြိုင်ပွဲများကို ဖေဖော်ဝါရီ ၁၉ ရက် မွန်းလွဲ ၁ နာရီက အမှတ်(၂) အခြေခံပညာအထက်တန်းကျောင်းရှိ ပညာ့ဗိမာန်ခန်းမ၌ ကျင်းပခဲ့သည်။

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာဝင်းမြတ်အေးသည် ယနေ့ နံနက်ပိုင်းက ရခိုင်ပြည်နယ်၊ ဘူးသီးတောင် မြို့နယ်အတွင်းရှိ ဒဏ်ရာရ ကျောင်းသူ၊ ကျောင်းသားများနှင့် တိုက်ပွဲရှောင် တိုင်းရင်းသား ပြည်သူများအား သွားရောက်တွေ့ဆုံ၍ နှစ်သိမ့်အားပေး ထောက်ပံ့ခြင်းများကို ဆောင်ရွက်ခဲ့သည်။

စစ်ကိုင်းတိုင်းဒေသကြီး အစိုးရအဖွဲ့ ဝန်ကြီးချုပ် ဒေါက်တာမြင့်နိုင်သည် တိုင်းဒေသကြီးအစိုးရအဖွဲ့ဝင် ဝန်ကြီးများ၊ တိုင်း၊ ခရိုင်၊ မြို့နယ်အဆင့် ဌာနဆိုင်ရာတာဝန်ရှိသူများနှင့်အတူ ယနေ့ နံနက် ၁၁ နာရီက နယ်စပ်ရေးရာဝန်ကြီးဌာန၊ ပညာရေးနှင့် လေ့ကျင့်ရေးဦးစီးဌာန၊ ကလေးမြို့ အမျိုးသမီးအိမ်တွင်းမှု သက်မွေးလုပ်ငန်းပညာသင်တန်းကျောင်းတွင် ကျင်းပပြုလုပ်သော တွေ့ဆုံပွဲသို့ တက်ရောက်သည်။